Aisaiya 18

Prọfesi A-abañake Kuus

1Adọdiọọk anọ isọñ ñkukuñkpọyọriyọ

ke mben inyañ Kuus,

2a-adọññọ mme isʌñutom esaña ke akpainyañ

ke mme ubom ñnyanyaha ke anyọñ mmọọñ.

Ikaa, ndufo mme asọbusọb isʌñutom,

ibịne mbon enyọọñọ anyan enyʌñ enie ndọnọ ikpaidem,

mbon a-ndịk ammọ amʌmmọ mme awo ke anyan usʌñ,

idịd mbon afai ye asen usem,

ake mme inyañ ebakkake isọñ ammọ.

3Afịd ndufo se iba ke ekondo,

ndufo e-edʌññọ ke ederimbod,

emaedịppe afọñidiọọñọ ke mme ikpọabod,

ndufo eyaekịt,

ñko emaefịt adukpoñ,

ndufo eyaekop.

4Se Abọọñ atañ annọọ miin ado ami:

“Ami ñyaadop uyio ñnyʌñ ntie ke ebekpo mmi nse,

nte ufiob a-awuọhọ ato utịn,

nte adaaha mbara ke ufiob ini idọk.”

5Sia, mbemiso ini idọk, ke ini mme ñkpokpoñ emaekweeñe,

ñkpokpoñ anyʌñ akappa ado ndad-ndad kreb,

anye ayaakama akọbọ akpok mme ñkọk ammọ,

anyʌñ akpok mme ntiañña ñkọk akoono.

6Eyaebono afịd ammọ enọ mme inuen ikpọabod

ye mme ndiọi unam;

mme inuen eyaekama ammọ edia afịd ini ndaayio

mme ndiọi unam ke afịd ini ndedeñ atueb.

7Ke ini ado eyaeben mme enọ esọk Abọọñ Andikponñkan

eto mbon e-enyọọñọ enyʌñ edọnọ ikpaidem,

eto mbon se mme awo enekke ebaak,

idịd mbon afai ye asen usem,

a-mme inyañ ebakkake isọñ ammọ,

eyaeben mme enọ ami edi ke Abod Saiyọn, itie e-ekoodo Anyịñ Abọọñ Andikponñkan.