Mme Saam 28:7

Ake Defid.

Akam E-ebọññọ Eyem Unwam

1Afo ke ñkoot, Abọọñ;

afo ado Itiad mmi,

kundeeme miin.

Sia afo ukpudop uyio,

ami ndiiba nte mbon e-etịkkeke edʌk ube.

2Kop ayịd a-ami ntuaha ñyem mbọm

naña nte ami ukoodo ñyem unwam,

nte mbenneke ubọk mmi

ñnyan ke Ataa Adisana Itie mfo.

3Kundʌt miin udakka ye mbon ibak,

ye mbon e-enamma abʌd-abʌd ñkpọ,

e-etañña ikọ emem-emem ye mbọhọidʌñ ammọ

ado enie idiọọkesịd ke esịd ammọ.

4Nọ ammọ utịb ubọkutom ammọ

ye utịb ibak ammọ;

nọ ammọ utịb ñkpọ se ubọk ammọ anam

nọ ammọ se idot ye ammọ.

5Sia ammọ imiinieghe mbaak inọ mme adinam Abọọñ

ye se ubọk amọ anam,

anye ayaawai ammọ abono ke isọñ

idiinyʌññọ itañ ammọ ibok aba tutu amama.

6Itooro anie Abọọñ,

sia anye a-akop ayịd ake ami ntuaha ñyem mbọm.

7Abọọñ ado adudu mmi ye atuekọñ mmi;

esịd mmi abuọt idem ke anye, anye anyʌñ añnyaaña miin.

Esịd mmi ayọhọ ye idaara,

ndin ami ndat ikwọ mmi ntooro anye.

8Abọọñ ado adudu ikọd amọ,

akpọsọñ itie ubọkkọ adinyaaña anọ mbon ake emaekeyet adan inịm.

9Nyaaña ikọd mfo nyʌñ diọñ mbon e-edooho udeeme mfo;

do akpemeedọñ nọ ammọ nyʌñ kama ammọ ke nsi-nsi.