मत्ती 21

यरूशलेम दा विजय प्रवेश

(मरकुस ११:१-११; लूका १९:२८-४०; यूहन्ना १२:१२-१९)

1याग आंदुर यरूशलेम इन हात्‍ती पोहचुसदुर अदिक जैतून पहाळ मा बैतफगे नगर इन हात्‍ती बंदुर, रा यीशु येढ्ढ चेलागोळी ईद अनकु कळुदुन, 2“मुंदळोद ऊर दा होगी. अल होगतेला ऊंद गधा कटकु, अदिक अदुर सांगुळ पाड्डा नीमी सिक्‍कीत. अवरी खोल्सकु नान हात्‍ती तरी. 3अगर नीम से यावारा येनारा अनुल, रा अनेतीर कि प्रभु अक ईऊर्द जरवत आद, आग आव तुरन्त अवरी कळु बुट्टान.” 4ईद इदुरसाटी आत कि जो वचन भविष्यवक्ता अन्द द्वारा अनकु आगीत, अद पुरा आगुल:

5“सिय्योन इन पोर इन से अनी,

‘नोळ, नीन राजा नीन हात्‍ती बरेत्यान;

आव नम्र आन, अदिक गधा मा कुर्तकु आन;

मतलब गधा इन पाड्डा मा.’”1

6चेलागोळ होगकु, ह्यांग यीशु आंदरी अंदिदुन, हांग अच माळदुर. 7अदिक गधा अदिक अदुर्द पाड्डा अक तनकु, अऊर मा तान कपळा हाकदुर, अदिक आव आ पाड्डा मा कुरतुन. 8आग हापाळ सा लॉकुर तान कपळा हादी मा हासदुर, अदिक दुसरा लॉकुर मार्रगोळ्द डगाली कडुकु हादी मा हासदुर. 9जो भीळ मुंद-मुंद होगतोगोद अदिक हिंद-हिंद बरतोगोद, कारू-कारूकु अनतोगोर, “दाऊद उन औलाद उक स्तुति, धन्य आन आव जो प्रभु उन हेसुर देल बरतान, दाऊद उन औलाद उन स्तुति आगुल.”

10याग यीशु यरूशलेम दा प्रवेश माळदुन, रा पुरा नगर दा हलचल मचुसेत, अदिक लॉकुर अनली कुरतुर, “ईव याव हुन?”

11लॉकुर अंदुर, “ईव गलील इन नासरत उन भविष्यवक्ता यीशु हुन.”

मंदिर इन शुद्धीकरण

(मरकुस ११:१५-१९; लूका १९:४५-४८; यूहन्ना २:१३-२२)

12यीशु परमेश्वर उन मंदिर दा होगकु आ सप्पा मुंदरी, जो मंदिर दा लेन-देन माळोर, तेग्द बुट्टुन, अदिक सर्राफागोळ्द पांळ्सीगोळ अदिक कबूतर मारावाळेर्द चौकिगोळ उलटुस बुट्टुन; 13अदिक आंदुर से अंदुन, “शास्त्र दा लिख्सकु आद, ‘नान मान्ना प्रार्थना अन्द मान्ना कहलुसीत,’ लेकीन नीव अदरी डाकूगोळ्द हड्डा माळतीर.”2

14आग कुढ्ढ अदिक लंगळागोळ, मंदिर दा आऊन हात्‍ती बंदुर, अदिक आव आंदरी चंगा माळदुन. 15लेकीन याग प्रधान याजकगोळ अदिक शास्त्रीगोळ ई अदभुत क्याल्सागोळी, जो आव माळदुन, अदिक चिकोर इक मंदिर दा “दाऊद उन औलाद उक स्तुति” अनतेला नोळदुर, रा आंदुर गुस्सा आदुर, 16अदिक आऊन से अनली कुरतुर, “सयेन नी केळत्या कि इंदुर येन अंतार?”

यीशु आंदुर से अंदुन, “हव; येन नीव ईद यागलु वाचुसीदील: चिकोर अदिक हाल कुडुत चिग्द उर बाय देल अपार स्तुति माळसुस्द?”

17आग यीशु आंदरी बिटकु नगर इन व्हार्या बैतनिय्याह अक होदुन अदिक अल आव ईळ्लक बितुसदुन.

यीशु द्वारा श्रापित अंजीर इन मार्र

(मरकुस ११:१२-१४; ११:२०-२४)

18व्हातर्या का याग यीशु नगर इक वापस बरोन रा आऊक हसु हत्‍त. 19हादी इन किनारा अंजीर इन ऊंद मार्र नोळकु यीशु अदुर हात्‍ती होदुन, अदिक याल्ला अक बिटकु अद मार्र मा मात्‍त येनु ईला ईरोद आव आ मार्र इक अंदुन, “ईग टु नीन दा बाक यागलु काय हततिदील.” अदिक अंजीर इन मार्र तुरन्त वंळगेत.

20ईद नोळकु चेलागोळी अचम्भा आत अदिक आंदुर अंदुर, “ईद अंजीर इन मार्र तुरन्त ह्यांग वंळगेत?” 213

यीशु आंदरी उत्‍तर कोट्टुन, “ना नीम से खरा अंतीन, अगर नीव विश्वास ईटी अदिक संदेह माळबाळी, रा न सिर्फ ईद माळेतीर जो ईद पहाळी इक भी अंदीर, ‘कित्‍तेग, अदिक समुद्र दा होगकु बिळ,’ रा ईद आगेदीत. 22अदिक जो येनारा नीव प्रार्थना दा विश्वास देल बेळतीर अद सब नीमी सिक्‍कीत.”

यीशु उन अधिकार मा प्रश्न

(मरकुस ११:२७-३३; लूका २०:१-८)

23यीशु मंदिर दा मात्‍त होगकु उपदेश कोळली कुरतुन, रा प्रधान याजकगोळ अदिक लॉकुर्द पुरनियागोळ आऊन हात्‍ती बंदकु केळदुर, “नी ईद क्याल्सा यार्द अधिकार देल माळत्या? अदिक नीनी ईद अधिकार याव कोटान?”

24यीशु आंदरी उत्‍तर कोट्टुन, “ना भी नीम से ऊंद मात केळतीन; अगर अद नानी हेळेतीर, रा ना भी नीमी हेळाईन कि ईव क्याल्सा यातोद अधिकार देल माळतीन. 25यूहन्ना अन्द बपतिस्मा यल टु ईरोद? स्वर्ग दी टु या मंळसागोळ दी टु?”

आग आंदुर आपस दा मातगोळ माळली कुरतुर, “अगर नाव अंदेव ‘स्वर्ग दी टु,’ रा आव नाम से अंदान, ‘बाक नीव आऊन विश्वास यती माळीदिल?’ 26अदिक अगर अंदेव ‘मंळसागोळ दी टु,’ रा नामी भीळ इन अंज्क आद, यतिकी आंदुर सप्पा यूहन्ना अक भविष्यवक्ता मान्सतार.” 27इदुरसाटी आंदुर यीशु उक उत्‍तर कोट्टुर, “नाव अरालेव.”

आव भी आंदुर से अंदुन, “रा ना भी नीमी हेळालीन कि ई क्याल्सा ना याता अधिकार देल माळतीन.

येढ्ढ पारगोळ्द उदाहरण

28“नीव येन सोचेतीर? यावारा मंळसा अन येढ्ढ पारगोळ ईरोर; आव पयला पार उन हात्‍ती होगकु अंदुन, ‘हे पारा, ईद अंगुर इन बेली दा क्याल्सा माळ.’ 29आव उत्‍तर कोट्टुन, ‘ना होग सकालीन,’ लेकीन बाद्दा पसतास्कु होदुन. 30बाक आप्प दुसरा पार उन हात्‍ती होगकु हिंग अच अंदुन, आव उत्‍तर कोट्टुन, ‘हव जी होगतीन,’ लेकीन होगीदिल. 31इंदुर येढ्ढु दा टु यार तान आप्प उन इच्छा पुरा माळदुर?”

आंदुर अंदुर, “पयला पार.”

यीशु आंदुर से अंदुन, “ना नीम से खरा अनतीन कि कर ताकोमावाळेर अदिक वेश्या नीम से पयले परमेश्वर उन राज्य दा प्रवेश माळतार. 324यतिकी यूहन्ना न्यायीपन इन हादी दर्शुसतेला नीम हात्‍ती बंदुन, अदिक नीव आऊन विश्वास माळीदील; पर कर ताकोमावाळेर अदिक वेश्यागोळ आऊन विश्वास माळदुर: अदिक नीव ईद नोळदीर, लेकीन नीव पश्चाताप माळीदील अदिक आऊन मा विश्वास माळीदील.”

दुष्ट किसानगोळ्द उदाहरण

(मरकुस १२:१-१२; लूका २०:९-१९)

33“मात्‍त ऊंद उदाहरण केळी: ऊंद केई इन मालिक ईरोन, आव अंगुर इन बेली हचीदुन, अदुर्द नाकु दी भाळा कटदुन, अदुर्दा रास्सा अन्द कुंड अगुळदुन अदिक मचान माळदुन, अदिक किसानगोळी अदुर्द ठ्याका कोटकु परदेश होटोदुन. 34याग काय इन समय हात्‍ती बत्‍त, रा आव तान दासगोळी अदुर्द काय तरोरसाटी किसानगोळ हात्‍ती कळुदुन. 35पर किसानगोळ आऊन दासगोळी हुडुकु, यारीकारा रा बळदुर, अदिक यारीकारा कोंद बुटुर, अदिक तिसरा अक कल्लगोळ बळदुर. 36बाक आव पयले टु यक्कुल अदिक दासगोळी कळुदुन, अदिक आंदुर आ दासगोळ सांगुळ भी हांग अच माळदुर. 37आखरी दा आव तान पार उक आंदुर हात्‍ती ईद सोचकु कळुदुन कि आंदुर नान पार उन आदर माळ्यार. 38लेकीन किसानगोळ पार उक नोळकु आपस दा अंदुर, ‘ईव रा वारीस हुन, बरी, ईऊक कोंद बुळाता अदिक ईऊन धन संपत्‍ती हुडु कोमाता.’ 39इदुरसाटी आंदुर आऊक हुळदुर अदिक अंगुर इन बेली टु व्हार्या तेगुकु कोंद बुटुर. 40इदुरसाटी याग अंगुर इन बेली इन मालिक बंदान, रा आ किसानगोळ सांगुळ येन माळ्यान?”

41आंदुर आऊन से अंदुर, “आव आ बुरा लॉकुरी बुरा रीति देल नाश माळ्यान; अदिक अंगुर इन बेली इन ठ्याका दुसरा किसानगोळी कोट्टान, जो उचित समय मा काय तनकु कोट्टार.”

42यीशु आंदुर से अंदुन, “येन नीव यागलु पवित्रशास्त्र दा ईद वाचुसीदील: ‘याता कल्ल इक राजमिस्त्रीगोळ बेकार ठहरूसेदुर, अदा कोना अन्द सिरा अन्द कल्ल आगेत? ईद प्रभु उन दी टु आगीत, अदिक नाम नजर दा अदभुत आद.’ 43इदुरसाटी ना नीम से अनतीन कि परमेश्वर उन राज्य नीम से ताकोमकु आदीत अदिक हिंग लॉकुरी कोटकु आदीत जो ईदुर प्रतिफल तरतार. 44जो ईद कल्ल मा बिद्दान आव चकनाचुर आगेदान; अदिक यदुर मा अद बिद्दीत, अदरी पीसुस बुट्टीत.”

45प्रधान याजक अदिक फरीसी यीशु उन उदाहरणगोळी केळकु समसेदुर कि आव आंदुर बारा दा अनतान. 46अदिक आंदुर आऊक हुडोद चाहासोर, लेकीन लॉकुर से अंजेदुर यतिकी आंदुर आऊक भविष्यवक्ता मान्सतोगोर.