लूका 5

यीशु उन द्वारा पयला चेलागोळी कारोद आत

(मत्ती ४:१८-२२; मरकुस १:१६-२०)

11

याग भीळ परमेश्वर उन वचन केळोर साटी आऊन मा बिळली आगतोगोद, अदिक यीशु गन्नेसरत इन झील इन किनारा मा नीदुरकु ईरोन, रा हिंग आत 2कि आव झील इन किनारा दा येढ्ढ ड्वांगागोळी हतकु ईरव अवरी नोळदुन, अदिक मेन हुडावाळेर अऊर मा टु ईळुकु जार तोळोर. 3आ ड्वांगागोळ दा टु ऊंद मा, जो शमौन उन ईरोद, येरकु यीशु आऊन से विनती माळदुन कि किनारा टु थ्वाळासा सरकुसकु नळु. आग आव कुर्तकु लॉकुरी ड्वांगा मा टु उपदेश कोळली कुरतुन.

4याग यीशु उन मातगोळ हेळकु आदव रा आव शमौन उक अंदुन, “खोल नीर दा होग, अदिक मेन हुडोर साटी तान जार हाक्‍क.” 52

शमौन यीशु उक उत्‍तर कोट्टुन, “हे स्वामी, नाव पुरा ईळ्लक तीम मेहनत माळदेव अदिक येनु सिक्‍कीदील; तरी नीन कयना देल ना जार हाकतीन.” 63याग आंदुर हिंग माळदुर, रा हापाळ मेनगोळ जार दा बंदव, अदिक आंदुर्द जार हरूली कुर्त. 7इदुर मा आंदुर तान संगीगोळी जो दुसरा ड्वांगा मा ईरोर, आंदरी कारदुर कि बंदकु नाम मदत माळी, अदिक आंदुर बंदकु येढ्ढु ड्वांगागोळी इल ताका तुमदुर कि आ ड्वांगागोळ मुळ्कली कुरतव. 8ईद चमत्कार नोळकु शमौन पतरस यीशु उन काल मा बिद्दुन अदिक अंदुन, “हे प्रभु, नान हात्‍ती टु होटोग, यतिकी ना पापी मंळसा आईन!”

9यतिकी ईस मेनगोळ हुळदुर देल आऊक अदिक आऊन संगीगोळी हापाळ अचम्भा आत, 10अदिक हांग अच जब्दी इन पार याकूब अदिक यूहन्ना अक भी, जो शमौन उन भागीदार ईरोर, अचम्भा आत. आग यीशु शमौन से अंदुन, “अंजबाळ; ईगी टु नी मंळसागोळी परमेश्वर उन राज्य दा तंद्या.”

11अदिक आंदुर ड्वांगागोळी किनारा मा तंदुर अदिक सप्पा येनारा बिटकु आऊन हिंद होटोदुर.

यीशु उन द्वारा कोढ़ इन रोगी इक चंगा माळोद

(मत्ती ८:१-४; मरकुस १:४०-४५)

12ऊंद घन याग यीशु यातोदारा तरी नगर दा ईरोन, आग आऊन हात्‍ती ऊंद मंळसा बंदुन; यारी कोढ़ इन रोग हतकु ईरोद, आव यीशु उक नोळकु आऊन काल मा बिद्दुन, अदिक विनती माळदुन, “हे प्रभु, अगर नी चाहास्या रा नानी शुद्ध माळ सकत्या.”

13यीशु कय मुंद माळकु आऊक मुटदुन अदिक अंदुन, “ना चाहसतीन, कि नी शुद्ध आगेग.” अदिक आऊन कोढ़ इन रोग तुरन्त दूर आगेत. 14यीशु आऊक आग्या कोट्टुन, “यारीकु हेळबाळेत, लेकीन होगकु तान तान इक याजक उक तोर्स, अदिक तान शुद्ध आगोद बारा दा जो येनारा मूसा नीनी आग्या कोटान अदरी भेंट येर्स कि आंदुर मा गवाही आगुल.”

15लेकीन यीशु उन चर्चा दुर दुर ताका फैलुस्तेला होगोद, अदिक भीळ इन भीळ आऊन मातगोळ केळोर साटी अदिक तान बिमारीगोळ देल चंगा आगोर साटी जमा आत. 16लेकीन आव आळीगोळ दा येल्यारा भी ब्यार्र होगकु प्रार्थना माळतोगोन.

यीशु उन द्वारा लकवा अन्द रोगी इक चंगा माळोद

(मत्ती ९:१-८; मरकुस २:१-१२)

17ऊंद दिन हिंग आत कि यीशु उपदेश कोळोन, अदिक फरीसी अदिक व्यवस्थापक अल कुर्तकु ईरोर जो गलील अदिक यहूदिया अन्द हर ऊंद ऊरा टु अदिक यरूशलेम टु बंदीदुर, अदिक चंगा माळोर साटी प्रभु उन सामर्थ्य यीशु उन सांगुळ ईरोद. 18आ समय हापाळ लॉकुर ऊंद मंळसा अक जो लकवा अन्द रोगी ईरोन, व्हर्स मा नेगुकु तंदुर, अदिक आंदुर आऊक बुळ्क वयली अदिक यीशु उन मुंद ईटोद उपाय ढुढ़सोर. 19पर याग भीळ इन कारण आऊक बुळ्क वोय सकिदील रा आंदुर मान्ना मा येरकु अदिक खपरेल सरकुसकु, आऊक व्हर्स सांगुळ न्याड्या दा यीशु उन मुंद ईळ्स बुटुर. 20आग यीशु आंदुर विश्वास नोळकु आऊन से अंदुन, “हे मंळसा, नीन पाप माफ आदव.”

21आग नियम इन गुरु अदिक फरीसी तान तान मन दा विचार माळली कुरतुर, “ईव याव हुन? जो परमेश्वर उन अपमान माळतान! परमेश्वर उक बिटकु अदिक याव पापगोळी माफ माळ सकतान?”

22यीशु आंदुर मन इन मातगोळ जान्सकु, आंदुर से अंदुन, “नीव तान तान मन दा याता मात इन विचार माळेतीर? 23आसान येन आद? येन ईद अनोद कि ‘नीन पाप माफ आदव,’ या ईद अनोद कि ‘येळ अदिक टेटाळ?’ 24लेकीन इदुरसाटी कि नीव जान्स कोमी कि ना मंळसा अन पार उक पृथ्वी मा पाप माफ माळोद भी अधिकार आद.” बाक यीशु आ लकवा अन्द रोगी से अंदुन, “ना नीन से अनतीन, येळ अदिक तान व्हर्स नेगुकु तान मान्नी होटोग.”

25आव तुरन्त यीशु ऊंद मुंद येद्दुन, अदिक या व्हर्स मा आव बिदकु ईरोन अदरी नेगुकु, परमेश्वर उन बळाई माळतेला तान मान्नी होटोदुन. 26आग सप्पा लॉकुर चकित आदुर अदिक परमेश्वर उन बळाई माळली हतदुर अदिक हापाळ अंजतेला अनली कुरतुर, “ईंद नाव अदभुत क्याल्सागोळी नोळेव!”

यीशु लेवी इक कारदुन

(मत्ती ९:१-८; मरकुस २:१-१२)

27इदुर बाद्दा यीशु व्हार्या होदुन अदिक लेवी हेसुर इन ऊंद कर ताकोमावाळा अक कर ताकोमोद चौकी मा कुर्तकु नोळदुन, अदिक आऊन से अंदुन, “नान हिंद आगेग.” 28आग लेवी सब येनारा बिटकु येद्दुन, अदिक आऊन हिंद आगेदुन.

29आग लेवी तान मान्या आऊन साटी ऊंद धोळ्द भोज ईटदुन; अदिक कर ताकोमावाळेर्द अदिक दुसरा लॉकुर्द जो आऊन सांगुळ ऊमली कुर्तीदुर, ऊंद धोळ्द भीळ ईरोद. 304ईदुर मा फरीसी अदिक आंदुर नियम इन गुरु आऊन चेलागोळ से ईद अंदकु बळबुळस्ली कुरतुर, “नीव कर ताकोमावाळेर अदिक पापीगोळ्द सांगुळ येती तीनतीर अदिक कुडुतीर?”

31यीशु आंदरी उत्‍तर कोट्टुन, “वैद्य भला चंगागोळ साटी ईला, लेकीन बिमारगोळ साटी जरूरी आन. 32ना न्यायीगोळी ईला, लेकीन पापीगोळ्द पापगोळी पश्चाताप माळसुसोर साटी कारूली बंदीन.”

उपास इन प्रश्न

(मत्ती ९:९-१३; मरकुस २:१३-१७)

33आंदुर यीशु उक अंदुर, “बपतिस्मा कोळावाळा यूहन्ना अन्द चेलागोळ रा बराबर उपास ईटतार अदिक प्रार्थना माळतार, अदिक हांग अच फरीसी नोर चेलागोळ भी, लेकीन नीन चेलागोळ रा तीनतार अदिक कुडुतार.”

34यीशु आंदुर से अंदुन, “येन नीव वरातीगोळ से, यागासताका मंळगार आंदुर सांगुळ ईत्‍तान, उपास माळसुस सकतीर? बिलकुल ईला! 35लेकीन अव दिन बंदाव, याग मंळगार आंदुर से ब्यार्र माळकु आदान, आग आंदुर आ दिनगोळ दा उपास माळ्यार.”

36यीशु मात ऊंद उदाहरण भी आंदु़र से अंदुन: “यावारा मंळसा क्वारा व्हाशोद कपळा हरूकु हाळोद कपळा दा थिगर हचालुन, ईलारा व्हाशोद कपळा हर्दोदित अदिक आ थिगर हाळोद कपळा दा मेल भी तिनतीदील. 37अदिक यावारा मंळसा व्हाशोद अंगुर इन रास्सा हाळोद तोगुल इन चिला दा तुम्मालुन, ईलारा व्हाशोद अंगुर इन रास्सा तोगुल इन चिलागोळी वळकु चेल्लेदित, अदिक तोगुल इन चिलागोळ्द भी नाश आगेदीत. 38लेकीन व्हाशोद अंगुर इन रास्सा व्हाशोद तोगुल इन चिला दा अच तुम्म पायजे. 39यतिकी मंळसा हाळोद अंगुर इन रास्सा कुडुकु व्हाशोद रास्सा अन्द इच्छा माळालुन यतिकी आव अनतान, कि हाळोद रास्सा अच वळ्लीद आद.”