Esikeel 15

Yeruselem nte Fain I-imiiwuọñọke Ñkpọ

1Ikọ Abọọñ amaadinsịm miin ate: 2“Ayịn awo, eto fain anie die ukpʌhọde ye ñkọk mme eto mfen ke akai? 3Akenam e-edat ñkọk eto amọ enam ñkpọ ndomokeed se ifọn? Nte ammọ esidat anye enam mboi se ekama ekọọñ ñkpọ? 4Ndin emaeben anye ikọñ ke ikañ nte ifia nọ ikañ ata anye naña ñkañ iba anyʌñ afọp ufọọd ado, nte anye akeme adifọn ke ñkpọ ndomokeed? 5Adieke anye imiikifọnnọ ke ñkpọ ndomokeed naña akedooho ifre, die ndin ke ekeme adiben anye nnam ñkpọ se ifọn ke ini ikañ amaata anye nọ akappa ukañ?

6“Ke ntoro se Abọọñ Andikara atañ ado ami: Kpa naña ami mmaaben eto fain ke atu mme eto ke akai nnọ nte ifia ikañ, kpa ntoro ke ami ndiinam mbon se idʌñọ ke Yeruselem. 7Ami ñyaawuuk iso mmi nse ammọ. Akpesʌkado ammọ emaewuọ ke ikañ, ikañ adiisʌk itata ammọ. Ndin ke ami mmaawuuk iso mmi nse ammọ, afo ayaadiọọñọ ke ami ndo Abọọñ. 8Ami ñyaanam isọn ado akappa ndoon sia ammọ imiinamma akpanikọ, Abọọñ Andikara atañ.”