Mme Saam 12

Ake adadusʌñ ke ikwọ. Akeene seminid. Saam Defid.

Akam Ebọññọ Eyem Unwam

1Sịn unwam, Abọọñ, sia awo anam akpanikọ ndomokeed ibaaha aba;

utọ mbon ado esop ke ubon awo.

2Afịd awo esʌhọ nsu enọ mbọhọidʌñ ammọ;

ammọ enem inua ke ñkpọkinua

ado edịb abiaña ke esịd ammọ.

3Yak Abọọñ akʌp inua afịd mme nneminua ke ñkpọkinua

ye afịd mbon se iduaak inua;

4mbon e-ebooho,

“Edeme ñnyịn ke idiikama inie edikan;

edeme ñnyịn adiinwana inọ ñnyịn, anie ido abọọñ inọọ ñnyịn?”

5“Ke ntak a-adooho enam mme uweene edo mbịme, mbon unana enyʌñ emịm mmịm,

Abọọñ abo, ami ñyaadakka nda.

Ñyaanyaaña ammọ mbaak mbon ake eyemme ammọ ikọ.”

6Mme ikọ Abọọñ inieghe ndo,

eba nte silfa e-enamma asana ke ikañ,

nte kold e-enamma asana akañ itiaba.

7Afo, Abọọñ, ayaakpeme mbon unana

ayaakpeme ñnyịn, ifak ñnyịn asio ke ubọk mme idiọọk awo ke nsi-nsi,

8e-ekpọọrọke esaña

ke ini ubon awo enọọhọ se idiọọk ukpono.