Biblica® Open Ibibio Contemporary Bible 2025
Yọsua 16
Udeeme Isọñ Nnọọ Ifrem ye Manase
Udeeme isọñ nnọ Yosef aketọọñọ ke Yọdan, ke mme idịm Yeriko ke edem usakkautịn, ato do asaña ke akpautatan akewuọ abod-abod idʌñ Beteel. Ato ke Beteel (a-adooho Luus), ndin aboiyo adaña mbon Akaid ke Atarọd, asọiyọ ke edem usobutịn asaña ke adaña mbon Yafled tutu akewuọ Usuuk Bed Họrọn ye Kesa, aketre ke Akpainyañ Mediterenia.
Ke ntoro Manase ye Ifrem, nditọ Yosef, emaebọ udeeme ammọ.
Adaña nditọ Ifrem ke ubon ke ubon, ekedo ami:
Adaña udeemeñkpọ ammọ aketọọñọ ke Atarọd Ada ke usakkautịn akewuọ Anyọñ-anyọñ Bed Họrọn anyʌñ akaiso akewuọ Akpainyañ Mediterenia. Tọọñọ ke Mikmetaad ke adoro anye amaakanna ke ukañ usakkautịn akaa Taanad Silo, aboiyo do akaa Yanowa ke usakkautịn. Ndin anye amaato ke Yanowa akaa Atarọd ye Naara, atuuk Yeriko ndin akewuọ Yọdan. To ke Tapua adaña ado amaakaa Abedeñ Kana ke usobutịn aketre ke Akpainyañ Mediterenia. Udeemeñkpọ esiin nditọ Ifrem akedo ami, ke ubon ke ubon.
Udeeme ammọ amaasịne afịd abio ye esịd idʌñ e-ekediaññake enịm enọ nditọ Ifrem ke atu udeemeñkpọ nditọ Manase.
Ammọ ikibịnne mbon Kenan se ikidʌñ ke Kesa; mbon Kenan esʌk edọdʌñ ke atu nditọ Ifrem tutu awuọ mfịn ami, ado ana ammọ enam utom nte mme ifʌn.
Biblica® Open Ibibio Contemporary Bible 2025. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.