Udiana Ñwed Krọnikịd 27

Yọtam Adidem Yuda

1Yọtam akedo isua edịb mme ition idaha anye akedooho adidem, ndin anye amaakara ke Yeruselem isua duob mme itiokeed. Anyịñ eka amọ akedo Yerusa ayịn awonwaan Sadọk. 2Anye amaanam se inen ke iso Abọọñ, kpa naña ete amọ Usaiya akenam, ado anye ikidʌkkọ tembịd Abọọñ naña ete amọ akenam. Mbon awo, naña akedo, emaekaa iso ke adinam ndiọiñkpọ. 3Yọtan amaatịmme abọp Inuaatob Anyọñ ke tembịd Abọọñ anyʌñ anam akpọsọñ utom ke ndibene abod Ofel. 4Anye amaabọp mme abio ke abod abio Yuda ye mme ñkpọsọñ itie ye mme tọwa ke mme esịd akai.

5Yọtam amaatịppe ekọñ ye adidem mbon Amọn anyʌñ akan ammọ. Ke isua ado mbon Amọn emaekpe anye talen silfa ikie keed1, kọọ abakpa tọsịn duob2 (10,000) ye kọọ baali tọsịn duob3 (10,000). Mbon Amọn emaekaa iso eben ukem mme ñkpọ ado esọk anye ke ayọhọ isua iba ye ayọhọ ita.

6Yọtam amaakpon ke adudu sia amaasaña ke mbuọdidem ke iso Abọọñ Abasi amọ.

7Mme ñkpọntịppe mfen ke ukara Yọtam, dian afịd mme ekọñ amọ ye mme ñkpọ mfen anye akenamma, ewet esịn ke ñwed mme ndidem Isrel ye Yuda. 8Anye akedo isua edịb mme ition idaha anye akedooho adidem, ndin anye amaakara ke Yeruselem isua duob mme itiokeed. 9Yọtam amaaduọk adudu ye mme eteete amọ emaenyʌñ ebuuk anye ke Abio Defid. Ndin Ahas ayịn amọ awodeen amaadat itie amọ nte adidem.