Mme Saam 16:8

Miktam Defid.

Mfọñ Ñkan Ndumek

1Ñkpeme miin, Abasi mmi,

sia ami ndịbe ke afo.

2Ami mbo Abọọñ nte, “Afo ado Abọọñ mmi;

ke aboiyoke afo ami nnieghe eti ñkpọ mfen.”

3Ami ntañ mbaña ndisana awo ke abio nte,

“Ammọ edo mbon ukpono ake afịd idadesịd mmi adoroke ke ammọ.”

4Mbon e-efegheke ekeene mme abasi mfen eyaekịt akpọsọñ ukuud.

Ami ndiiduọkkọ uwa iyiib nnọ mme utọ mme abasi ado

ndiinyʌññọ ñkoot anyịñ ammọ ke ñkpọkinua mmi.

5Abọọñ, afo ikpọọñ ado udeeme mmi ye kọọb mmi;

afo anam afia mmi asọọñọ ada.

6Mme udʌk adaña eduọññọ ennọ miin ke mme itie inemesịd;

ke akpanikọ ami mmenie uyaiya udeeme.

7Ñyaatooro Abọọñ ake annọọhọ miin item;

ke akonayio ñko esịd mmi annọ miin item.

8Ami ñwuuk anyen mmi ke Abọọñ afịd ini.

Sia anye abaaha ke ubọk nnasia mmi, ñkpọ ndomokeed idintəkkoke miin.

9Ke ntoro esịd mmi anem, edeme mmi anyʌñ adaara;

idem mmi ñko ayaaba ke ifuuro,

10sia afo uduñkpọññọ miin ke abioekpo,

uduunyʌññọ uyak adinen awo akpanikọ mfo akịt mbiara.

11Afo amenam ami ndiọọñọ usʌñ uwem;

afo ayañyọhọ miin ye inemesịd ke iso mfo,

ye mme nsi-nsi inem ñkpọ ke ubọk nnasia mfo.