Yoob 12

Yoob

1Ndin Yoob amaabọọrọ:

2“Ke akpanikọ ndufo ikpọọñ edo mbon e-ebaaha ufọn,

ndin aniọñ adiikpa ye ndufo!

3Ado ami mmenie esịd ukem nte ndufo;

Ami ndooho usʌhọde awo inọọ ndufo.

Anie imiidiọọñọke afịd mme ñkpọ ami?

4“Ami mmekappa ndo ñkpọ nsakimam nnọ mme ufan mmi,

akpesʌkado ami mmaakoot Abasi anye amaayie,

ataa ñkaña ñkpọ nsakimam, akpesʌkado ami ndooho adinen awo ñnyʌñ nnana ndudue!

5Mbon e-ebaaha ke nduọkadudu esịn ndiọọkiso ke ndek

nte uwa ake mbon se ñkpad ammọ afiọnnọ.

6Mme atayad ake mbon ufiik awo inieghe mfịna,

ndin mbon e-eyatta Abasi esịd enie ukpeme,

mbon se Abasi anie ke ubọk amọ.”

7“Ado bịp mme unam, ndin ammọ eyaukpeep fiin,

me mme inuen e-ebaaha ke ikpaanyọñ, ndin ammọ eyaudọkkọ fiin;

8me aditañ ikọ nnọọ ederimbod, ndin ado ayaukpeep fiin,

me yak iyak ke inyañ etañ unọ fiin.

9Akee ke atu afịd mme ñkpọ ami imiidiọọñọke

ke ubọk Abọọñ anam ñkpọ ami?

10Ke ubọk amọ ke uwem afịd ñkpọ se ebot asịne

ye ibifịk afịd ubon awo.

11Nte utọñ idomoke ikọ ise

kpasʌk naña edeme adia ndidia ase?

12Nte awo ikịtte aniọñ ke atu mbon emaekesọñ?

Nte anyan uwem idatta ikike idi?”

13“Aniọñ ye adudu anie Abasi;

item ye ikike edo ake amọ.

14Se anye awuut aduọk awo ikanna imaana ibọp;

mbon se anye asịn ke ñkpakọb awo ikanna isio.

15Adieke anye amʌmmọ mmọọñ akama, nsaadisọñ aba;

adieke anye asaanake mmọọñ ayaak, mmọọñ asobo afịd isọñ.

16Anye ikpọọñ anie adudu ye inweek ye mbufiọk;

anye ñko anie mbon se ebiaña ye mbon abiaña.

17Anye anam mme adaukara enana eti iwuod

anyʌñ anam mme abiideikpe ekappa edo mme ndisịme.

18Anye atat mme ebuka ukwak ndidem

anyʌñ atobo afọñisịn akanna isịn ammọ.

19Anye anam mme aku enana eti iwuod

anyʌñ adooño ikpọawo ukara emaekemuum isọñ aduọọñọ.

20Anye akʌp inua nti mme anọitem

anyʌñ abọ mme ñkpisọñ ifiọk ñkukịd.

21Anye anam mme nti awo edia abuud

anyʌñ abọ ñkpọsọñ awo ide ammọ.

22Anye ayaara mme ntotəño ñkpọ ekịm

anyʌñ aben ekamba ekịm asịn ke unwana.

23Anye anam mme idịd ekpon, anyʌñ asobo ammọ;

anye anam mme idịd etara, anyʌñ asuan ammọ.

24Anye anyịm mme adaukara ederimbod ukeme edikere ñkpọ;

anye anam ammọ edutịn ke anaan ake usʌñ imiibaaha.

25Ammọ eyooñ ke ekịm ake unwana imiibaaha;

anye anam ammọ edutịn nte mme akpammịn.”