Aisaiya 31

Adọdiọọk Anọ Mbon e-Ebuọttọ Idem ke Iyib

1Adọdiọọk anọ mbon e-esọiyọke eka Iyib ekeyem unwam,

e-ebuọttọ idem ke enañmbakara,

e-enieghe idodanyen ke uwak sariọd ammọ

ye ke akpọsọñ adudu mme awad enañmbakara ammọ,

ado iseeghe Adisana Abasi Isrel,

inyʌññọ iyem unwam ito Abọọñ.

2Ado anye ñko anie ifiọk anyʌñ akeme adiben nsobo ndi;

anye ikpʌhọke mme ikọ amọ.

Anye ayaadakka ada anwana ye idịd ibak ado,

anwana ye mbon enwamma mme anamidiọọk.

3Ado mbon Iyib edo ñkaña awo, idooho Abasi;

mme enañmbakara ammọ edo unam, idooho sịbidịd.

Ke ini Abọọñ anyanna ubọk amọ,

mbon se inwam eyaetuak ukod,

mbon se enwam eyaeduọññọ;

eyaesobo afịd ammọ akañ keed.

4Se Abọọñ atañ annọ miin ado ami:

“Kpa naña ekpe akuun,

ekamba ekpe ye ndita amọ,

ñko akpesʌkado ekoodo udịm mme akpemeedọñ

yak afịd ammọ ebịne anye,

idem inyeññe anye ibaña uyom ammọ

inyʌññọ ifịna ibaña akpọsọñ uyom ammọ;

ke ntoro Abọọñ Andikponñkan ayaasọiyọ adi

adinwana ekọñ ke Abod Saiyọn ye ke mme ñkoñ-ñkoñ itie amọ.

5Nte mme inuen e-efuurọke ke anyọñ,

Abọọñ Andikponñkan ayaakpeme Yeruselem;

anye ayaakpeme anyʌñ akpọk anye ayaak,

anye ‘ayaasaña ke anyọñ amọ aboiyo’ anyʌñ afak anye.”

6Inyọñ idi, ndufo nditọ Isrel, ibịne Anye a-ndufo ekenamma nsọñiwuod ebaña. 7Sia ke usen ado afịd ndufo eyaesịn mme ubobod abasi silfa ye kold u-ubọk idiọọkñkpọ ndufo enamma.

8“Asiria idiiduọhọ ito eduad ubọk awo;

eduad a-mmiidooho ake ubọkawo ayaasobo ammọ.

Ammọ eyaeduọññọ ke afịd,

eyaenyʌñ ekoono ñkparawa ideen ammọ esịn ke utom ufiik.

9Ibededem ammọ ayaaduọ ato ke ntak ndịk;

ke adikịt ndaha idiọọñọ ekọñ, mme adaiso ekọñ ammọ eyaekop ndịk,”

Abọọñ atañ,

i-ikañ amọ abaaha ke Saiyọn,

a-ñkpọdiọhọ ikañ amọ abaaha ke Yeruselem.