परमेश्वर उन वचन
प्रकाशितवाक्य 3
सरदीस उक बातणी
सरदीस उन मंडली इन स्वर्गदूत उक ईद लिख्स:
“यार हात्ती परमेश्वर उन येळ आत्मागोळ अदिक येळ तारा आव, आव ईद अनतान कि ना नीन क्याल्सागोळी जान्सतीन: नीनी जित्ता रा अंदकु आगतद, लेकीन आय नी सोतकु जागृत आग, अदिक आ चीजगोळी जो मिक्केग्याव अदिक अऊर नाश आगली आद, अवरी मजबूत माळ; यतिकी ना नीन यातोदु क्याल्सा अक तान परमेश्वर उन हात्ती पुरा आग्त नोळीदील. 1इदुरसाटी याद माळ कि नी ह्यांग शिक्षा प्राप्त माळीद अदिक केळीद, अदिक अदुर दा बन्सकु ईर अदिक मन तिर्गुस. अगर नी जागृत ईरतीदील रा नी यागलु जान्स सकतीदिल कि ना याता समय नीन मा बंदकु बिळाईन. लेकीन हव, सरदीस दा नीन अल काईक हिंग लॉकुर आर यार तान तान फळक्यागोळ अशुध्द माळीदिल, आंदुर बिळेव फळक्या हाक्कु नान सांगुळ टेट्यार, यतिकी आंदुर ईदुर लायक आर.” 2
जो विजय हासिल माळ्यान आऊक हिंगा बिळेव फळक्या हाकसुसकु आदीत, अदिक ना आऊन हेसुर जीवन इन किताब दा टु यातोदु रीति देल कडुतिदिल; लेकीन आऊन हेसुर तान आप्प अदिक आऊन स्वर्गदूतगोळ मुंद मान्स कोमाईन. यार किव ईतीदाव आव केळ कोमुल कि आत्मा मंडलीगोळ से येन अनतद.
फिलदिलफिया अक बातणी
“फिलदिलफिया अन्द मंडली इन स्वर्गदूत उक ईद लिख्स:
“जो पवित्र अदिक सही आन, अदिक जो दाऊद उन चाबी ईटतान, यार्द तेरदुर बाद्दा याऊ बंद माळ सकालुन अदिक बंद माळदुर बाद्दा याऊ तेरू सकालुन, आव अनतान कि ना नीन क्याल्सागोळी जान्सतीन; नोळ, ना नीन मुंद ऊंद दरवाजा तेरूकु ईटीन, यदरी याऊ बंद माळ सकालुन; नीन सामर्थ्य थ्वाळासा रा आद, तरी भी नी नान वचन इन पालन माळ्द अदिक नान हेसुर इन इनकार माळीदिल. नोळ, ना शैतान उन आ सभावाळेर इक नीन वश दा माळ बुळाईन जो यहूदी बन्सकु कुरतोग्यार, लेकीन आल्लच उलटा ख्वाटा माताळतार-नोळ, ना हिंग माळाईन कि आंदुर बंदकु नीनी प्रणाम माळ्यार, अदिक ईद जान्स कोंडार कि ना नीन से प्यार ईटीन. नी नांद धीरज इन वचन इक हुळद्या, इदुरसाटी ना भी नीनी परीक्षा अन्द आ समय ऊळ्सकु ईटाईन जो पृथ्वी मा ईरावाळेर्द परख माळोर साटी दुनिया मा बरावाळा आद. ना राटनेरी इच बरावाळा आईन; जो येनारा नीन हात्ती आद अदरी हुडुकु ईर कि याऊ नीन मुकुट कसुबाळुल. 3जो विजय हासिल माळ्यान आऊक ना तान परमेश्वर उन मंदिर दा ऊंद खंबा माळाईन, अदिक आव बाक यागलु व्हार्या होळतीदिल; अदिक ना तान परमेश्वर उन हेसुर अदिक तान परमेश्वर उन नगर मतलब व्हाशोद यरूशलेम इन हेसुर, जो नान परमेश्वर उन हात्ती टु स्वर्ग मा टु ईळोद आद, अदिक तान व्हाशोद हेसुर अदुर मा लिख्साईन. यार किव ईतीदाव आव केळ कोमुल कि आत्मा मंडलीगोळ से येन अनतद.
लौदीकिया अक बातणी
“लौदीकिया अन्द मंडली इन स्वर्गदूत उक ईद लिख्स:
“जो आमीन अदिक विश्वासयोग्य अदिक खरा गवाह आन, अदिक परमेश्वर उन दुनिया अन मुल कारण हुन, आव अनतान कि ना नीन क्याल्सागोळी जान्सतीन कि नी रा ना ठंडा आय अदिक ना बिसक्यांड: वळ्लीद आगाईत कि नी ठंडा या बिसक्यांड ईराईद. इदुरसाटी कि नी क्वामा-क्वामा आय, अदिक ना ठंडा आय ना बिसक्यांड, अनकु ना नीनी तान बाय दा टु तेगदुर मा आईन. नी अनत्या कि ना धनी आईन अदिक धनवान आगेगिन अदिक नानी यातोदु चीज इन कमी हैलेच; अदिक ईद जान्साल कि नी अभागा अदिक तुच्छ अदिक भिखारी अदिक कुढ्ढ अदिक ऊगळा आय. इदुरसाटी ना नीनी सम्मती कोळतीन कि बेक्की देल शुद्ध माळ्द व्हान्ना नान से कोम कि नी धनी आगेग, अदिक बिळेव फळक्या कोंड कोम कि हाक्कु नीनी तान ऊगळापन इंद शरम हतबाळुल, अदिक तान कण्णगोळी हचोर साटी सुरमा कोंडकु रगळुस कि नी नोळली हत्तेग. 4ना यार यार से प्यार माळतीन, आ सप्पा मुंदुरी उलाहना अदिक शिक्षा कोळतीन; इदुरसाटी आस्था ईट अदिक मन तिर्गुस. नोळ, ना दरवाजा मा निदुरकु ठोक्सतिन; अगर यावारा नान शब्द केळकु दरवाजा तेरदान, रा ना आऊन हात्ती बुळ्क बंदकु आऊन सांगुळ ऊमाईन अदिक आव नान सांगुळ.
“जो विजय हासिल माळ्यान ना आऊक तान सांगुळ तान सिंहासन मा कुरसाईन, ह्यांग ना भी विजय हासिल माळकु तान आप्प उन सांगुळ आऊन सिंहासन मा कुर्तोदिन. यार किव ईतीदाव आव केळ कोमुल कि आत्मा मंडलीगोळ से येन अनतद.”
Source notes (4)
- Cross-reference मत्ती २४:४३,४४; लूका १२:३९,४०; प्रकाशितवाक्य १६:१५
- Cross-reference प्रकाशितवाक्य २०:१२; मत्ती १०:३२; लूका १२:८
- Cross-reference प्रकाशितवाक्य २१:२
- Cross-reference इब्रानिगोळ १२:६
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.