मरकुस 10:45

छोळ चिट्ठी इन बारा दा यीशु उन शिक्षा

(मत्ती १९:१-१२; लूका १६:१८)

1बाक यीशु अल टु होटकु यहूदिया अन्द प्रदेश टु आगतेला यरदन गांगा अन क्षेत्र अन्द आप्पाटी बंदुन. अदिक भीळ मात्‍त आऊन हात्‍ती बंदकु जमा आगेत, अदिक आव तान रीति अन्द अनुसार आंदरी मात्‍त उपदेश कोळली कुरतुन.

2आग थ्वाळासा फरीसीगोळ आऊन हात्‍ती बंदुर अदिक आऊक फसुशोर कोशिश दा आऊन से केळदुर, नामी हेळ “येन ईद नियम इन अनुसार सही आद कि यावारा मंळसा अन साटी ईद उचित आद कि आव तान हिंग्स उक छोळ चिट्ठी कोळुल?”

3यीशु आंदरी उत्‍तर कोट्टुन, “मूसा नीमी यातोद नियम कोटान?” 41

आंदुर यीशु उक अंदुर, मूसा इजाजत कोटान कि ऊंद मंळसा छोळचिट्टी लिख्सकु तान हिंग्स उक बिळ सकतान.

5यीशु आंदुर से अंदुन, “मूसा नीम साटी ईद नियम लिखस्यान यतिकी नीमी कलसोद हापाळ मुश्किल आद. 6लेकीन ह्यांग शास्त्र दा लिख्सकु आद, सुरूवात दा परमेश्वर आंदरी गंळ्स अदिक आर्त इन रूप दा माळदुन.” 7ईद कारण देल ऊंद मंळसा तान मोय-आप्प उक बिटकु तान हिंग्स उन सांगुळ ईत्‍तान. 8अदिक आंदुर येढ्ढु मुंदुर ऊंद तन आदार; इदुरसाटी आंदुर ईग येढ्ढ ईला पर ऊंद तन आर. 9इदुरसाटी आंदुर ईग येढ्ढ ईला, लेकीन ऊंद तन आर. इदुरसाटी यारीक परमेश्वर जोळस्यान, अदरी यावारा भी मंळसा अलग माळबाळुल.

10याग आंदुर बाक मान्या वापस बंदुर आग चेलागोळ इदुर बारा दा यीशु उक मात्‍त केळदुर. 112आव आंदुर से अंदुन, ऊंद मंळसा जो तान पयला हिंग्स उक छोळ चिट्ठी कोळतान अदिक दुसरा आर्त इन से मदा माळतान, रा आव तान पयला हिंग्स उन खिलाप व्यभिचार माळतान. 12अदुर्दा घाई, ऊंद आर्त तान गांड्ड उक छोळ चिट्ठी कोळतार, अदिक दुसरा मंळसा से मदा माळतार रा आक तान पयला गांड्ड उन खिलाप व्यभिचार माळतार.

यीशु उन चिकोरगोळी आशिर्वाद

(मत्ती १९:१३-१५; लूका १८:१५-१७)

13बाक लॉकुर चिकोरी यीशु उन हात्‍ती तरली कुरतुर कि आव आंदुर मा कय ईटुल, पर चेलागोळ लॉकुरी दनकुसदुर. 14याग यीशु ईद नोळदुन रा सिट्टी बंदुन अदिक तान चेलागोळ से अंदुन, “चिकोरी नान हात्‍ती बरगोळी आंदरी मना माळबाळी, यतिकी परमेश्वर उन राज्य इंदुर्दा हुन. 153ना नीम से खरा अनतीन कि जो यावारा परमेश्वर उन राज्य चिकोर घाई हासिल माळालुन, रा आव परमेश्वर उन राज्य दा यागलु उच दाखल आग सकालुन.” 16आग यीशु आ चिकोरी क्वारा दा हुळदुन, अदिक आंदुर मा तान कय ईटकु आंदरी आशिर्वाद कोट्टुन.

धनी मंळसा

(मत्ती १९:१६-३०; लूका १८:१८-३०)

17याग यीशु अल टु होटकु हादी मा टु होगोन, रा ऊंद मंळसा आऊन हात्‍ती ओळतेला बंदुन, अदिक आऊन मुंद ट्वांगरा टेक्सकु आऊन से केळदुन, “हे वळ्लेव गुरु, अनन्त जीवन हासिल माळोर साटी नानी येन माळोद बिद्दीत?”

18यीशु आ धनी मंळसा से अंदुन, “नी नानी वळ्लेव येती अनत्या? परमेश्वर उन अलावा यारू वळ्लेव हैलेच. 19नी परमेश्वर उन आग्यागोळी जान्सत्या: ‘यारीकु कोन्न बाळी, व्यभिचार माळबाळी, चोरी माळबाळी, यारदारा खिलाप ख्वाटा गवाही कोळबाळी, बयमानी माळबाळी, तान आप्प अदिक तान मोय इन आदर माळी.’”

20आ मंळसा यीशु से अंदुन, “हे गुरु, ना रा स्याणपणी टु ईव सप्पा मातगोळ्द पालन माळतेला बंदीन.”

21यीशु आऊक प्यार देल नोळदुन अदिक अंदुन, “नीन दा ईग भी ऊंद मात इन कमी आद जो येनारा नीन हात्‍ती आद, अदरी मारकु अव पैस्या गरीब लॉकुर दा वाट्स बुळ. नीनी स्वर्ग दा धन सिक्‍कीत, अदिक बंदकु नान हिंद आगेग.” 22याग आ मंळसा ई मातगोळी केळदुन रा आऊन मार्रा अन्द नीर हारेत अदिक आव उदास आगेदुन, यतिकी आव हापाळ धनी ईरोन.

23यीशु नाकु दी नोळकु तान चेलागोळ से अंदुन, “आ लॉकुर साटी, यार्द हात्‍ती धन आद, आंदरी परमेश्वर उन राज्य दा प्रवेश माळोद याट कठिन आद!”

24चेलागोळ आऊन मातगोळ देल अचम्भित आदुर. इदुर मा यीशु मात्‍त आंदरी अंदुन, “हे चिकोरगोळा, जो धन मा भरोसा ईटतार, आंदुर साटी परमेश्वर उन राज्य दा प्रवेश माळोद याट कठिन आद! 25परमेश्वर उन राज्य दा धनवान उन प्रवेश माळदुर देल ऊँट इन मुग्ग दा टु चुजी होटबुळोद आसान आद!”

26इदुर मा चेलागोळ हापाळ चकित आगेदुर अदिक आबुर दाबुर से केळली कुरतुर, “रा बाक यार्द उद्धार आग सकतद?”

27यीशु आंदुर दी नोळकु अंदुन, “ईद मंळसागोळ साटी असंभव आद, लेकीन परमेश्वर उन साटी सब येनारा सम्भव आद; यतिकी परमेश्वर से सब येनारा आग सकतद.”

28आग पतरस यीशु उक अनली कुरतुन, “नोळ, नाव रा सप्पा येनारा बिटकु नीन हिंद आगेगेव.”

29यीशु अंदुन, “ना नीम से खरा अनेतीन कि हिंग यारू हैलेच, जो नान साटी अदिक खुशखबरी इन साटी मान्ना या वार्टुरी या आकतींगेरी या मोय या आप्प या चिकोर-चिंळ्गेर या केईगोळी बिट बुटीदान, 30ई वर्तमान युग दा यक्कुल हापाळ हासिल माळ्यार. आंदुर सौ गुणा यक्कुल मान्ना, वार्टुर, आकतींगेर, मोयगोळ, चिकोर अदिक केईगोळी हासिल माळ्यार. अदिक अऊर सांगुळ हापाळ दुखगोळी भी, अदिक बरावाळा युग दा आंदुर अनन्त जीवन हासिल माळ्यार. 314पर हापाळ सा लॉकुर जो पयला आर, आंदुर हिंदळोर आदार; अदिक जो हिंदळोर आर, आंदुर पयला आदार.”

तान सायोद बारा दा यीशु उन तिसरा भविष्यवाणी

(मत्ती २०:१७-१९; लूका १८:३१-३४)

32यीशु अदिक आऊन चेलागोळ ईग यरूशलेम इक होगोद हादी मा ईरोर. यीशु तान चेलागोळ से मुंद-मुंद होगोन, चेलागोळ घबरूसकु ईरोर अदिक जो लॉकुर आऊन हिंद-हिंद नळोर आंदुर अंजकु ईरोर. ऊंद घन मात्‍त यीशु तान हन्नेळ चेलागोळी अलग वोतकु आंदुर से अव मातगोळी अनली कुरतुन, जो आऊन सांगुळ आगव ईरव. 33आव आंदुर से अंदुन, “केळी, नाव यरूशलेम इक होगेतेव, अदिक मंळसा अन पार प्रधान याजकगोळ अदिक नियम उन शास्त्रीगोळ कय दा कोटकु आदान, अदिक आंदुर आऊक कोन्नोर साटी आऊन मा दोष हच्यार, अदिक आंदुर आऊक गैरयहूदीगोळ कय दा कोट्टार. 34आंदुर आऊन मज्याक हारस्यार, आऊन मा ऊगळ्यार, आऊक क्वाळागोळ देल बळदार, आऊक जान देल कोंद बुट्टार, अदिक मुर दिन इन बाद्दा आव जित्‍ता आदान.”

याकूब अदिक यूहन्ना अन्द विनती

(मत्ती २०:२०-२८)

35आग जब्दी इन पार याकूब अदिक यूहन्ना यीशु उन हात्‍ती बंदुर अदिक अंदुर, “हे गुरु, नाव चाहासतेव कि जो येनारा नाव नीन से बेळेव, अद नी नाम साटी माळेत.”

36यीशु आंदुर से अंदुन, “नीव येन चाहासतीर कि ना नीम साटी माळाईन?”

37आंदुर यीशु से अंदुर, “नामी ईद अधिकार कोळ कि नीन महिमा दा याग नी सिंहासन मा कुरत्या, रा नाव चाहासतेव कि नाम दा टु ऊंद नीन ऊमा कय दी अदिक दुसरा अपमान डाक्या कय दी कुरूल.” 385

लेकीन यीशु आंदुर से अंदुन, “नीव जान्सालीर कि नीव येन बेळेतीर. जो दुख इन प्याला ना कुडावाळा आईन, येन नीव कुडू सकतीर? अदिक जो बपतिस्मा ना ताकोमावाळा आईन येन नीव ताकोम सकतीर?”

39आंदुर आऊन से अंदुर, “नाम से आग सकतद.” यीशु आंदुर से अंदुन, जो दुख इन प्याला ना कुडावाळा आईन,

नीव कुळदीर अदिक जो बपतिस्मा ना ताकोमावाळा आईन अदरी ताकोंडीर. 40लेकीन नान अधिकार दा ईलच कि याव नान ऊमा कय दी अदिक डाक्या कय दी कुरतान. परमेश्वर यार साटी ईद तयार माळदुन, आंदरी बिटकु अदिक यारीकु तान ऊमा कय दी अदिक तान डाक्या कय दी कुरसोद नान क्याल्सा आलच.

41दुसरा हत्‍त चेलागोळ ईद केळदुर रा आंदुर याकूब अदिक यूहन्ना देल नाराज आदुर! 426इदुरसाटी यीशु आ सप्पा मुंदरी हात्‍ती कारूकु आंदुर से अंदुन, नीव जान्सालीर कि जो गैर यहूदीगोळव शासक सम्सतार इंदुर आंदुर मा प्रभुता माळतार; अदिक आंदुर्दा जो धोड्डेर आर, आंदुर मा अधिकार जतुसतार, ईद नीव जान्सालीर. 437पर नीम दा हिंग हैलेच, जो यावारा नीम दा धोड्डेव आगोद चाहासतान, रा नीमी बाकी लॉकुर्द सेवक आग पायजे; 44अदिक जो यावारा नीम दा प्रधान आगोद चाहासतान, आव नीम सप्पा मुंदुर दास आगुल. 45यतिकी ना मंळसा अन पार इदुरसाटी बंदिदील कि नान स्यावा माळुल, पर ना इदुरसाटी बंदीन कि नीम्द सप्पा मुंदुर्द स्यावा माळाईन, अदिक लॉकुर अव पापगोळ छुटकारा अन्द साटी तान जीवन कोळ सकाईन!

कुढ्ढ बरतिमाई इक कण्ण इन ज्योत कोळोद

(मत्ती २०:२९-३४; लूका १८:३५-४३)

46बाक यीशु अदिक आऊन चेलागोळ यरीहो दा बंदुर, अदिक याग आव अदिक आऊन चेलागोळ ऊंद धोळ्द भीळ इन सांगुळ यरीहो दा टु होगोर, आग ऊंद कुढ्ढ भिखारी, यार्द हेसुर तिमाई नव पार बरतिमाई ईरोद, सळक इन किनारा मा कुर्तकु ईरोन. 47आव ईद केळकु कि यीशु नासरी हुन, कारू-कारूकु अनली कुरतुन, “हे दाऊद उन पारा यीशु नान मा दया माळ!”

48आग हापाळ मुंदुर आऊक दनकुसदुर कि सुंगा ईर. पर आव यक्कुल जोर देल कारूली कुरतुन, “हे दाऊद उन पारा नान मा दया माळ!”

49आग यीशु निदुरकु अंदुन, “आऊक कारी.” अदिक लॉकुर आ कुढ्ढ मंळसा अक कारूकु आऊन से अंदुर.

हिम्मत ईट, येळ! आव नीनी कारेत्यान!

50आव तान कपळा भिटकु तुरन्त येद्दुन, अदिक यीशु उन हात्‍ती बंदुन.

51इदुर मा यीशु आऊन से अंदुन, “नी येन चाहासत्या कि ना नीन साटी माळाईन?”

कुढ्ढ मंळसा आऊन से अंदुन, “हे गुरु, ना पयले घाई नोळोद चाहासतीन.”

52यीशु आऊन से अंदुन, “होटोग, नीन विश्वास नीनी वळ्लीद माळबुटाद.”

आव तुरन्त नोळली कुरतुन, अदिक हादी मा आऊन हिंद आगेदुन.