परमेश्वर उन वचन
प्रकाशितवाक्य 22
बाक आव नानी बिल्लौर इन घाई झलकुसतेला, जीवन इन नीर इन गांगा तोर्सदुन, जो परमेश्वर अदिक म्यांडा अन्द पाड्डा अन्द सिंहासन टु होटकु आ नगर इन सळक इन न्याड्या वाहुसोद. गांगा अन ईप्पाटी अदिक आप्पाटी जीवन इन मार्र ईरोद; अदुर्दा हन्नेळ प्रकार इन काय हत्तव, अदिक अदरी हर तिंगुळ काय हत्तव; अदिक आ मार्र इन याल्लागोळ देल गैर यहूदी लॉकुर चंगा आगतोगोर.
बाक श्राप आगतीदील, अदिक परमेश्वर अदिक म्यांडा अन्द पाड्डा अन्द सिंहासन आ नगर दा ईत्तीत अदिक आऊन दास आऊन स्यावा माळ्यार. आंदुर आऊन बाय नोळ्यार, अदिक आऊन हेसुर आंदुर ह्याणागोळ मा लिख्सकु ईत्तीत. बाक ईळ्लक आगतीदील, अदिक आंदरी दिंग्या अदिक सुर्य अन्द ऊजुळ इन जरवत बिळतीदील, यतिकी प्रभु परमेश्वर आंदरी ऊजुळ कोट्टान, अदिक आंदुर हमेशा हमेशा राज्य माळ्यार.
यीशु उन दुबारा बरोद
बाक आव नान से अंदुन, “ईव मातगोळ विश्वास इन योग्य अदिक सही आव. प्रभु, जो भविष्यवक्तागोळ आत्मागोळ्द परमेश्वर हुन, तान स्वर्गदूत उक इदुरसाटी कळुदुन कि तान दासगोळी अव मातगोळ, यदुर राटनेरी पुरा आगोद जरूरी आद, तोरस्यार.”
“नोळ, ना राटनेरी बरावाळा आईन! धन्य आन आव, जो ई किताब इन भविष्यवाणी इन मातगोळ मान्सतान.”
ना आवा यूहन्ना हुईन, जो ईव मातगोळ केळीन अदिक नोळतोगीन. याग ना केळदीन अदिक नोळदीन, रा जो स्वर्गदूत नानी ईव मातगोळ तोर्सतोगोन, ना आऊन कालगोळ मा प्रणाम माळोर साटी बिद्दीन. लेकीन आव नान से अंदुन, “नोळ, हिंग माळबाळ; यतिकी ना नीन, अदिक नीन वार्ट भविष्यवक्तागोळ, अदिक ई किताब इन मातगोळ इक मान्सावाळेर्द संगी दास हुईन. परमेश्वर उक अच प्रणाम माळ.” बाक आव नान से अंदुन, ई किताब इन भविष्यवाणी इन मातगोळी बंद माळबाळ; यतिकी समय हात्ती आद. जो अन्याय माळतान, आव अन्याय अच माळतेला ईरूल; अदिक जो मलिन आन, आव मलिन बन्सकु ईरूल; अदिक जो न्यायी आन, आव न्यायी बन्सकु ईरूल; अदिक जो पवित्र आन; आव पवित्र बन्सकु ईरूल.
“नोळ, ना राटनेरी बरावाळा आईन; अदिक हर ऊंद मंळसा अन्द क्याल्सा अन्द अनुसार मोहबदला कोळोर साटी प्रतिफल नान हात्ती आद. 1ना अल्फा अदिक ओमेगा, पयला अदिक आखरी, पयले टु अदिक अन्त हुईन.
“धन्य आंदुर आर, जो तान कपळा ओगु कोमतार, यतिकी आंदरी जीवन इन मार्र इन हात्ती बरोद अधिकार सिक्कीत, अदिक आंदुर फाटकगोळ देल आगकु नगर दा प्रवेश माळ्यार. लेकीन नायगोळ, अदिक टोना माळावाळेर, अदिक व्यभिचारी, अदिक खुनीगोळ अदिक मूर्ति इन पुजा माळावाळा, अदिक हर ऊंद ख्वाटपन इक चाहसावाळा अदिक घळुसावाळा व्हार्या ईत्तान.
“नानी यीशु तान स्वर्गदूत उक इदुरसाटी कळुदुन कि नीम मुंद मंडलीगोळ्द बारा दा ई मातगोळ्द गवाही कोळुल. ना दाऊद उन मुल अदिक वंश, अदिक व्हातुर इन चमकुसतेला तारा हुईन.”
आत्मा अदिक मंळगीत येढ्ढु अंतार, “बर!”
अदिक केळावाळा भी अंदान, “बर!”
जो नीरळ्कु ईतीदान आव बरूल, अदिक जो यावारा चाहासतान आव जीवन इन नीर फुकट दा ताकोमुल.
समापन
ना हर ऊंद मंळसा अक, जो ई किताब इन भविष्यवाणी इन मातगोळ केळतान, गवाही कोळतीन: अगर यावारा मंळसा ई मातगोळ दा येनारा वाळुस्यान रा परमेश्वर आ परेशानीगोळ इक, जो ई किताब दा लिख्सकु आव, आऊन मा वाळुस्यान. अगर यावारा ई भविष्यवाणी इन किताब इन मातगोळ दा टु येनारा तेगु कोंडान, रा परमेश्वर आ जीवन इन मार्र अदिक पवित्र नगर दा टु, यदुर्द वर्णन ई किताब दा आद, अदुर भाग तेगु कोंडान.
जो ईव मातगोळ्द गवाही कोळतान आव ईद अनतान, “हव, ना जल्दी बरावाळा आईन.” आमीन.
हे प्रभु यीशु बर!
प्रभु यीशु उन अनुग्रह पवित्र लॉकुर्द सांगुळ ईरूल. आमीन.
Source notes (1)
- Cross-reference प्रकाशितवाक्य १:८; प्रकाशितवाक्य १:१७; २:८
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.