प्रकाशितवाक्य 20

हजार वर्ष इन राज्य

1बाक ना ऊंद स्वर्गदूत उक स्वर्ग टु ईळुतेला नोळदीन, याऊन कय दा अथाह-अधोलोक इन कुंजी अदिक ऊंद धोळ शंकली ईरोद. 2आव आ अजगर, मतलब हाळोद हाव इक, जो इब्लीस अदिक शैतान आन, हुडुकु हजार वर्ष इन साटी कट बुट्टुन, 3अदिक अदरी अथाह-अधोलोक दा हाक्‍कु बंद माळ बुट्टुन अदिक अदुर मा मोहर हच बुट्टुन कि अद हजार वर्ष इन पुरा आगासताका गैर यहूदी लॉकुरी बाक भरमुस बाळुल. इदुर बाद्दा जरूरी आद कि अद घळी तीम साटी बाक खोल्सकु आगुल.

4बाक ना सिंहासन नोळदीन, अदिक अऊर मा लॉकुर कुरतुर, अदिक आंदरी न्याय माळोद अधिकार कोटकु आत. ना आंदुर आत्मागोळ इक भी नोळदीन, यार ताल्ला यीशु उन गवाही कोळोद अदिक परमेश्वर उन वचन इन कारण कडुकु आगीदव, अदिक यार ना आ पशु उन, अदिक ना अदुर मूर्ति इन पुजा माळीदुर, अदिक ना अदुर छाप तान ह्याणा अदिक कयगोळ मा ताकोंडीदुर. आंदुर जित्‍ता आगकु मसीह अन्द सांगुळ हजार वर्ष ताका राज्य माळतेला ईरूल. 5यागासताका ईव हजार वर्ष पुरा आगीदील आगासताका बाकी नोर सोतकु मंळसा जित्‍ता आगीदील. ईद रा पयला पुनरूत्थान हुन. 6धन्य अदिक पवित्र आव आन, जो ई पयला पुनरूत्थान इन भागी आर. हिंगुर मा दुसरा मृत्यु उन यातोदु अधिकार हैलेच, पर आंदुर परमेश्वर अदिक मसीह अन्द याजक आदार अदिक आऊन सांगुळ हजार साल ताका राज्य माळ्यार.

शैतान उन विनाश

7याग हजार साल पुरा आगेदव रा शैतान कैद टु बिळसुस्कु आगेदान. 8अद आ जातीगोळी जो धरती इन नाकु दी ईत्‍तीत, मतलब गोग अदिक मागोग इक यऊर्द गिनती समुद्र अन्द गागरा अन्द बराबर ईत्‍तीत, भरमुसकु लळाई इन साटी जमा माळली होट्टीत. 9अव सप्पा धरती मा फैलुसकु पवित्र लॉकुर्द छावनी अदिक प्रिय नगर इक घेर्स बुट्टाव; अदिक बेक्‍की स्वर्ग टु ईळुकु आंदरी भसम माळीत. 10आंदुर्द भरमुसावाळा शैतान बेक्‍की अदिक गन्धक इन आ झील दा, यदुर दा आ पशु अदिक ख्वाटा भविष्यवक्ता भी ईत्‍तान, हाकसुसकु आदार; अदिक आंदुर ईळ्लक हागुल हमेशा हमेशा दुख दा तळपुळस्त ईत्‍तार.

आखरी न्याय

11बाक ना ऊंद धोळ बिळीद सिंहासन अदिक आऊक, जो अदुर मा कुर्तकु आन, नोळदीन; आऊन मुंद टु पृथ्वी अदिक आकाश ओळेदव, अदिक आंदुर साटी जागा सिकिदील. 12बाक ना स्याणेर धोड्डेर सब सोतकु मंळसागोळ इक सिंहासन इन मुंद नीदुरकु नोळदीन, अदिक किताबगोळ खोल्सकु आदव; अदिक बाक ऊंद मात्‍त किताब खोल्सकु आत, मतलब जीवन इन किताब; अदिक ह्यांग आ किताबगोळ दा लिख्सकु ईरोद, हांग अच आंदुर क्याल्सागोळ्द अनुसार सोतकु मंळसागोळ्द न्याय माळकु आत. 13समुद्र आ सोतकु मंळसागोळ इक जो अदुर दा ईरव कोट बुळ्त, अदिक मृत्यु अदिक अधोलोक आ सोतकु मंळसागोळ इक जो अदुर दा ईरव कोट बुळ्त; अदिक आंदुर दा टु हर ऊंद मंळसा अक आंदुर क्याल्सागोळ अन्द अनुसार आंदुर न्याय माळकु आत. 14मृत्यु अदिक अधोलोक बेक्‍की इन झील दा हाक्‍कु आदव. ईद बेक्‍की इन झील दुसरा मृत्यु हुन; 15अदिक यारदारा हेसुर जीवन इन किताब दा लिख्सकु सिकतीदील, आव बेक्‍की इन झील दा हाक्‍कु आदुन.