मत्ती 13

बींजा बोऊसावाळा अन्द उदाहरण

(मरकुस ४:१-९; लूका ८:४-८)

1अदा दिशी यीशु मान्या टु होटकु झील इन किनारा मा होगकु कुरतुन. 21अदिक आऊन हात्‍ती हिंग धोळ्द भीळ जमा आत कि आव ड्वांगा मा येरेदुन, अदिक सप्पा भीळ किनारा मा निदुरकु ईत्‍त. 3अदिक आव आंदुर से उदाहरणगोळ दा हापाळ सा मातगोळी अंदुन:

“ऊंद बोऊसावाळा बींजा बोऊसली होट्टुन. 4बोऊसा होती थ्वाळासा बींजा हादी इन किनारा मा बिद्दव अदिक पक्षीगोळ बंदकु अवरी तिनली कुरतव. 5येनारा बींजा कल्ल इन जागा मा बिद्दव, यल अवरी यक्कुल मुण्ण सिकिदील अदिक गहरा मुण्ण ईला सिकदुर कारण अव जल्दी बेळदोदव. 6पर सुर्य होळदुर मा अव होत्‍तेदव, अदिक जळ ईला हुळदुर देल वंळ्गेदव. 7थ्वाळासा बींजा मार्र दा बिद्दव अदिक मार्रगोळ वाळुसकु अवरी वत्‍त बुट्टव. 8पर थ्वाळासा बींजा वळ्लीद जागा मा बिद्दव, अदिक काय तनदव, यातारा सौ गुणा, यातारा साठ गुणा, अदिक यातारा तीस गुणा.”

9यार किव आव आव केळ कोमुल.

उदाहरणगोळ्द उद्देश

(मरकुस ४:१०-१२; लूका ८:९,१०)

10चेलागोळ हात्‍ती बंदकु यीशु से अंदुर, “नी लॉकुर से उदाहरण दा येती मातगोळ माळत्या?”

11यीशु उत्‍तर कोट्टुन, “नीमी परमेश्वर उन राज्य अन्द भेदगोळ्द समझ कोटकु आग्याद, पर आंदरी ईला. 122यतिकी यार हात्‍ती आद, आऊक मात्‍त कोटकु आदीत, अदिक आऊन हात्‍ती यक्कुल आगेदीत; पर यार्द हात्‍ती येनु हैलेच, अदुर से जो येनारा आऊन हात्‍ती आद, अद भी ताकोमकु आगेदीत. 13ना आंदुर से उदाहरणगोळ दा इदुरसाटी मातगोळी माळतीन कि आंदुर नोळकु भी नोळालुर अदिक केळकु भी केळालुर, अदिक समसालुर.” 14आंदुर बारा दा यशायाह अन्द ईद भविष्यवाणी पुरा आगतद:

“नीव किवगोळ देल रा केळतीर, पर सम्सालीर;

अदिक कण्णगोळ देल रा नोळतीर, पर नीमी कांळ्साल.”3

15“यतिकी ई लॉकुर्द मन कट्टर आगेग्याद,

अदिक आंदुर केळकु भी अनसुना माळतार

अदिक आंदुर तान कण्णगोळी मुच्च बुळतार;

ईलारा हिंग आगबाळुल कि आंदुर कण्णगोळ देल नोळुल,

अदिक किवगोळ देल केळुल

अदिक मन देल समसुल,

अदिक आंदुर तिर्गकु बरूल,

अदिक ना आंदरी चंगा माळाईन.” 164

पर धन्य आव नीमव कण्णगोळ, कि अव नोळताव; अदिक नीमव किव अद केळताव. 17यतिकी ना नीम से खरा माताळतीन कि हापाळ सा भविष्यवक्तागोळ अदिक न्यायीगोळ याता मातगोळी नोळोद चाहासोर अवरी नीव नोळेतीर. लेकीन आंदुर अवरी नोळ सकिदील, अदिक याता मातगोळी आंदुर केळोद चाहासोर, अवरी नीव केळेतीर. लेकीन आंदुर अवरी केळ सकिदील.

बींजा बोऊसावाळा उदाहरण इन व्याख्या

(मरकुस ४:१३-२०; लूका ८:११-१५)

18“इग नीव बींजा बोऊसावाळा अन्द उदाहरण इन अर्थ केळी. 19जो यावारा राज्य अन्द वचन केळकु समसालुन, आऊन मन दा जो येनारा बोऊस्कु आगीत, अदरी आ दुष्ट बंदकु कसुकु वोयतान. ईद अदा हुन, जो हादी इन किनारा मा बोऊस्कु आगीत. 20अदिक जो कल्ल इन जागा मा बोऊस्कु आत, ईद अद हुन, जो वचन केळकु तुरन्त खुशी इन सांगुळ मान्स कोमतान. 21पर तांदुर दा जळ ईला ईटदुर कारण आंदुर थ्वाळासा अच दिनी नोर आर, अदिक याग वचन इन कारण क्लेश या उपद्रव आगतद, रा आंदुर तुरन्त ठोकर तिनतार. 22जो झाळीगोळ दा बोऊस्कु आत, ईद अद हुन, जो वचन इक केळतार, पर ईद दुनिया अन चिन्ता अदिक धन इन ध्वाका वचन इक वत्‍त बुळतद, अदिक आंदुर काय तरसकालुर. 23जो वळ्लीद जागा दा बोऊस्कु आत, ईद अद हुन, जो वचन इक केळकु सम्सतार, अदिक काय तरतार; यारारा सौ गुणा, यारारा साठ गुणा, अदिक यारारा तीस गुणा.”

आळी दाकळोद बींजा अन उदाहरण

24यीशु आंदरी मात्‍त ऊंद उदाहरण कोट्टुन: “स्वर्ग इन राज्य आ मंळसा अन्द घाई आद याव तान केई दा वळ्लीद बींजा बोऊस्दुन. 25पर याग लॉकुर मिंगोर रा आऊन दुश्मन बंदकु गोदी इन न्याड्या आळी दाकळोद बींजा बोऊस्कु होटोदुन. 26याग कोम होट्टव अदिक लॉम्बागोळ हतदव, रा आळी दाकळोद बींजागोळ्द मार्रगोळ भी कांळ्सदव. 27ईदुर मा मान्ना अन्द दासगोळ बंदकु आऊन से अंदुर, ‘हे स्वामी, येन नी तान केई दा वळ्लीद बींजा बोऊसीदिल? बाक आळी दाकळोद बींजा अन्द मार्रगोळ अदुर्दा यल टु बंदव?’ 28आव आंदुर से अंदुन, ‘ईद यावारा दुश्मन उन क्याल्सा हुन.’ दासगोळ आऊन से अंदुर, ‘येन नीन इच्छा आद, कि नाव होगकु अवरी कित बुटेव?’ 29आव अंदुन, ‘ईला, हिंग आगबाळुल कि आळी दाकळोद बींजा अन्द मार्रगोळ किता होती नीव अऊर सांगुळ गोदी भी कित कोमी. 30कटाई ताका येढ्ढु उक ऊंद सांगुळ वाळुसगोळी, अदिक कटनी इन समय दा ना कडावाळेर से अनाईन कि पयले आळी दाकळोद बींजा अन्द मार्रगोळी जमा माळकु होताकोर साटी अऊर गट्टा कट कोमी, अदिक गोदी इक नान केई दा जमा माळी.’”

राई इन बींजा अन्द उदाहरण

(मरकुस ४:३०-३२; लूका १३:१८,१९)

31यीशु आंदरी मात्‍त ऊंद उदाहरण कोट्टुन: “स्वर्ग इन राज्य राई इन ऊंद बींजा अन घाई आद, यदरी यातोवारा मंळसा हुडुकु तान केई दा बोऊस कोंडुन. 32अद सप्पा बींजागोळ से स्यांळ्द रा ईरतद लेकीन याग धोळ्द आगेगतद आग सप्पा काण्णा-कस से धोळ्द आगेगतद; अदिक हिंग मार्र आगेगतद कि आकाश ईनव पक्षी बंदकु अदुर डगालगोळ मा ग्वादा माळ कोमताव.”

खमीर इन उदाहरण

(लूका १३:२०,२१)

33यीशु आंदरी मात्‍त ऊंद उदाहरण केळ्सदुन: “स्वर्ग इन राज्य खमीर इन घाई आद यदरी यातोदारा आर्त हुडुकु हन्नेळ किलो हीट्ट दा मीलुस बुटुर अदिक आग्त-आग्त अद सप्पा हीट खमीर आगेत.”

यीशु उन द्वारा उदाहरणगोळ्द प्रयोग

(मरकुस ४:३३,३४)

34ईव सप्पा मातगोळ यीशु उदाहरणगोळ दा लॉकुर से अंदुन, अदिक बिना उदाहरण देल आव आंदुर से येनु ईला अनतोगोन, 35कि जो वचन भविष्यवक्ता अन्द द्वारा अंदकु आगीत, अद पुरा आगुल:

“ना उदाहरण अनली तान बाय खोलसाईन:

ना आ मातगोळी जो दुनिया अन्द उत्पत्ति टु होचकु ईताव प्रगट माळाईन.” 5

आळी दाकळोद बींजा अन्द उदाहरण इन व्याख्या

36आग यीशु भीळ इक बिटकु मान्नी बंदुन, अदिक यीशु उन चेलागोळ आऊन हात्‍ती बंदकु अंदुर, “केई इन आळी दाकळोद बींजा अन्द उदाहरण नामी समझुसबुळ.”

37यीशु आंदरी उत्‍तर कोट्टुन, “याव वळ्लीद बींजा अक बोऊसीदुन आव मंळसा अन्द पार हुन. 38केई दुनिया हुन, वळ्लीद बींजा राज्य अन्द औलाद हुन, अदिक आळी दाकळोद बींजा दुष्ट इन औलाद हुन. 39या दुश्मन अवरी बोऊस्यान आव शैतान हुन; कटनी दुनिया अन्द अन्त हुन, अदिक कडावाळेर स्वर्गदूत उर. 40इदुरसाटी ह्यांग आळी दाकळोद कचरा जमा माळकु होताक्‍कु आगताव हांग अच दुनिया अन्द आखरी दा आदीत. 41मंळसा अन्द पार तान स्वर्गदूतगोळ इक कळ्यान, अदिक आंदुर आऊन राज्य दा टु सप्पा ठोकर इन कारणगोळी अदिक कुकर्म माळावाळेरी इक जमा माळ्यार, 42अदिक आंदरी बेक्‍की इन कुण्ड दा हाक्यार, यल आंदुर वरल्यार अदिक हल्ल कच्यार. 43आ समय न्यायी तान आप्प उन राज्य दा सुर्य अन्द घाई चमकुस्यार. यार किव आव आव केळ कोमुल.”

होचकु खजाना अन्द उदाहरण

44“स्वर्ग इन राज्य केई दा होचकु धन इन घाई आद, या यावारा मंळसा अक सिक्त अदिक आव अदरी मात होचकु ईटदुन, अदिक हापाळ खुश आदुन अदिक होगकु तान सब येनारा मार बुट्टुन अदिक आ केई इक कोंड कोंडुन.”

अनमोल मोती अन्द उदाहरण

45“बाक स्वर्ग इन राज्य ऊंद व्यापारी इन घाई आद जो वळ्लीद मोतीगोळ्द खोज दा ईरोन. 46याग आऊक ऊंद बहूमुल्य मोती सिक्त रा आव होगकु तान सब कुछ मार बुट्टुन अदिक अदरी कोंड कोंडुन.”

जार इन उदाहरण

47“बाक स्वर्ग इन राज्य आ धोळ्द जार इन घाई आद जो समुद्र दा हाक्‍कु आत, अदिक हर प्रकार इन जीवगोळी जमा माळकु तर्त. 48अदिक याग जार मेनगोळ देल तुम्मेत, रा मेन हुडावाळेर अदरी किनारा मा जेडुकु तंदुर, अदिक कुर्तकु वळ्लेव-वळ्लेव बर्तनगोळ दा जमा माळदुर अदिक बेकार-बेकार मेनगोळी भीट बुटुर. 49दुनिया अन्द आखरी दा हिंग अच आदीत. स्वर्गदूत बंदकु पापीगोळी न्यायी लॉकुर से अलग माळ्यार, 50अदिक आंदरी बेक्‍की इन कुण्ड दा हाक्यार. यल आंदुर वरल्यार अदिक हल्ल कच्यार.”

हाळोद अदिक व्हाशोद शिक्षा अन्द महत्व

51यीशु तान चेलागोळ से केळदुन, “येन नीव ई सप्पा मातगोळ सम्सदीर?”

चेलागोळ उत्‍तर कोट्टुर, “हव.”

52यीशु आंदुर से अंदुन, “इदुरसाटी हर ऊंद शास्त्री जो स्वर्ग इन राज्य अन्द चेला बनस्यान, आव आ मान्नावाळा अन्द घाई आन जो ताम भंडार दा टु व्हाशोद अदिक हाळोद वस्तुगोळी तेगुतान.”

नासरत दा यीशु उन अनादर

(मरकुस ६:१-६; लूका ४:१६-३०)

53याग यीशु ई सप्पा उदाहरण अंद कोंडुन, रा अल टु होटोदुन. 54अदिक तान नगर दा बंदकु आंदुर्द यहूदी लॉकुर्द सभागृह दा आंदरी हिंग उपदेश कोळली कुरतुन कि आंदुर चकित आगकु अनली कुरतुर, “ईऊक ईद ग्यान अदिक सामर्थ्य अन्द क्याल्सा यल टु सिकदव? 55येन ईव व्हर्स हुळ्ली माळावाळा अन पार आलच? अदिक येन ईऊन मोय इन हेसुर मरियम अदिक ईऊन वार्टुर्द हेसुर याकूब, यूसुफ, शमौन अदिक यहूदा हैलेच? 56अदिक येन ईऊन सप्पा आकतींगेर नाम न्याड्या दा ईरालुर? बाक ईऊक ईद सप्पा ग्यान यल टु सिक्त?” 576ईद प्रकार आंदुर आऊन कारण ठोकर तिंदुर,

यीशु आंदुर से अंदुन, “भविष्यवक्ता अन्द तान द्याश अदिक तान मान्ना अक बिटकु अदिक यल उच अपमान आगाल.”7 58अदिक आव अल आंदुर्द अविश्वास इन कारण हापाळ सा सामर्थ्य इन क्याल्सा माळीदील.