लैव्यव्यवस्था 23

हाब्ब इन विधिगोळ

1बाक यहोवा मूसा से अंदुन, 2“इस्राएलीगोळ से अन कि यहोवा अन्द हाब्ब अदुर दा नीम इक पवित्र सभा जमा माळोर साटी ठहरूस्कु समय मा प्रचार माळोद बिद्दीत, नांद अव हाब्ब ईव हु.” 3“आर दिन क्याल्सा धंदा माळकु आगुल, लेकीन येळवा दिन परम आराम इन अदिक पवित्र सभा अन्द दिन हुंद; अदुर दा यातोदारा प्रकार इन क्याल्सा धंदा माळकु आगबाळुल; अद नीम्द सप्पा मान्नागोळ दा यहोवा अन्द आराम दिन ठहरूसुल.

फसह अदिक अखमीरी रोट्टी

(गिनती 28:16-25)

4“बाक यहोवा अन्द पर्व अदुर दा टु ऊंद-ऊंद मंळसा अन्द ठहरूस्द समय दा नीमी पवित्र सभा माळोर साटी प्रचार माळोद बिद्दीत अव ईव हूँ. 5पयला तिंगुळ इन चौदावा दिन इक द्यावगा अन्द समय यहोवा अन्द फसह आगतेला ईरूल. 6अदिक अदा तिंगुळ इन पन्द्रहवा दिन इक यहोवा अन्द साटी अखमीरी रोट्टी इन पर्व आगतेला ईरूल; अदुर दा नीव येळ दिन ताका अखमीरी रोट्टी तिनतेला ईरेतीर. 7अदुर दा टु पयला दिन नीम्द पवित्र सभा आगुल; अदिक आ दिशी कष्ट इन यातोदारा क्याल्सा माळबाळेतीर. 8अदिक येळवा दिशी नीव यहोवा अक होमबली येर्सेतीर; अदिक येळवा दिन पवित्र सभा आगुल; आ दिशी कष्ट इन यातोदारा क्याल्सा माळबाळेतीर.” 9बाक यहोवा मूसा से अंदुन, 10“इस्राएलीगोळ से अन कि याग नीव आ द्याश दा प्रवेश माळी यारी यहोवा नीमी कोळतान अदिक अदुर दा टु केई कढी, आग तान-तान हण्ण केई इन पयला उपज इन फसल याजक उन हात्ती तरेतीर; 11अदिक आव आ पेंड़ी इक यहोवा अन्द मुंद हालुसुल कि अद नीम्द निमित्त ग्रहण माळकु आगुल; याजक अदरी आराम दिन इन दुसरा दिशी हालुसुल. 12अदिक या दिशी नीव आ पेंड़ी इक हालुसीर अदा दिशी ऊंद वर्ष इन तंदरूस्त म्यांडा अन्द पाड्डा यहोवा अन्द साटी होमबली येर्सेतीर. 13अदिक अदुर सांगुळ अन्नभेट एपा अन्द येढ्ढ हतवा अंश याण्णा हचकु मैदा अन्द ईरूल अद होमबली सुखदायक सुगन्ध इन साटी यहोवा अन्द साटी पेयबली आगुल; अदिक अदुर सांगुळ इन अर्घ हीन भर इन चौथाई भाग अंगुर इन रास्‍सा ईरूल. 14अदिक यागासताका ई चढ़ावा अक नीव तान परमेश्वर उन हात्ती वोयतीदिल, आ दिन ताका व्हाशोद केई दा टु रोट्टी तिनबाळेतीर अदिक सुटकु अन्न अदिक हिवरा लॉम्बा तिनबाळेतीर; ईद नीम्द पीढ़ी-पीढ़ी दा नीम्द पुरा घरानागोळ दा हमेशा अन्द विधी ठहरूसुल.

कडोद हाब्ब

(गिनती 28:26-31)

15“बाक आ आराम दिन इन दुसरा दिन टु, मतलब या दिशी नीव हालुस्कु आगोद भेंट इन फसल इक तरेतीर, आ दिन टु पुरा येळ आराम दिन आळकोमेतीर; 16येळवा आराम दिन इन अगला दिन ताका पचास दिन आळेतीर, अदिक पचासवा दिन यहोवा अन्द साटी व्हाशोद अन्नभेट येर्सेतीर. 17नीव तान मान्नागोळ दा टु एपा अन येढ्ढ हतवा अंश मैदा अन्द येढ्ढ रोट्टीगोळ इक हालुसोद भेंट इन साटी तरेतीर; अव खमीर इन सांगुळ कासकु आगुल, अदिक यहोवा अन्द साटी पयला फसल ठहरूसुल. 18अदिक आ रोट्टी इन सांगुळ ऊंद-ऊंद वर्ष इन येळ तंदरूस्त म्यांडा अन्द पाड्डा, अदिक ऊंद पाड्डा, अदिक येढ्ढ म्यांडागोळ येर्सेतीर; आंदुर तान-तान सांगुळ अन्नभेट अदिक अर्घ सांगुळ यहोवा अन्द साटी होमबली इन घाई येर्सकु आगुल, मतलब अव यहोवा अन्द साटी सुखदायक सुगन्ध कोळावाळा बली ठहरूसुल. 19बाक पापबली इन साटी ऊंद व्हात, अदिक मेलबली इन साटी ऊंद-ऊंद वर्ष इन म्यांडा अन्द पाड्डा येरसुल. 20आग याजक आंदरी पयला उपज इन रोट्टी सांगुळ यहोवा अन्द मुंद हालुसोद भेंट इन साटी हालुसुल, अदिक ई रोट्टीगोळ्द सांगुळ अव येढ्ढ म्यांडा अन्द पाड्डागोळ भी हालुस्कु आगुल; अव यहोवा अन्द साटी पवित्र, अदिक याजक उन भाग ठहरूसुल. 21अदिक नीव आ दिशी ईद प्रचार माळेतीर, कि ईंद नाम्द ऊंद पवित्र सभा आदीत; अदिक कष्ट इन यातोदारा क्याल्सा माळबाळेतीर; ईद नीम्द पुरा घराना दा नीम्द पीढ़ी-पीढ़ी दा हमेशा अन्द विधी ठहरूसुल.

22“याग नीव तान द्याश इन केईगोळ कढी, आग तान केई इन क्वानागोळ इक पुरा रीती देल कडु बाळेतीर, अदिक केई दा बिदकु लॉम्बागोळ इक जमा माळबाळेतीर; अदरी गरीब अदिक परदेशीगोळ्द साटी बिटबुळेतीर; ना नीम्द परमेश्वर यहोवा हुईन.”

व्हाशोद वर्ष इन पर्व

(गिनती 29:1-6)

23बाक यहोवा मूसा से अंदुन, 24“इस्राएलीगोळ से अन कि येळवा तिंगुळ इन पयला दिन इक नीम्द साटी खास आराम दिन ईरूल; आ दिन इक याद तोरसोर साटी नरसिंगगोळ ऊयकु आगुल, अदिक ऊंद पवित्र सभा जमा आगुल. 25आ दिशी नीव कष्ट इन यातोदारा क्याल्सा माळबाळेतीर, अदिक यहोवा अन्द साटी ऊंद होमबली येर्सेतीर.”

पाप होचकु ईटोद दिन

(गिनती 29:7-11)

26बाक यहोवा मूसा से अंदुन, 27“अदा येळवा तिंगुळ इन हतवा दिन पाप होचकु ईटोद दिन मान्सकु आगुल; अद नीम्द पवित्र सभा अन्द दिन आदीत, अदिक अदुर दा नीव उपास माळेतीर अदिक यहोवा अन्द होमबली येर्सेतीर. 28आ दिशी नीव यातोदु प्रकार इन क्याल्सा धंदा माळबाळेतीर; यतिकी अद पाप होचकु ईटोद दिन नियुक्त माळकु आग्याद अदुर दा नीम्द परमेश्वर यहोवा अन्द मुंद नीम्द पाप होचकु आदीत. 29इदुरसाटी जो मंळसा आ दिशी उपास माळतीदील आव तान लॉकुर दा टु नाश माळकु आदान. 30अदिक जो मंळसा आ दिशी यातोदारा प्रकार इन क्याल्सा धंदा माळुल आ मंळसा अक ना आऊन लॉकुर न्याड्या दा नाश माळ बुळाईन. 31नीव यातोदु प्रकार इन क्याल्सा धंदा माळबाळेतीर; ईद नीम्द पीढ़ी-पीढ़ी दा नीम्द घराना दा हमेशा अन्द विधी ठहरूसुल. 32अद दिन नीम्द साटी विशेष आराम इन ईरूल, अदुर दा नीव उपास माळेतीर; अदिक आ तिंगुळ इन ऊंम्बत दिन इन द्यावगा टु दुसरा द्यावगा ताका तान आराम दिन मान्सतेला ईरेतीर.”

झोपळीगोळ्द पर्व

(गिनती 29:12-40)

33बाक यहोवा मूसा से अंदुन, 34“इस्राएलीगोळ से अन कि अदा येळवा तिंगुळ इन पन्द्रहवा दिन टु येळ दिन ताका यहोवा अन्द साटी झोपळीगोळ्द पर्व मान्सकु आगुल. 35पयला दिन पवित्र सभा ईरूल; अदुर दा कष्ट इन यातोदारा क्याल्सा माळबाळेतीर. 36येळु दिन यहोवा अन्द साटी होमबली येर्सतेला ईरेतीर, बाक आठवा दिन नीम्द पवित्र सभा आगुल, अदिक यहोवा अन्द साटी होमबली येर्सेतीर; अद महासभा अन्द दिन हुंद, अदिक अदुर दा कष्ट इन यातोदारा क्याल्सा माळबाळेतीर.

37“यहोवा अन्द ठहरूस्कु आग्याव पर्व ईव अच हूँ, इदुर दा नीव यहोवा अन्द होमबली येर्सेतीर, अदिक अन्नभेट, मेलबली, अदिक पेयबली, हर ऊंद तान-तान ठहरूस्कु आग्याद समय मा येर्सकु आगुल अदिक पवित्र सभा अन्द प्रचार माळेतीर. 38ईव सप्पा देल यक्कुल यहोवा अन्द आराम दिन इक मानसेतीर, अदिक तान भेटगोळ्द, अदिक सप्पा मन्नतगोळ, अदिक खुद इन इच्छा अन्द बलिगोळ इक जो यहोवा अक अर्पण माळेतीर येर्सकु आगुल.

39“बाक येळवा तिंगुळ इन पन्द्रहवा दिन इक, याग नीव केई इन उपज इक जमा माळ बुट्टीर, आग येळ दिन ताका यहोवा अन्द पर्व मानसेतीर; पयला दिन विशेष आराम दिन ईरूल, अदिक येळवा दिशी आराम दिन ईरूल. 40अदिक पयला दिन नीव वळ्लीद-वळ्लीद मार्रगोळ्द उपज, अदिक खजूर इन डगालगोळ, अदिक डाट मार्रगोळ्द डगालीगोळ, अदिक गांगा दा टु मजनू हेसुर इन मार्र इक हुळकु तान परमेश्वर यहोवा अन्द मुंद येळ दिन ताका आनन्द माळेतीर. 41प्रति वर्ष येळ दिन ताका यहोवा अन्द साटी पर्व मानसेतीर; ईद नीम्द पीढ़ी-पीढ़ी दा सदा अन्द विधी ठहरूसुल, कि येळवा तिंगुळ दा ईद पर्व मान्सकु आगुल. 42येळ दिन ताका नीव झोपळीगोळ दा ईरेतीर, मतलब यास जन्म टु इस्राएली आर या देशी परदेशी आंदुर सप्पा अन सप्पा झोपळीगोळ दा ईरूल, 43इदुरसाटी कि नीम्द पीढ़ी-पीढ़ी इन लॉकुर ध्यान ईटुल, कि याग यहोवा नाव इस्राएलीगोळ इक मिस्त्र द्याश टु तेगुकु तरोन आग आव आंदरी झोपळीगोळ दा ईटीदुन; ना नीम्द परमेश्वर यहोवा हुईन.”

44अदिक मूसा इस्राएलीगोळ इक यहोवा अन्द पर्व अन ठहरूस्कु आग्याद समय अनकु केळ्सदुन.