परमेश्वर उन वचन
रोमियों 14
आबुर दाबुर्द न्याय माळबाळी
जो विश्वास दा निर्बल आन, आऊक तान संगती दा ताकोमकोमी, लेकीन आऊन व्यक्तिगत विचारगोळ मा झगळा माळोर साटी ईला. ऊंद मंळसा अक विश्वास आद कि सप्पा येनारा तिनोद उचित आद, लेकीन जो विश्वास दा निर्बल आन आव साग पात अच तिनतान. तिनावाळा जो तिनालुन आऊक तुच्छ जान्स बाळुल, अदिक जो तिनालुन आव तिनावाळा मा दोष हचबाळुल; यतिकी परमेश्वर आऊक ग्रहण माळ्यान. नी याव हुय जो दुसरा अन सेवक मा दोष हचत्या? आऊन स्थिर ईरोद या बिदोगोद आऊन स्वामी से अच संबंध ईटतद; बल्की आव स्थिर अच माळकु आदान, यतिकी प्रभु आऊक स्थिर ईट सकतान.
यावारा रा ऊंद दिन इक दुसरा दिन से यक्कुल महत्वपुर्ण मान्सतान, अदिक यावारा सप्पा दिनगोळी ऊंदा घाई मान्सतान. हर ऊंद तांद अच मन दा निश्चय माळ कोमुल. जो यातोदारा दिन इक महत्वपुर्ण मान्सतान, रा आव प्रभु उक महत्वपुर्ण मान्सतान. अदिक जो सब कुछ तिनतान, आव प्रभु उन साटी तिनतान, यतिकी आव आंदुर भोजन इन द्वारा परमेश्वर उन धन्यवाद माळतान, अदिक जो मास बिटकु साग पात तिनतान, आव प्रभु उन साटी तिनालुन अदिक परमेश्वर उन धन्यवाद माळतान. यतिकी नाम दा टु यावारा तान साटी जित्ता आन, अदिक ना यावारा तान साटी सायतान. अगर नाव जित्ता आयेव, रा प्रभु उन साटी जित्ता आयेव; अदिक अगर सायतेव, रा प्रभु उन साटी सायतेव; इदुरसाटी नाव जित्ता ईत्तेव या सोत्तेव, नाव प्रभु नोर अच हुयेव. यतिकी मसीह इदुर्दा साटी सोत्तुन अदिक जित्ता भी आग्यान कि आव सोत्तुरी अदिक जित्ता आग्यार येढ्ढु मुंदुर प्रभु आगुल. 2
नी तान वार्ट उन मा येती दोष हचत्या? या नी बाक येती तान वार्ट उक तुच्छ जान्सत्या? नाव सप्पा च्या सप्पा मुंदुर परमेश्वर उन न्याय सिंहासन इन मुंद निदरेव. यतिकी शास्त्र दा लिख्सकु आद,
“प्रभु अनतान, नान जीवन इन किर्या कि हर ऊंद ट्वांगरा नान मुंद टिकसीत,
अदिक हर ऊंद ल्यालग्या ईद कबुल माळीत कि ना परमेश्वर हुईन.”
इदुरसाटी नाम दा टु हर ऊंद मंळसा परमेश्वर उक तान तान लेखा जोखा कोट्टान.
तान वार्ट उन कमजोर आगोद कारण बन्सबाळी
इदुरसाटी मुंद टु नाव आबुर दाबुर मा दोष हचतिदील, लेकीन नीव ईद ठान्स कोमी कि यावारा तान वार्ट उन मुंद ठोकर तिनकु पाप दा बिळोद कारण बन्सबाळुल. प्रभु यीशु दा ऊंद आगदुर नाता देल ना निश्चित जान्सतीन यातोदारा वस्तु तांदुर देल अशुध्द हैलेच, लेकीन जो अदरी अशुध्द सम्सतान आऊन साटी अशुध्द आद. अगर नीन वार्ट या आकतींग नीन भोजन इन कारण दुखी आगतार, रा बाक नी प्यार इन रीति देल नळाल; यदुर साटी मसीह सोत्तुन, आऊक नी तान भोजन इन द्वारा नाश माळबाळ. यारी नीव भला मान्सतीर आऊक यारीकु बुरा माताळगोळ बाळेतीर. यतिकी परमेश्वर उन राज्य तिनोद कुडोद ईला, लेकीन न्यायीपन, शांती अदिक आनन्द जो पवित्र आत्मा कोळतद. जो यावारा ई रीति देल मसीह अन स्यावा माळतान, आव परमेश्वर उक भाऊस्तान अदिक मंळसागोळ दा ग्रहण माळा लायक ठहरूस्तान. इदुरसाटी नाव आ मातगोळ दा हतकु ईत्तेव यऊर देल मेल मिलाप अदिक आबुर दाबुरी आत्मिक उन्नती दा मदत सिकतद. भोजन इन साटी जो परमेश्वर माळ्यान अदरी नष्ट माळबाळी. सप्पा येनारा शुद्ध रा आद, लेकीन आ खाना देल यारीकारा ठोकर हततद रा अद बेकार आद. भला रा ईद आद कि नी ना रा मास तिन अदिक ना रा सारा कुडू, अदिक ना रा हिंग येनारा माळेत यदुर देल नीन विश्वासी वार्ट या आकतींग ठोकर तिनुल. नीन जो विश्वास ईरूल, अदरी परमेश्वर उन मुंद तांद अच मन दा ईट. धन्य आन आव जो आ मात दा, यदरी आव ठीक सम्सतान, तान तान इक दोषी ठहरूसालुन. लेकीन जो लॉकुर संदेह माळकु तिनतार आंदरी परमेश्वर दोषी ठहरूसतान, यतिकी आंदुर कार्य विश्वास इन आधार मा हैलेच; अदिक जो येनारा विश्वास इन आधार मा हैलेच, अद पाप हुन.
Source notes (2)
- Cross-reference कुलुस्सिगोळ २:१६
- Cross-reference २ कुरिन्थि ५:१०
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.