Aisaiya 35

Idaara Mbon Enyaañake

1Akpautatan ye nsaad isọñ eyaedaara;

anaan ayaadaara anyʌñ asịññe ñkpokpoñ.

Nte krokus, 2anye ayaasaiya anyʌñ atara;

anye ayaadaara akpọsọñ anyʌñ abọñ ñkpo idaara.

Eyaenọ anye ubọọñ Lebanọn,

mmọnyọ Kamel ye Sarọn;

ammọ eyaekịt ubọọñ Abọọñ,

mmọnyọ Abasi ñnyịn.

3Sọọñọ mme ubọk amemme,

nekke daaha mme akpọ eyemme edifemme;

4bo mbon esịd ndịk,

“Isọñ idem, ikiifeghe ndịk;

Abasi ndufo ayaadi,

anye ayaadi ye usiene;

ye adisana utịb,

anye ayaadi aduunyaaña fiin.”

5Ini ado ke anyen nnan adiitara,

utọñ inan anyʌñ asịtte.

6Ntoro ke mbʌñọ adiitamma nte edob,

edeme imuum ayaabọñ ñkpo idaara.

Mmọọñ ayaawuọ ato anaan,

mme idịm ñko ke akpautatan.

7Ufiob ntan ayaakappa ñkpọdiọhọ mmọọñ,

isọñ nsaditọñ ayaakappa ado itie se mmọọñ atop awuọ.

Ke itie ewaikọd akesinaaha,

mbid ye ñnyanyaha ye papirus eyaekọt.

8Ndin akpọusʌñ ayaaba do;

ediikoot anye Adisana Usʌñ;

anye ayaanyʌñ ado ntoro anọ mbon e-esañake ke Usʌñ ado.

Mbon i-imiisanake idiisañake do iboiyo;

mme ibak ndisịme idiinyʌññọ isaña do.

9Ekpe ndomokeed idiibaaha do,

me unam ndomokeed a-ataaha awo;

ammọ ndomokeed idiibaaha do.

Ado mbon efakka ikpọọñ ediisaña do,

10ndin mbon se Abọọñ afak eyaetịmme enyọñ edi.

Ammọ eyaedʌk Saiyọn ye ikwọ;

nsi-nsi idaara adiido anyanya ke iwuod ammọ.

Inemesịd ye idaara eyaeboiyo ammọ iso,

ndin mfʌhọ ye nsiama eyaefeeñe ekaa anyan.