प्रकाशितवाक्य 17

धोळ वेश्या

1या येळ स्वर्गदूतगोळ्द हात्‍ती अव येळ कटोरा ईरव, आंदुर दा टु ऊंद बंदकु नान से ईद अंदुन, “ईल बर, ना नीनी आ धोळ वेश्या अन्द दण्ड तोर्साईन, जो हापाळ सा नीर मा कुर्तकु आर, 2यार सांगुळ पृथ्वी इन राजागोळ व्यभिचार माळदुर; अदिक पृथ्वी इन ईरावाळेर आऊन व्यभिचार इन सारा देल मतवाला आगेगीदुर.” 31

आग आव नानी आत्मा दा आळी दी ओतुन, अदिक ना क्याचांद पशु मा, जो अपमान इन हेसुरगोळ देल तुमकु ईरोद अदिक यार येळ ताल्ला अदिक हत्‍त गॉट्टा ईरव, ऊंद आर्त इक कुर्तकु नोळदिन. 4ई आर्त जाभळा रंग इन अदिक क्याचांद रंग इन कपळा हाक्‍कु ईरोर, अदिक व्हान्ना अदिक किमती मणिगोळ अदिक मोतिगोळ देल सजुस्कु ईरोर, अदिक आकिन कय दा ऊंद व्हान्ना अन्द कटोरा ईरोद जो बेकार वस्तुगोळ देल अदिक आकिन व्यभिचार इन अशुध्द वस्तुगोळ देल तुमकु ईरोद. 5आकिन ह्याणा मा ई हेसुर लिख्सकु ईरोद, “भेद-धोळ बेबीलोन पृथ्वी इन वेश्यागोळ अदिक बेकार वस्तुगोळ्द मोय.” 6ना आ आर्त इक पवित्र लॉकुर्द रक्ता अदिक यीशु उन गवाहगोळ्द रक्ता कुळदुर देल मतवाला नोळदीन;

आकी नोळकु ना चकित आगेदीन. 7आग आ स्वर्गदूत नान से अंदुन, “नी येती चकित आद? ना ई आर्त अदिक आ पशु उक, यदुर मा आक सवार आर अदिक यार येळ ताल्ला अदिक हत्‍त गॉट्टा आव, नीनी भेद हेळतीन. 82

“जो पशु नी नोळया, अद पयला रा ईरोद पर ईग ईल्लच, अदिक अथाह अधोलोक दा टु होटकु विनाश दा बिद्दीत; अदिक पृथ्वी इन ईरावाळेर यार हेसुर दुनिया अन उत्पत्ति इन समय टु जीवन इन किताब दा लिख्सकु आगीदील, ई पशु उन ईद दशा नोळकु कि पयला ईरोद अदिक ईग ईल्लच अदिक बाक होट बंदीत, अचम्भा माळ्यार. 9आ बुद्धी इन साटी यारदा ग्यान आद, ईदा मवका आद: अव येळु ताल्ला येळ पहाळ हुव यार मा आ आर्त कुर्तकु आर. आंदुर येळ राजा भी उर. 10अव येळ राजा भी हुव, अईद रा आगेग्याव, अदिक ऊंद ईग आन, अदिक ऊंद ईग ताका बरली आन, अदिक याग बंदान रा येनारा समय ताका अदुर्द ईरोद भी जरूरी आद. 11जो पशु पयला ईरोन, अदिक ईग ईल्लच, आव खुद आठवा हुन अदिक आ येळु दा टु पैदा आदुन, अदिक विनाश दा बिद्दान. 12जो हत्‍त गॉट्टा नी नोळ्द अव हत्‍त राजा हुव यारी ईग ताका राज्य सिक्‍कीदील, पर आ पशु उन सांगुळ घळी तीमोर साटी राजागोळ घाई अधिकार सिक्‍कीत. 13ईव सप्पा ऊंद मन आदार, अदिक अव तान तान सामर्थ्य अदिक अधिकार आ पशु उक कोट्टार. 14अव मेमनागोळ देल लळाई माळ्याव, अदिक म्यांडा अन्द पाड्डा अऊर मा जय पाऊस्याव, यतिकी आव प्रभुगोळ प्रभु अदिक राजागोळ राजा हुव, अदिक जो कारूकु आग्याव अदिक निवळुस्कु आग्याव अदिक विश्वासी आव अव आऊन सांगुळ आव; आंदुर भी जय पाऊस्याव.”

15बाक आव नान से अंदुन, “जो नीर नी नोळ्द, यदुर मा वेश्या कुर्तकु आर, आंदुर रा लॉकुर अदिक भीळ अदिक जातीगोळ अदिक भाषागोळ हुव. 16जो हत्‍त गॉट्टा नी नोळ्द, अव अदिक पशु आ वेश्या देल दुश्मनी ईट्याव, अदिक आकी लाचार अदिक नंगा माळ बुट्टाव, अदिक आकिन मास तीन बुट्टाव, अदिक आकी बेक्‍की दा होताक बुट्टाव. 17यतिकी परमेश्वर आंदुर मन दा ईद हाक्यान कि आंदुर आऊन मनसा पुरा माळुल, अदिक यागासताका परमेश्वर उन वचन पुरा आगाल्द आगासताका ऊंद मन आगकु तान तान राज्य पशु उक कोटबुळी. 18आ आर्त, यारी नी नोळ्द, अद धोळ नगर हुन जो पृथ्वी इन राजागोळ मा राज्य माळतद.”