Mme Saam 108

Ikwọ. Saam ake Defid

1O Abasi, esịd mmi a-anie iwuuk;

ami ñyaakwọ ikwọ ñnyʌñ mmia ñkukwak ye afịd ukpọñ mmi.

2Hab ye ndidoudʌk, idemme!

Ami ñyaademme usiere.

3Abọọñ ami ñyautooro fiin, ke atu mme idịd;

ami ñyaakwọ ubaña fiin ke atu mbon awo.

4Sia ima mfo a-akpon, akoñ akan mme anyọñ;

akpanikọ mfo a-asịm ikpaanyọñ.

5O Abasi, bọ ubọọñ, koñ kan mme hefịn;

yak ubọọñ mfo ayọhọ afịd ekondo.

6Inyaaña ñnyịn nyʌñ inwam ñnyịn ye ubọk nnasia mfo,

nọ mbon a-afo amaaha enie ñkpọkñyak.

7Abasi atie ke adisana itie amọ abo:

“Ke adikan ñyaabakka Sekem nsio ndaaha

ñnyʌñ ndomo Abedeñ Sukọd nsio.

8Kilied ado ake mmi, Manase ado ake mmi;

Ifrem ado itamukpeme anọ iwuod mmi,

Yuda ado esañubọọñ mmi.

9Mọb ado besịn uyieubọk mmi,

ke Edọm ke ami ntop ikpaukod mmi ndot;

ke Filistia ami nsio ñkpo adikan.”

10Anie awo adimben miin idʌk akpọsọñ abio?

Anie adindat miin usʌñ ika Edọm?

11Nte idooho afo, Abasi, afo a-akisịnne ñnyịn,

unyʌññọ usaña aba ye mbon ekọñ ñnyịn?

12Inọ ñnyịn unwam ke abaña mme asua,

sia unwam awo ibaaha ufọn.

13Ke Abasi ñnyịn iyainie adikan,

anye ayaanyʌñ afiik mme asua ñnyịn ke ñkpad.