Mme Saam 144

Ake Defid.

1Itooro anie Abọọñ Itiad mmi,

anye a-akpeebe ubọk mmi anịm anọ ekọñ,

nnuunubọk mmi anọ anwan.

2Anye ado Abasi ima mmi ye itie ubọkkọ mmi,

akpọsọñ itie mmi ye adinyaaña mmi,

atuekọñ mmi, ake ami ndịbeke,

a-anamma mme awo esuuk iwuod ennọ miin.

3Abọọñ, nsoo ke ubon awo edo nọ afo ase ñkpọ abaña ammọ,

ñkaña abʌkidem ke afo akere ñkpọ abaña ammọ?

4Ammọ eba nte inweek;

mme usen ammọ eba nte ndukpọñ ake imiikpeeneke.

5Abọọñ, nyuuk mme hefịn mfo, nyʌñ sọiyọ di;

tuuk mme ikpọabod, nọ ammọ esioño nsʌñikañ.

6Dọñ akebkeb yak asuan mme asua;

tịgha idañ mfo yak ammọ eduba.

7Tie ke anyọñ nyan ubọk mfo;

mfak miin nyʌñ ñnyaaña miin

sio ke mme akpọsọñ mmọọñ,

ye ke ubọk isenawo

8ake inua ammọ eyọhọke ye nsu,

ake mme ubọk nnasia ammọ edooho abiaña.

9Abasi mmi, ami ñyaakwọ ufa ikwọ unọ fiin;

Ami ñyaabre ndidoudʌk udʌk duob unọ fiin,

10nnọ Anye anọọhọ mme ndidem adikan,

ake anyaañake awo amọ Defid.

Nsio ke eduad ñkpa; 11ñnyaaña miin sio ke akañkañ ñkpa

mfak miin sio ke ubọk isenawo

ake inua ammọ eyọhọke ye nsu;

ake ubọk nnasia ammọ edooho abiaña.

12Ndin nditọ ideen ñnyịn ke uyịn ammọ

eyaeba nte mme eto e-enekkeke ebọọk,

nditọ ibaan ñnyịn eyaeba nte mme abai

e-enamma nọ ekama ediọñ ufọk mbọọñ.

13Ise ñnyịn ayaayọhọ

ye afịd utọ inie.

Edọñ ñnyịn ayaatọt ke tọsịn,

ke tọsịn duob ke mme inwañ ñnyịn;

14mme ñyaaraenañ ñnyịn eyaedʌt ndoppo mbiomo.

Baaba ñkpọ se ibiara idiibaaha,

uka ñkpakọb idiibaaha,

ntuaayịd ukuud idiibaaha ke mme efaak ñnyịn.

15Afọfọn anọ mbon se ikọ ami ado akpanikọ;

afọfọn anọ mbon se Abasi ammọ ado Abọọñ.