लूका 23

पिलातुस उन मुंद यीशु

(मत्ती २७:१,२,११-१४; मरकुस १५:१-५; यूहन्ना १८:२८-३८)

1आग सप्पा सभा यदकु यीशु उक पिलातुस उन हात्‍ती ओतुर. 2आंदुर ईद अनकु आऊन मा दोष हचली कुरतुर: “नाव ईऊक यहूदी लॉकुरी बयकुस्त, अदिक रोमन सम्राट उक कर कोळोद से मना माळ्त, अदिक तान तान इक मसीह, अन राजा अनतेला केळेव.”

3पिलातुस यीशु उक केळदुन, “येन नी यहूदीगोळ्द राजा हुय?”

यीशु आऊक उत्‍तर कोट्टुन, “नी खुद अच अनेत्या.”

4आग पिलातुस प्रधान याजकगोळ अदिक लॉकुर से अंदुन, “ना ई मंळसा अन्द बुळ्क यातोदु दोष नोळालीन.”

5लेकीन आंदुर मात्‍त यक्कुल यकीन देल अनली कुरतुर, “ईव गलील टु ईल ताका, सप्पा यहूदी प्रदेश दा उपदेश कोट कोटकु लॉकुरी भळकुस्तान.”

हेरोदेस उन मुंद यीशु

6ईद केळकु पिलातुस केळदुन, “येन ईव मंळसा गलीली हुन?” 7अदिक याग पिलातुस ईद जान्सदुन कि आव हेरोदेस उन रियासत ईनव हुन, रा आऊक हेरोदेस उन हात्‍ती कळु बुट्टुन, यतिकी आ दिनगोळ दा हेरोदेस भी यरूशलेम दा ईरोन. 8हेरोदेस यीशु उक नोळकु हापाळ खुश आदुन, यतिकी आव हापाळ दिनी टु आऊक नोळोद चाहासोन; यतिकी हेरोदेस आऊन बारा दा केळीदुन, अदिक आऊन से येनारा चमत्कार नोळोद आशा ईटोन. 9आव आऊन से हापाळ सा प्रश्न केळ्त ईत्‍तुन, पर आव आऊक येनु उत्‍तर कोटीदील. 10प्रधान याजक अदिक नियम इन गुरु निदुरकु आऊन मा गंभीर आरोप हचतेला ईत्‍तुर. 11आग हेरोदेस तान सिपाहीगोळ्द सांगुळ आऊन अपमान माळकु आऊक मज्याक दा हार्सदुन, अदिक सुंदर कपळा हाकसुस्कु आऊक पिलातुस उन हात्‍ती कळु बुट्टुन. 12अदा दिशी पिलातुस अदिक हेरोदेस संगी आगेदुर; इदुर से पयले आंदुर आबुर दाबुर्द दुश्मन ईरोर.

पिलातुस द्वारा यीशु उक मृत्यु दण्ड

(मत्ती २७:१५-२६; मरकुस १५:६-१५; यूहन्ना १८:३९–१९:१६)

13पिलातुस प्रधान याजकगोळ अदिक सरदारगोळ अदिक लॉकुरी कारदुन, 14अदिक आंदुर से अंदुन, “नीव ई मंळसा अक लॉकुरी बयकुसावाळा सम्सकु नान हात्‍ती तंदीर, अदिक नोळी, ना नीम मुंद आऊन जाँच माळदीन, लेकीन या मातगोळ्द नीव आऊन मा दोष हचेतीर आ मातगोळ्द बारा दा रा ना आऊन बुळ्क दा येनु अच दोष नोळीदील; 15अदिक ना रा हेरोदेस राजा आऊन दा येनारा दोष नोळदुन, यतिकी आव आऊक नाम हात्‍ती कळु बुट्टुन; अदिक नोळी, आऊन से हिंग यातोदु दोष आगीदील कि आऊक मृत्यु दण्ड कोटकु आगुल. 16इदुरसाटी ना आऊक बळसुस्कु बिट बुळतीन.” 17यतिकी आ हाब्ब इन समय दा पिलातुस उक आंदुर साटी ऊंद बंदी इक बिळोद बिळतोगोद1.

18आग सप्पा मुंदुर गुट माळकु चिळ्लासकु येद्दुर, “ईऊक कोंद बुळ, अदिक नाम साटी बरअब्बा अक बिट बुळ!” 19बरअब्बा दंगा फसाद इन कारण जो नगर दा आगीत, अदिक हत्या अन्द कारण बंदीगृह दा हाक्‍कु आगीदुन.

20लेकीन पिलातुस यीशु उक बिळोद इच्छा देल लॉकुरी मात्‍त समजुसदुन, 21लेकीन आंदुर मात्‍त चिल्ळास्कु अंदुर, “आऊक क्रूस मा येर्स, क्रूस मा!”

22आव तिसरा घन आंदुर से अंदुन, “येती, आव याता गुणा माळ्यान? ना आऊन बुळ्क मृत्यु दण्ड इन लायक यातोदु दोष नोळीदील. इदुरसाटी ना आऊक क्वाळा बळसुस्कु बिट बुळतीन.”

23लेकीन आंदुर चिल्ळास-चिल्ळास्कु आऊन हिंद हत्‍तेदुर कि आऊक क्रूस मा येर्सकु आगुल, अदिक आखरी दा आंदुर्द चिल्ळासोद सफल आगेत. 24इदुरसाटी ह्यांग लॉकुर चाहासदुर हांग अच पिलातुस आंदुर मांग इन अनुसार सहमती कोट्टुन. 25आव आ मंळसा अक जो दंगा फसाद अदिक हत्या अन्द कारण बंदीगृह दा हाक्‍कु आगीदुन, अदिक यारी आ लॉकुर बेळोर, आऊक बिट बुट्टुन; अदिक यीशु उक आ लॉकुर्द इच्छा अन्द अनुसार सौप्स बुट्टुन, कि आंदुर जो चाहस्यार अद आऊन सांगुळ माळ सकुल.

यीशु उक क्रूस मा येरसोद

(मत्ती २७:३२-४४; मरकुस १५:२१-३२; यूहन्ना १९:१७-२७)

26याग आंदुर यीशु उक ओयोर, रा आंदुर शमौन हेसुर इन ऊंद कुरेनी मंळसा जो नगर दी टु बरोन, आऊक हुडुकु आऊन मा क्रूस मंळ्स बुटुर कि आऊक यीशु ऊंद हिंद-हिंद वोय सकुल.

27लॉकुर्द धोळ्द भीळ आऊन हिंद आगेत अदिक अदुर्दा हापाळ सा आर्तेर भी ईरोर जो आऊन साटी याद्दा-पिटसोर अदिक विलाप माळतोगोर. 28यीशु आंदुर दी तिर्गकु अंदुन, “हे यरूशलेम इन पोरगोळा, नान साटी वर्लबाळी; लेकीन तान अदिक तान चिकोरगोळ साटी वर्ली. 29यतिकी नोळी, अव दिन बरताव, या दिन दा लॉकुर अंदार, ‘धन्य आर आंदुर जो वांझला आर अदिक अव गर्भ जो हाळदिदील अदिक अव स्तन जो हाल कुळसिदील.’ 302आ समय ‘आंदुर पहाळीगोळ से अंदार कि नाम मा बिळी, अदिक ट्याकरागोळ से अंदार कि नामी मुच्च बुळी.’ 31यतिकी याग आंदुर हिवरा मार्र इन सांगुळ हिंग माळतार, रा वंळगींद मार्र इन सांगुळ येन-येन माळतीदील?”

32आंदुर अन्य येढ्ढ मंळसागोळी जो अपराधी ईरोर आंदरी भी यीशु उन सांगुळ कोनली ओतुर. 33याग आंदुर आ जागा यारी खोपळी अनतार होदुर, रा आंदुर अल यीशु उक अदिक आ अपराधीगोळी भी, ऊंद मंळसा अक ऊमा कय दी अदिक दुसरा मंळसा अक डाक्या कय दी क्रूसगोळ मा येर्सदुर. 34आग यीशु अंदुन, “हे आप्पा, इंदरी माफ माळ, यतिकी इंदुर जान्सालुर कि इंदुर येन माळीत्यार.”

अदिक आंदुर चिट्ठी गोळी हाक्‍कु आऊन कपळा वाट्स कोंडुर. 35लॉकुर निदुर-निदुरकु नोळोर, अदिक सरदार भी मज्याक माळ माळकु अनतोगोर: “ईव दुसरा अक ऊळ्सदुन, अगर ईव परमेश्वर उन मसीह हुन, अदिक आऊन निवळुसदव हुन, रा तान तान इक ऊळ्स कोमुल.”

36सिपाही भी हात्‍ती बंदकु अदिक केय हुळ्लग अंगुर इन रास्सा कोटकु आऊन मज्याक हार्सकु अनतोगोर, 37“अगर नी यहूदीगोळ्द राजा हुय, रा तान तान इक ऊळ्स!”

38अदिक आऊन म्याकुच ऊंद दोष चिट्ठी भी हच बुटुर: “ईव यहूदीगोळ्द राजा हुन.”

39जो अपराधीगोळ अल लटकुसकु आगिदुर, आंदुर दा टु ऊंद अपराधी यीशु उन अपमान माळकु अंदुन, “येन नी मसीह आलच? रा बाक तान तान इक अदिक नामी ऊळ्स!”

40ईदुर मा दुसरा अपराधी आऊन मा चिळ्लासकु अंदुन, “येन नी परमेश्वर से भी अंजाल? नीनी भी रा अदा दण्ड सिक्‍केत्याद, 41अदिक नामी रा न्यायनुसार दण्ड सिकेत्याद, यतिकी नामी तान क्याल्सागोळ्द बराबर फल सिकेत्याद; लेकीन ईव रा यातोदु अपराध माळीदिल.” 42आग आव अंदुन, “हे यीशु, याग नी तान राज्य दा बंद्या, रा नांद याद माळेत.”

43यीशु आऊन से अंदुन, “ना नीन से खरा माताळतीन कि ईंदल्या अच नी नान सांगुळ सुखदलोक दा ईत्या.”

यीशु उन जीव त्यागसोद

(मत्ती २७:४५-५६; मरकुस १५:३३-४१; यूहन्ना १९:२८-३०)

44ईग ईद हागुल इन लगभग हन्नेळ मुरांद समय ईरोद अदिक हागुल इन मुर मुरास ताका सप्पा द्याश दा अंधार आगकु ईत्‍त, 45अदिक सुर्य अन्द उजुळ होग्त ईत्‍त, अदिक मंदिर इन परदा न्याड्या दा टु हरदोत, 46अदिक यीशु धोळ्द आवाज देल कारूकु अंदुन, “हे आप्प, ना तान आत्मा नीन कय दा सौप्सतीन.” अदिक ईद अंदकु सोतोदुन.

47सिपाहीगोळव अधिकारी, जो येनारा आगीत नोळकु परमेश्वर उन स्तुति माळदुन, अदिक अंदुन, “निश्चय ई मंळसा न्यायी ईरोन.”

48अदिक भीळ जो ई येनारा आगीत नोळली जमा आगीत, ई घटना अक नोळकु याद्दा बडुत वापस होटोत. 493लेकीन आऊनोर सप्पा जान पयचान वाळेर, अदिक जो आर्तेर गलील टु आऊन हिंद बंदीदुर, दुर निदुरकु ई सप्पा नोळोर.

यीशु उक नळसोद

(मत्ती २७:५७-६१; मरकुस १५:४२-४७; यूहन्ना १९:३८-४२)

50अल यूसुफ हेसुर ईनव महासभा अन्द ऊंद वळ्लीद सदस्य ईरोन जो सज्जन अदिक न्यायी ईरोन. 51अदिक आंदुर्द फैसला देल अदिक आंदुर्द ई क्याल्सा देल सयमत ईला ईरोन. आव यहूदीगोळ्द अरिमतिया नगर इन ईरावाळा अदिक परमेश्वर उन राज्य अन्द हादी कायावाळा ईरोन. 52आव पिलातुस उन हात्‍ती होगकु यीशु ऊंद लाश बेळदुन; 53अदिक आग यीशु उक क्रूस मा टु ईळ्सकु मलमल इन चद्दर दा गुंळ्सदुन, अदिक ऊंद कब्र दा ईटदुन, जो कल्ल इन जागा दा अगुळकु ईरोद; अदिक आ जागा दा यावारा अक भी यागलु ईटकु आगीदील. 54अद तयारी इन दिन ईरोद, अदिक आराम इन दिन सुरू आगोद ईरोद.

55मरियम मगदलीनी जो यीशु उन सांगुळ गलील टु बंदीदुर, यूसुफ उन हिंद हिंद होगकु आ कब्र अक नोळदुर, अदिक ईद भी नोळदुर कि आऊन लाश इक याता रीति देल ईटकु आग्याद. 56आग आंदुर वापस मान्या बंदकु सुगन्धित अत्‍तर अदिक मसालागोळ तयार माळदुर; अदिक आराम इन दिन आंदुर आग्या अन्द अनुसार आराम माळदुर.