मीका 2

गरीबगोळ मा अत्याचार माळावाळेर्द धिक्कार

1हाय आंदुर मा, जो हासक्या मा बिदकु बुराई इन कल्पना अदिक दुष्ट कर्मगोळ्द इच्छा ईटतार, अदिक बलवान आगदुर कारण हुंजकुका अच आंदुर अवरी पुरा माळतार. 2आंदुर केई इन लालच माळकु अवरी कसु कोमतार, अदिक मान्नगोळ्द लालच माळकु अवरी भी ताकोम कोमतार; अदिक अदुर्द घराना समेत गंळ्सुर मा, अदिक आऊन खुद इन भाग समेत यावारा गंळ्स मा अंधार अदिक अत्याचार माळतार. 3ई कारण: यहोवा ईद अनतान: ना ई कूल मा ईत्ता विपत्ति हाकदुर मा आईन, यदुर ल्यालमा नीव तान म्याड्डा सरकुस सकतीदिल; न तान ताल्ला म्याकुच माळकु नळुसकतीदील; यतिकी अद विपत्ति इन समय ईत्तीत. 4आ समय ईद अत्यंत शोक इन हाळ दृष्‍टान्त इन रिती मा हाळकु आदीत: “नाम्द रा सर्वनाश आगेत; आव नान लॉकुर्द भाग इक बिगळुसतान; हाय, आव आऊक नान से याट दुर माळ बुळतान! आव नाम केईगोळ ध्वाका कोळावाळेरी कोट बुळतान. 5ई कारण नीनव हिंग याऊ ईरतीदील, जो यहोवा अन मंडली दा चिट्टी हाक्कु आळोद जाळी हाकुल.”

6बकवास माळावाळेर अनतोगतार, “बकवास माळबाळी! ई मातगोळ साटी अनतोगबाळी!” ईत्ता लॉकुर दा टु अपमान मिटुसतीदिल. 7हे याकूब उन घराना, येन ईद अंदकु आगुल कि यहोवा अन आत्मा धीरज काळ्दकु कुरताद? येन ई क्याल्सा आऊन अवा माळकु आग्याव? येन नान वचनगोळ देल आऊन भला आगाल्द जो सीधाई देल नळुतान? 8लेकीन नीन इन मात हुन कि नान प्रजा दुश्मन बन्सकु नान खिलाप येद्दाद; नीव शांत अदिक भोला भाला हादीवाळेर्द मय मा टु चद्दर जेडु कोमतीर जो लळाई इन विचार ईला माळकु बेधळक होगतार. 9नान प्रजा अन आर्तेरी नीव आंदुर्द सुखी मान्नागोळ दा टु तेगु कोमतीर; अदिक आंदुर्द श्याण चिकोर हात्ती टु नान कोळ्द उत्तम वस्तुगोळ हमेशा साटी कसु कोमतीर. 10येळी, होटोगी! यतिकी ईद नीम्द आराम इन जागा आल्लच; ईदुर्द कारण आ अशुद्धता हुन जो कठिन दुख इन सांगुळ नीम्द सर्वनाश माळीत. 11अगर यावारा ख्वाटा आत्मा दा नळुतेला ख्वाटा अदिक बेकार मातगोळ अनुल अदिक अनुल कि ना नीमी सारा अदिक हमेशा अंगुर इन रास्सा अन साटी प्रचार केळ्सतेला ईराईन, रा आवा ई लॉकुर्द भविष्यवक्ता ठहरूस्यान.

12हे याकूब, ना जरूर नीमी सप्पा मुंदुरी जमा माळाईन; ना इसत्राएल इन मिग्द लॉकुरी जरूर जमा माळाईन; अदिक क्वाटक्या अन आळ-मर्रीगोळ घाई सांगुळल्या ईटाईन. आ झुण्ड इन घाई जो वळ्लीद चराई दा ईरताव, व मंळसागोळ्द बहुतायत इन मारा देल हल्ला मचुस्याव. 13अऊर मुंद मुंद क्वाटक्या अक मुरावाळा होग्यान, इदुरसाटी अव भी अवरी मुरेत्याव, अदिक फाटक दा टु आगतेला होगेत्याव; अऊर राजा अऊर मुंद मुंद होदुन मतलब यहोवा अऊरव अगुवा हुन.