मत्ती 26

यीशु उन खिलाप साजीश

(मरकुस १४:१-२; लूका २२:१-२; यूहन्ना ११:४५-५३)

1याग यीशु इव सप्पा मात अंद बुट्टुन रा तान चेलागोळ से अनली कुरतुन, 2“नीव जान्सतीर कि येढ्ढ दिन इन बाद्दा फसह1 अन्द हाब्ब आद, अदिक मंळसा अन्द पार क्रूस मा येरसोर साटी हुळसुसकु आदान.”2

3आग प्रधान याजक अदिक प्रजा अन्द पुरनिए कैफा हेसुर इन महायाजक उन भवन दा जमा आदुर, 4अदिक आपस दा विचार माळली कुरतुर कि यीशु उक गुप्त तरीका देल हुळकु कोंद बुटेव. 5लेकीन आंदुर अनतोगोर, “हाब्बा अन समय दा ईला, ईलारा हिंग आगबाळुल कि लॉकुर दा दंगा फसाद आगेगुल.”

बैतनिय्याह दा यीशु उन अभिषेक

(मरकुस १४:३-९; यूहन्ना १२:१-८)

6याग यीशु बैतनिय्याह दा शमौन कोढ़ी इन मान्या ईरोन, 73रा ऊंद आर्त संगमरमर इन बाटुल दा बार्र ईत्‍तर हुळकु यीशु उन हात्‍ती बंदुर, अदिक याग आव ऊमोर साटी कुरतीदुन रा आऊन ताल्ला मा ऊलटुसदुर. 8ईद नोळकु आऊन चेलागोळी सिट्ट बत्‍त अदिक आंदुर अनली कुरतुर, “ई ईत्‍तर येती बरबाद माळकु आग्याद? 9इदरी रा वळ्लीद दाम दा मारकु कंगालगोळ दा वाटस्कु आग सकोद.”

10ईद जान्सकु यीशु आंदुर से अंदुन, “आ आर्त इक येती सतुसतीर? आक नान साटी भलाई इन क्याल्सा माळ्यार. 11कंगाल रा नीम सांगुळ हमेशा ईरतार, लेकीन ना नीम सांगुळ हमेशा ईर सकालीन. 12आक नान मय मा जो ईत्‍तर हाक्यार, अद नान सोत्‍तुर बाद्दा नळ्सकु आगोद तयारी हुन. 13ना नीम से खरा माताळतीन, कि सप्पा दुनिया दा येल्यारा भी ईद खुशखबरी प्रचार माळकु आदीत, अल आकिन ईद क्याल्सा अन्द वर्णन भी आकिन याद दा माळकु आदीत.”

यहूदा इस्करियोती इन विश्वासघात

(मरकुस १४:१०-११; लूका २२:३-६)

14आग यहूदा इस्करियोती, जो हन्नेळ चेलागोळ दा टु ऊंद ईरोन, प्रधान याजकगोळ्द हात्‍ती होदुन, 15अदिक आव अंदुन, “अगर ना आऊक नीम कय दा हुळसुस कोळाईन रा नानी येन कोट्टीर?” आंदुर आऊक तीस चाँदी नव सिक्‍कागोळ आळुकु कोट बुटुर. 16अदिक आव अदा समय टु आऊक हुळसुसोद सही मवका ढुंढ्सली कुरतुन.

चेलागोळ्द सांगुळ फसह हाब्ब इन आखरी भोज

(मरकुस १४:१२-२१; लूका २२:७-१३,२१-२३; यूहन्ना १३:२१-३०)

17अखमीरी रोट्टी इन हाब्बा इन पयला दिन, चेलागोळ यीशु उन हात्‍ती बंदकु केळली कुरतुर, “नी येन चाहासत्या कि नाव नींद साटी फसह तिनोद तयारी माळेव?”

18यीशु अंदुन, “नगर दा अमुक मंळसा अन्द हात्‍ती होगकु आऊन से अनी, ‘गुरु अनेत्यान कि नांद समय हात्‍ती आद. ना तान चेलागोळ्द सांगुळ नीन मान्या फसह हाब्ब मानसाईन.’”

19इदुरसाटी चेलागोळ यीशु उन आग्या स्वीकार माळदुर अदिक फसह तयार माळदुर.

20याग द्याव आत रा आव हन्नेळ चेलागोळ सांगुळ ऊमली कुरतीदुन. 21याग आंदुर तीनोर रा यीशु अंदुन, “ना नीम से खरा अनतीन कि नीम दा टु ऊंद नानी हुळसुस्यान.”

22इदुर मा आंदुर च्याच उदास आदुर, अदिक हर ऊंद चेला यीशु से केळली कुरतुन, “हे गुरु, येन आव ना हुईन?”

23यीशु उत्‍तर कोट्टुन, “आव जो नान सांगुळ तंळग्या दा ऊमतान, आवा नानी हुळसुसकु सोपस्यान. 24ना मंळसा अन्द पार ह्यांग नान बारा दा शास्त्र दा लिख्सकु आद, अद आदीत अच; लेकीन आ मंळसा अन्द साटी शोक आद याऊन द्वारा मंळसा अन पार हुळसुसकु आदान: अगर आ मंळसा अन्द जनम अच ईला आगाईत, रा आऊन साटी भला आगाईत.”4

25आग यीशु उक हुळसुसकु सौप्सावाळा यहूदा अंदुन, “हे गुरु, येन आव ना हुईन?”

यीशु आऊन से अंदुन, “नी रा अंदबुट.”

प्रभु भोज

(मरकुस १४:२२-२६; लूका २२:१४-२०; १ कुरिन्थि ११:२३-२५)

26“याग आंदुर ऊमोर रा यीशु रोट्टी ताकोंडुन, अदिक आशीष बेळकु मुरदुन, अदिक चेलागोळी कोटकु अंदुन, हुडी, तिनी; ईद नांद मय हुन.”

27बाक यीशु कटोरा हुळकु धन्यवाद माळदुन, अदिक आंदरी कोटकु अंदुन, “नीव सप्पा लॉकुर इदुर दा टु कुडी, 28यतिकी ईद वाचा अन्द नान अद रक्ता हुन, जो सप्पा लॉकुर पापगोळ माफ अन्द साटी वाहुसकु आगतद. 29ना नीम से खरा अनतीन कि अंगुर इन ईद रास्सा आ दिन ताका यागलु कुढ़ालीन, यागासताका नीम सांगुळ तान आप्प उन राज्य दा व्हाशोद रास्सा कुडू कोमालीन.”

30बाक आंदुर भजन हाळ्त-हाळ्त जैतून पहाळी मा होदुर.

पतरस उन इनकार इन भविष्यवाणी

(मरकुस १४:२७-३१; लूका २२:३१-३४; यूहन्ना १३:३६-३८)

31आग यीशु चेलागोळ से अंदुन, “नीव सप्पा मुंदुर ईंदल्या ईळ्लक इक नांद बारा दा ठोकर तिंदीर, यतिकी शास्त्र दा लिख्सकु आद: ‘ना चरवाह अक कोनाईन, अदिक झुण्ड इन म्यांडागोळ तितर-बितर आगेदव.’5 326लेकीन ना तान जित्‍ता आगदुर बाद्दा नीम से पयले गलील इक होगाईन.”

33इदुर मा पतरस यीशु से अंदुन, “अगर सप्पा मुंदुर नीन बारा दा ठोकर तिंदार रा तिंदार, लेकीन ना यागलु ठोकर तिनतीदील.”

34यीशु आऊन से अंदुन, “ना नीन से खरा अनतीन कि ईंदल्या ईळ्लकी हुंज इन कुग्गोर से पयले, नी मुर घन नांद इनकार माळ्या.”

35पतरस यीशु से अंदुन, “अगर नानी नीन सांगुळ सायोद भी बिद्दीत, तरी ना नींद यागलु इनकार माळतीदील.” अदिक हिंग अच सप्पा चेलागोळ भी अंदुर.

गतसमनी दा प्रार्थना

(मरकुस १४:३२-४२; लूका २२:३९-४६)

36आग यीशु तान चेलागोळ्द सांगुळ गतसमनी हेसुर इन ऊंद जागा दा बंदुन अदिक तान चेलागोळ से अनली कुरतुन, “ईल्या कुर्तकु ईरेतीर, आगासताका ना अल होगकु प्रार्थना माळतीन.” 37यीशु पतरस अदिक जब्दी इन येढ्ढु पारगोळी सांगुळ ओतुन, अदिक उदास अदिक व्याकुल आगली कुरतुन. 38आग यीशु आंदुर से अंदुन, “नान मन च्याच उदास आद. इल ताका कि नान जीव होळतेला आद. नीव ईल्या ठहरूसी अदिक नांद सांगुळ च्याता ईरी.”

39बाक यीशु थ्वाळासा मात्‍त मुंद होगकु बाय इन भार देल बिद्दुन, अदिक ईद प्रार्थना माळदुन, “हे नांद आप्पा, अगर आग सकुल रा ईद संकट नान मा टु टलसेगुल, तौभी ह्यांग ना चाहासतीन हांग ईला, लेकीन ह्यांग नी चाहासत्या हांग अच आगुल.”

40बाक यीशु चेलागोळ्द हात्‍ती बंदकु आंदरी मिंगतेला नोळदुन अदिक पतरस से अंदुन, “येन नीव नान सांगुळ ऊंद घळी भी च्याता ईला ईर सकीर? 41नीव परीक्षा दा बिळतीदील इदुरसाटी च्याता ईरी, अदिक प्रार्थना माळतेला ईरी: आत्मा रा तयार आद, लेकीन शरीर कमजोर आद.”

42बाक यीशु दुसरा बार होगकु ईद प्रार्थना माळदुन, “हे नांद आप्पा, अगर ईद नांद कुढा बिना ईला हट्सतीदाद रा नींद इच्छा पुरा आगुल.” 43आग यीशु बंदकु आंदरी मात्‍त मिंगतेला नोळदुन, यतिकी आंदुरव कण्णगोळ जप देल तुमकु ईरव.

44आंदरी बिटकु यीशु मात्‍त होटोदुन, अदिक अवा आवाजगोळ दा मात्‍त तीसरा बार प्रार्थना माळदुन. 45आग यीशु चेलागोळ्द हात्‍ती बंदकु आंदुर से अंदुन, “ईग मिंगतेला ईरी, अदिक आराम माळी: नोळी, घळी होट बंदाद, अदिक ना मंळसा अन्द पार पापीगोळ कय देल हुळसुसकु आगाईन. 46येळी, होगाता; नोळी, नानी ध्वाका देल हुळसुस्कु सौप्सावाळा नान हात्‍ती होट्ट बंदान.”

यीशु उन ध्वाका देल हुळसुसकु आगोद

(मरकुस १४:४३-५०; लूका २२:४७-५३; यूहन्ना १८:३-१२)

47यीशु ईद अनतेला अच ईरोन कि यहूदा जो हन्नेळ चेलागोळ दा टु ऊंद ईरोन बंदुन, अदिक आऊन सांगुळ प्रधान याजकगोळ अदिक लॉकुर्द पुरनियागोळ दी टु धोळ भीळ तलवारगोळ अदिक कोलगोळ हुळकु बंदुर. 48यीशु उक हुळसुसावाळा आंदरी ईद संकेत कोटीदुन: “यार्द ना चुम्मा ताकोमाईन आवा हुन; आऊक हुडु कोमेतीर.”

49अदिक तुरन्त यीशु उन हात्‍ती बंदकु अंदुन, “हे गुरु, नमस्कार!” अदिक आऊंद हापाळ चुम्मा ताकोंडुन.

50यीशु आऊन से अंदुन, “हे संगी, या क्याल्सा अन्द साटी नी बंद्या, अदरी माळकोम.”

आग आंदुर हात्‍ती बंदकु यीशु मा कय हाकदुर अदिक आऊक हुडुकोंडुर. 51यीशु उन संगीगोळ दा टु ऊंद संगी कय मुंद माळकु तान तलवार जेडु कोंडुन अदिक महायाजक उन दास मा नळ्सकु आऊन किव हार्स बुट्टुन. 52आग यीशु आऊन से अंदुन, “तान तलवार मयान दा ईट कोम यतिकी जो तलवार नळ्सतार आंदुर सप्पा मुंदुर तलवार देल नाश माळकु आदार. 53येन नी जान्साल कि ना तान आप्प उन से विनती माळ सकतीन, अदिक आव स्वर्गदूतगोळ्द हन्नेळ पलटन से यक्कुल नान हात्‍ती ईगल्या उपस्थित माळ बुटान? 54लेकीन पवित्रशास्त्र नव अव मातगोळ कि हिंग अच आगोद जरूरी आद, ह्यांग पुरा आदव?” 557

आ समय यीशु भीळ से अंदुन, येन नीव तलवारगोळ अदिक कोलगोळी हुळकु नानी डाकूगोळ घाई हुडुली होटीर? ना हर रोज मंदिर दा कुर्तकु उपदेश कोळतोगीन, आग रा नीव नानी हुळदिदील.

56“लेकीन ई सप्पा इदुरसाटी आग्याद कि भविष्यवक्तागोळ्द वचन पुरा आगुल.” आग सप्पा चेलागोळ यीशु उक बिटकु वोळेदुर.

महासभा अन्द मुंद यीशु

(मरकुस १४:५३-६५; लूका २२:५४-५५,६३-७१; यूहन्ना १८:१३-१४,१९-२४)

57आग यीशु उक हुडावाळेर आऊक कैफा हेसुर इन महायाजक उन हात्‍ती ओतुर, यल नियम इन गुरु अदिक पुर्वजगोळ जमा आगीदुर. 58पतरस दुर दुर टु उच आऊन हिंद-हिंद महायाजक उन आंगुळ ताका होदुन, अदिक बुळ्क होगकु यीशु उन अन्त नोळली सिपाहीगोळ सांगुळ कुरतोदुन. 59प्रधान याजक अदिक सप्पा महासभा यीशु उक कोन्नोर साटी आऊन विरोध दा ख्वाटा गवाही इन खोज दा ईरोर, 60लेकीन हापाळ सा ख्वाटा गवाहगोळ बंदुर मा भी आंदरी येनु हासिल आगीदील. आखरी दा येढ्ढ मुंदुर बंदुर, 618अदिक अंदुर, “ईव अंदान कि ना परमेश्वर उन मंदिर इक केडु सकतीन अदिक अदरी मुर दिन दा माळ सकतीन.”

62आग महायाजक नीदुरकु यीशु से अंदुन, “येती नी येनु उत्‍तर कोळाल? ई लॉकुर नीन विरोध दा येन गवाही कोळेत्यार?” 63लेकीन यीशु सुंगा ईत्‍तुन. आग महायाजक यीशु से अंदुन, “ना नीनी जित्‍ता परमेश्वर उन किर्‍या कोळतीन कि अगर नी परमेश्वर उन पार मसीह हुय, रा नाम से अंद बुळ.”

64यीशु आऊन से अंदुन, “नी रा खुद अच अंदबुट; लेकीन ना नीम से ईद भी अनतीन कि ईगी टु नीव मंळसा अन पार उक सर्वशक्तिमान उन ऊमा कय दी कुर्त, अदिक आकाश इन बादलगोळ मा बर्त नोळीर.”

65इदुर मा महायाजक तानव कपळा हरदुन अदिक अंदुन, “ईव परमेश्वर उन अपमान माळ्यान, ईग नामी गवाहगोळ्द येन जरवत आद? नोळी, नीव ईगल्या ईद अपमान केळीर! 66नीव येन सोचेतीर?”

आंदुर उत्‍तर कोट्टुर, “ईव मृत्यु दण्ड इन योग्य आन.”

67आग आंदुर यीशु उन बाय मा ऊगुळदुर अदिक आऊक बुक्‍की बळदुर, दुसरा लॉकुर क्याबरा बळकु अंदुर, 68“हे मसीह, नाम से भविष्यवाणी माळकु अन कि यार नीनी बळदुर?”

पतरस उन इनकार

(मरकुस १४:६६-७२; लूका २२:५६-६२; यूहन्ना १८:१५-१८,२५-२७)

69पतरस व्हार्या आंगुळ दा कुर्तकु ईरोन कि ऊंद दासी आऊन हात्‍ती बंदुर अदिक अंदुर, “नी भी यीशु गलीली इन सांगुळ ईर्या.”

70आव सप्पा मुंदुर्द मुंद ईद अनतेला इनकार माळदुन, “ना जान्सालीन नी येन अनीत्या.” 71याग आव व्हार्या दरवाजा मा होदुन, रा दुसरा दासी आऊक नोळकु आंदुर से अंदुर जो अल ईरोर, “ईव भी रा आ यीशु नासरी इन सांगुळ ईरोन.”

72आव किर्‍या तिनकु मात्‍त इनकार माळकु अंदुन: “ना आ मंळसा अक अरालीन.”

73घळी तिमुर बाद्दा लॉकुर जो अल नीदुरकु ईरोर, पतरस उन हात्‍ती बंदकु आऊन से अंदुर, “खराखुरा नी भी आंदुर दा टु ऊंद हुय, यतिकी नीन बोली भाषा नींद भेद खोल्स बुळतद.”

74आग आव मना माळली अदिक किर्‍या तिनली कुरतुन: “ना आ मंळसा अक अरालीन.” अदिक तुरन्त हुंज कुग्त. 75आग पतरस उक यीशु उन आ मात याद बत्‍त: “हुंज इन कुग्गोर से पयले नी मुर घन नान इनकार तुम्या.” अदिक आव व्हार्या होगकु हापाळ दुखी आगकु वर्लदुन.