Mme Saam 26

Ake Defid.

Akam Awo Ammiidueghe Ñkpọ

1Ndooro miin uyio, Abọọñ,

sia ami mmedu adinen uwem;

ami mmenie mbuọdidem ke Abọọñ

ñnyʌññọ mfemme.

2Abọọñ, ndomo miin se,

duuñọ esịd mmi ye akikere mmi;

3sia ami mfreke nsọñọnda ima mfo

ñnyʌñ ndot anyen ke akpanikọ mfo.

4Ntieghe ye mbon e-esʌhọke nsu,

ñnyʌññọ ndian idem ye mbon mbubịk

5Ami nsuasua esob mme anam idiọọk

ñnyʌñ nsịn aditie ye mbon ibak.

6Ami mmeyie ubọk mmi ke adinenido,

ñnyʌñ ñkanna akpokoro uwa mfo, Abọọñ,

7ñkwọ itooro mfo ke akpọsọñ uyio

ñnyʌñ mbʌk afịd mme utịppe adinam mfo.

8Abọọñ, ami mmema ufọk a-afo adʌññọ,

itie se ubọọñ mfo adʌñ.

9Kuudat ukpọñ mmi usio udian ye mme anamidiọọk,

kuunyʌñ udat uwem mmi udian ye ake mbon afai,

10ake ubọk ammọ adọñọke utom ibak,

ake ubọk nnasia ammọ ayọhọke ye ubọkedem.

11Ami nsaña ke mfọnmma mmi;

mfak miin nyʌñ ntua miin mbọm.

12Ukod mmi ada ke unaisọñ;

ke akwa esob ami ñyaatooro Abọọñ.