परमेश्वर उन वचन
मरकुस 14
यीशु उक कोन्नोद योजना
(मत्ती २६:१-५; लूका २२:१-२; यूहन्ना ११:४५-५३)
येढ्ढ दिन इन बाद्दा फसह अदिक अखमीरी रोट्टी अन्द हाब्ब आगोद ईरोद. प्रधान याजक अदिक नियम इन गुरु ईद मात इन खोज दा ईरोर कि आऊक ह्यांग कपट देल हुळकु कोनदेव; लेकीन अनतोगोर, “हाब्ब इन रोज हिंग ईला, ईलारा लॉकुर दा झगळा आगेदीत.”
बैतनिय्याह नगर दा यीशु उन अत्तर देल स्वागत
(मत्ती २६:६-१३; यूहन्ना १२:१-८)
याग यीशु बैतनिय्याह दा शमौन कोढ़ी यारी कोढ़ इन रोग ईरोद आऊन मान्या ऊमली कुर्तकु ईरोन, आग ऊंद आर्त संगमरमर इन बाटुल दा जटामांसी अन्द बार्र शुद्ध अत्तर हुळकु बंदुर; अदिक बाटुल इक मुरूकु अत्तर इक यीशु उन ताल्ला मा लपटुसदुर. लेकीन यारारा यारारा तान मन दा कुळकुळुस्कु अनली कुरतुर, “ईद अत्तर इन येती सत्यानाश माळकु आत? इदुर मा यीशु अंदुन येती ईद अत्तर इक मुर सौ दीनार2 से यक्कुल बार्र दा मारकु कंगालगोळ दा वाटस्कु आग सकोद.” अदिक आंदुर आक इक दनकुस्ली कुरतुर.
यीशु अंदुन, “आकी बिट्ट बुळी; आकी येती सतुसतीर? आक रा नान सांगुळ भलाई माळदुर. कंगाल नीम सांगुळ हमेशा ईरतार, अदिक नीव याग चाहासीर आग आंदुर से भलाई माळ सकतीर; पर ना नीम सांगुळ हमेशा ईरतीदील. जो येनारा आक माळसकोर, आक माळदुर; आक नान नळसोद तयारी दा पयले टु ना नांद शरीर मा अत्तर मलुस्यार. ना नीम से खरा माताळतीन कि पुरा दुनिया दा येल्यारा भी खुशखबरी प्रचार माळदुर दा बंदीत, अल आक इन ईद क्याल्सा अन्द चर्चा भी आक इन याद दा माळकु आदीत.”
यीशु उन विश्वासघात माळोर साटी यहूदा अन्द सहमती
(मत्ती २६:१४-१६; लूका २२:३-६)
आग यहूदा इस्करियोती जो हन्नेळ चेलागोळ दा टु ऊंद ईरोन, प्रधान याजकगोळ हात्ती होदुन कि यीशु उक आंदुर्द कय देल हुळसुसकु आंदरी सौप्स बुळुल. आंदुर ईद केळकु खुश आदुर, अदिक आऊक पैस्या कोळोद स्वीकार माळदुर; अदिक आव मवका नोळोन कि आऊक ह्यांगारा भी प्रकार देल हुळसुसकु आंदुर्द कय दा सौप्स बुळुल.
चेलागोळ सांगुळ फसह अन्द आखरी भोज
(मत्ती २६:१७-२५; लूका २२:७-१४; २१–२३; यूहन्ना १३:२१-३०)
अखमीरी रोट्टी इन हाब्ब इन पयला दिन, यदुर्दा आंदुर फसह दा म्यांडा अन्द पाड्डा अन्द बलिदान माळतोगोर, यीशु उन चेलागोळ आऊक केळदुर, “नी येन चाहासत्या कि नाव होगकु नीन साटी फसह तिनोद तयारी माळेव?”
यीशु तान चेलागोळ दा टु येढ्ढ मुंदरी ईद अनकु कळुदुन, “नगर दा होगी, अदिक ऊंद मंळसा नीर इन माळका नेगुत नीमी सिक्यान, आऊंद हिंद आगेगेतीर; अदिक आव याता मान्या होदान, आ मान्ना अन्द मालिक से अनेतीर, ‘गुरु अनतान कि पाऊनागोळ्द ईरोद जागा पाऊनागोळ्द कमरा यल आद यदुर्दा ना तान चेलागोळ सांगुळ फसह तिनाईन अद जागा यल आद?’ आव नीमी ऊंद सजुस्कु सजुस्द, अदिक तयार माळ्द धोळ्द म्याकळोद ठिकान तोरस्यान, अल नाम साटी फसह तिनोद तयारी माळेतीर.”
चेलागोळ अल टु होट्टकु नगर दा बंदुर, अदिक ह्यांग यीशु आंदुर से अंदिदुन, हांग अच सिक्त; अदिक आंदुर फसह तिनोद तयारी माळदुर.
याग द्याव आत, रा आव हन्नेळ चेलागोळ सांगुळ बंदुन. याग आंदुर कुर्तकु ऊमोर, रा यीशु चेलागोळ से अंदुन, “ना नीम से खरा अनतीन कि नीम दा टु ऊंद, जो नान सांगुळ ऊमेत्यान, आव नानी ध्वाका देल हुळसुसकु दुश्मनगोळ कय दा सौप्स कोंडान.”
अदिक चेलागोळ मा उदासी छासेत अदिक आंदुर ऊंद ऊंद माळकु यीशु उक अनली कुरतुर, “येन आव ना हुईन?”
यीशु आंदुर से अंदुन, “आंदुर नीम हन्नेळ दा टु ऊंद आन, जो नान सांगुळ तंळग्या दा कय हाकतान. यतिकी ना मंळसा अन पार, ह्यांग नान बारा दा लिख्सकु आग्याद, लेकीन आ मंळसा अन मा हाय याऊन द्वारा ना मंळसा अन पार उक हुळसुसकु आदीत अदिक सौप्सकु आदीत! अगर आ मंळसा अन्द जनम अच ईला आगाईत, रा आऊन साटी भला आगाईत.”
प्रभु-भोज
(मत्ती २६:२६-३०; लूका २२:१४-२०; १ कुरिन्थि ११:२३-२५)
याग यीशु अदिक आऊन चेलागोळ ऊमतेला अच ईरोर, आव रोट्टी ताकोंडुन, अदिक परमेश्वर उक धन्यवाद कोटकु मुरदुन, अदिक आव चेलागोळी भी कोट्टुन, अदिक अंदुन, “हुडी, ईद नान शरीर हुन.”
बाक यीशु कटोरा हुळकु परमेश्वर उक धन्यवाद माळदुन, अदिक आंदरी कोट्टुन; अदिक आंदुर सप्पा मुंदुर अदुर दा टु कुळदुर. अदिक यीशु चेलागोळ से अंदुन, “अद नान खुन हुन, जो हापाळ मुंदुर साटी वाहुसकु आगतद,” ईद प्रमाणित माळतद कि परमेश्वर अदिक मंळसा अन न्याड्या व्हाशोद वाचा अक दर्शुसतद. “ना नीम से खरा अनतीन कि अंगुर इन रास्सा आ दिन ताका बाक यागलु कुडुतीदील, यागासताका परमेश्वर उन राज्य दा ना व्हाशोद अंगुर इन रास्सा ना कुडुतीदील.”
बाक आंदुर भजन हाळ हाळकु व्हार्या जैतून पहाळी मा होदुर.
पतरस उन इनकार इन भविष्यवाणी
(मत्ती २६:३१-३५; लूका २२:३१-३४; यूहन्ना १३:३६-३८)
आग यीशु चेलागोळ से अंदुन, “नीव नानी बिटकु ओळीर, यतिकी शास्त्र हिंग अच अनतद: ‘ना रखवाला अक कोनाईन, अदिक म्यांडा तितर-बितर आगेदव.’ 3लेकीन ना तान जित्ता आगदुर बाद्दा नीम से पयले गलील इक होगाईन.”
पतरस आऊन से अंदुन, “अगर सब नीनी बिट्टार रा बिट्टार, पर ना नीनी बिटकु होगालीन.”
यीशु आऊन से अंदुन, “ना नीन से खरा अनतीन कि ईंदल्या ईदा ईळ्लक इक हुंज इन येढ्ढ घन कुग्गोर से पयले, नी मुर घन नान इनकार माळ्या.”
बाक पतरस अदिक जोर कोटकु अंदुन, “अगर नानी नीन सांगुळ सायोद भी बिद्दीत, तरी ना नीन इनकार यागलु माळतीदील.”
ईदा प्रकार देल अदिक सप्पा मुंदुर भी अंदुर.
गतसमनी दा प्रार्थना
(मत्ती २६:३६-४६; लूका २२:३९-४६)
बाक यीशु अदिक आऊन चेलागोळ गतसमनी हेसुर इन ऊंद जागा दा बंदुर, अदिक आव तान चेलागोळ से अंदुन, “ईल कुर्तकु ईरी, आगासताका ना प्रार्थना माळतीन.” अदिक आव पतरस अदिक याकूब अदिक यूहन्ना अक तान सांगुळ ओतुन; अदिक च्याच दुखी अदिक व्याकुल आगली कुरतुन, अदिक आंदुर से अंदुन, “नान मन च्याच उदास आद, ईल ताका कि ना सायोर मा आईन: नीव ईल रूकसी, अदिक जाग्सतेला ईरी.”
बाक आव थ्वाळासा मुंद होदुन अदिक धरती मा बिदकु प्रार्थना माळली कुरतुन कि अगर आग सकुल रा ईद घळी नान मा टु टल्सेगुल, अदिक अंदुन, “हे बाबा, हे आप्पा, नीन से सप्पा येनारा आग सकतद; ईद दुख इन कटोरा अक नान हाती टु हटुसबुळ: तौभी ह्यांग ना चाहासतीन हांग ईला, पर जो नी चाहासत्या अदा आगुल.”
बाक यीशु वापस बंदुन अदिक नोळदुन कि मुरू चेलागोळ मिंगेग्यार ईद नोळकु पतरस से अंदुन, “हे शमौन, नी मिंगेत्या? येन नी ऊंद तास भी जाग्स सकिदील? जाग्सतेला अदिक प्रार्थना माळतेला ईरी कि नीव परीक्षा दा बिळबाळी. आत्मा अन्द रा इच्छा आद, पर मय कमजोर आद.”
अदिक यीशु बाक ओळेदुन अदिक अवा शब्दगोळ्दा प्रार्थना माळली कुरतुन. बाक यीशु बंदकु आंदरी मिंगत नोळदुन, यतिकी आंदुर अव कण्णगोळ जप देल तुमकु ईरव; अदिक ईला जान्सोर कि आऊक येन उत्तर कोट्टेव.
बाक यीशु तिसरा गन बंदकु आंदुर से अंदुन, “ईग भी नीव मिंगेतीर अदिक आराम माळेतीर? नोळी, घळी होट्ट बंदाद; नोळी ना मंळसा अन पार पापीगोळ्द कय देल हुळकु सौप्सकु आगाईन. येळी, होगाता! नोळी, नानी ध्वाका देल हुळसुस्कु सौप्सावाळा नान हात्ती होट्ट बंदान!”
यीशु उन ध्वाका देल हुळकु सौप्सकु आगोद
(मत्ती २६:४७-५६; लूका २२:४७-५३; यूहन्ना १८:३-१२)
यीशु ईद अनतेला अच ईरोन कि यहूदा जो हन्नेळ चेलागोळ दा टु ऊंद ईरोन, आऊन हात्ती बंदुन. अदिक तान सांगुळ प्रधान याजक अदिक शास्त्रीगोळ अदिक स्याणागोळ्द द्वारा ऊंद धोळ्द भीळ कळुकु आगीत, जो तलवार अदिक कोलगोळ हुळकु बंदीदुर. यीशु उक हुळसुस्कु सौप्सावाळा आंदरी ईद पता कोटीदुन कि याऊक ना चुम्मा ताकोमाईन आवा मंळसा हुन, आऊक हुळकु शंकलीगोळ देल कटकु सावधानी देल वयेतीर ताकी आव ओळ बाळुल.
यहूदा बंदुन, अदिक तुरन्त यीशु उन हात्ती होगकु अंदुन, “हे गुरु!” अदिक आऊन चुम्मा ताकोंडुन. आग आंदुर यीशु मा कय हाक्कु आऊक हुडुकोंडुर अदिक कठ कोंडुर. आंदुर दा टु जो हात्ती नीदुरकु ईरोर, ऊंद मंळसा तलवार जेळकु महायाजक उन सेवक मा नळ्सदुन, अदिक आऊंद किव हार्स बुट्टुन. यीशु आंदुर से अंदुन, “येन ना यावारा अपराधी हुईन, जो नानी हुडोर साटी तलवार अदिक कोलगोळ हुळकु बंदीर? 4ना रा हर रोज मंदिर दा नीम सांगुळ ईतकु उपदेश कोळतोगीन, अदिक आग नीव नानी हुळदीदिल: लेकीन ईद इदुरसाटी आग्याद कि शास्त्र अन्द मात पुरा आगुल.”
इव मातगोळ केळकु आऊन सप्पा चेलागोळ आऊक आबना बिटकु वोळेदुर.
ऊंद हारोदव पार तान दंगदंगा मय मा लुंगी होदुकु यीशु उन हिंद-हिंद होगोन; अदिक लॉकुर आऊक हुडोद कोशिश माळदुर. अदिक आव लुंगी बिटकु नंगा ओळेदुन.
यहूदीगोळ्द महासभा अन्द मुंद यीशु उक तरोद आत
(मत्ती २६:५७-६८; लूका २२:५४,५५,६३-७१; यूहन्ना १८:१३-१४; १९:२४)
बाक आंदुर यीशु उक महायाजक उन मान्नी तंदुर; अदिक सब प्रधान याजक अदिक स्याणा अदिक नियम इन गुरु आऊन मान्या जमा आगेदुर. पतरस दुर दुर टु आऊंद हिंद-हिंद महायाजक उन आंगुळ इन बुळ्क ताका होदुन, अदिक आव पहरेदारगोळ सांगुळ कुर्तकु बेक्की सेक्सली कुरतुन. प्रधान याजक अदिक सप्पा यहूदीगोळ्द महासभा यीशु उक कोंद बुळोरसाठी आऊंद विरोध दा गवाही इन खोज दा ईरोर, पर आऊंद विरोध दा यातोद भी सबुत सिकिदील. यतिकी हापाळ सा लॉकुर यीशु उन विरोध दा ख्वाटा गवाही कोळोर, पर आंदुर्द गवाही ऊंद सारखा ईला ईरोद.
आग येनारा लॉकुर यदकु यीशु उन खिलाप ईद ख्वाटा गवाही कोळली कुरतुर, 5“नाव ईऊक ईद अन्त केळेव, ना ईद मंळसागोळ्द कय देल माळ्द ईद मंदिर इक केळ्द बुळाईन, अदिक मुर दिन दा दुसरा माळाईन, जो मंळसागोळ्द कय देल माळकु ईरतीदील.” ईदुर मा भी आंदुर्द गवाही ऊंद सारखा होटीदिल.
आग महायाजक न्याड्या दा नीदुरकु यीशु से केळदुन, “नी येनु उत्तर कोळाल? ई लॉकुर नीन विरोध दा येन गवाही कोळतार?”
लेकीन यीशु सुंगा ईत्तुन, अदिक आव येनु उत्तर कोटीदील. महायाजक आऊन से मात्त केळदुन, “येन नी आ परमधन्य परमेश्वर उन पार मसीह हुय?”
यीशु अंदुन, हाव “ना हुईन: अदिक नीव मंळसा अन पार उक सर्वशक्तिमान इन ऊम्मा कय दी कुर्त, अदिक आकाश इन बादल इन सांगुळ बर्त नोळीर.”
आग महायाजक तानव फळक्या हरकु अंदुन, “ईग नामी यक्कुल गवाहगोळ्द येन जरवत आद?”
“येन नीव केळीदील, कि ईव परमेश्वर उन अपमान माळतान. ईग नीम्द येन राय आद?” आ सप्पा लॉकुर आऊक अपराधी ठहरूसतेला अंदुर, कि ईऊक जीव दण्ड सीक पायजे.
आग यारारा आऊन मा उगुळली कुरतुर, अदिक यारारा आऊन कण्णगोळ मा पट्टी कटकु आऊक बुक्का बडुली कुरतुर, अदिक आऊन से अनली कुरतुर, “भविष्यवाणी माळ.” नीनी यार बळदुर, अदिक पहरेदारगोळ आऊक हुळकु क्याबरा बळदुर.
पतरस उन यीशु उक इनकार माळोद
(मत्ती २६:६९-७५; लूका २२:५६-६२; यूहन्ना १८:१५-१८,२५-२७)
याग पतरस ल्यालमा आंगुळ दा ईरोन, रा महायाजक इन दासीगोळ दा टु ऊंद दासी अल बंदुर. अदिक आ दासीगीत पतरस उक बेक्की सेक्सत नोळकु आऊक टकटकी हचकु नोळदुर अदिक अनली कुरतुर, “नी भी रा आ नासरी यीशु उन सांगुळ ईर्या.”
अदिक आव बदलुसेदुन, अदिक अंदुन, “ना जान्सालीन अदिक ना सम्सालीन कि नी येन अनेत्या.” बाक आव अल टु दरवाजा ताका होदुन; अदिक आटा होती हुंज कुग्त.
आ दासी आऊक नोळकु आंदुर से अंदुर जो आऊन हात्ती नीदुरकु ईरोर, “ईव मंळसा आंदुर दा टु ऊंद हुन.”
लेकीन आव मात्त बदलुसेदुन. घळी तिमुर बाद्दा दा आंदुर जो हात्ती नीदुरकु ईरोर मात्त पतरस से अंदुर, “खरा दा नी आंदुर दा टु ऊंद हुय; यतिकी नी गलीली भी हुय.”
आग आव इनकार माळकु अनली कुरतुन कि ना किर्या तिनकु खरा अनतीन, “ना आ मंळसा अक, यार्द नीव मातचीत माळेतीर, ना अरालीन.”
बाक तुरन्त दुसरा घन हुंज कुग्त. अदिक पतरस उक अद मात जो यीशु आऊन से अंदिदुन याद बत्त: “हुंज इन येढ्ढ घन कुग्गोर से पयले नी मुर घन नान इनकार माळ्या.” अदिक आव ईद मात इक सोचकु आव वर्लली कुरतुन.
Source notes (5)
- Cross-reference लूका ७:३७,३८
- Footnote मुर सौ चाँदी नव सिक्का ऊंद वर्ष इन रोजी
- Cross-reference मत्ती २८:१६
- Cross-reference लूका १९:४७; २१:३७
- Cross-reference यूहन्ना २:१९
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.