Mme Saam 21

Ake etubom ikwọ. Saam Defid.

Adikọọm Abọọñ ke Adinie Edikan

1Adidem adat esịd ke adudu mfo, Abọọñ.

Idadesịd amọ akpon die ke mme adikan ake afo anọọhọ anye!

2Afo amenọ anye udọñ esịd amọ

unyʌññọ usịn ebeeñe ñkpọkinua amọ.

3Afo amaadikọọm anye ye mme nti adidiọñ

anyʌñ ayat anye anyanya ataa kold ke iwuod.

4Anye amaubeeñe uwem, ndin afo amaanọ anye,

mme anyan usen ke nsi-nsi nsi-nsi.

5Ato ke mme adikan ake afo akenọọhọ anye, ubọọñ amọ akpon;

afo amenọ anye ukpono ye uku.

6Ke akpanikọ afo amenọ anye mme adidiọñ i-imiidiikweeñeke

unwana iso mfo anyʌñ anam esịd anem anye.

7Sia adidem anie mbuọdidem ke Abọọñ;

ato ke nsọọñọnda ima Ata Andikoñ Ñkan

anye idiisịkkeke.

8Ubọk mfo ayaamʌm afịd mme asua mfo;

ubọk nnasia mfo ayaamʌm mbon ammuumaaha fiin.

9Ke ini umauka ekọñ,

afo ayaafọp ammọ nte ke akwa ufiob ikañ.

Abọọñ ayaasobo ammọ ke ifiobesịd amọ,

ndin ikañ amọ ayaata ammọ.

10Afo ayaasobo ubon ammọ asio ke iso isọñ,

asobo emana ammọ asio ke atu uduud awo.

11Akpesʌkado ammọ eduakka idiọọk uduak ubaña fiin

enyʌñ enañña mme ibak-ibak ñkpọ, ammọ idiikịtte unen.

12Afo ayaanam ammọ ekanna edem ammọ

ke ini umauket ammọ ye utịgha mfo.

13Yak ebenne ubọọñ mfo ke adudu mfo, Abọọñ;

ñnyịn iyaikwọ inyʌñ itooro adudu mfo.