परमेश्वर उन वचन
लैव्यव्यवस्था 2
अन्नभेट इन विधी
याग यावारा यहोवा अन्द साटी अन्नभेट इन चढ़ावा येरसोद चाहसुल, रा आव मैदा येरसुल; अदिक अदुर मा याण्णा हाक्कु अदुर म्याकुच लुबान ईटुल; अदिक आव अदरी हारून इन पारगोळ हात्ती जो याजक आन तरूल. अदिक अन्नभेट इन याण्णा मिलुस्द मैदा दा टु ई तरीका देल तान ठ्वामा तुमकु तेगुल कि सप्पा लुबान अदुर दा होट बरूल; अदिक याजक आंदरी याद दिलुसोद भाग इन साटी वेदी मा होमबली होताकुल कि ईद यहोवा अन्द साटी सुखदायक सुगन्धित भेंट ठहरूसुल. अदिक अन्नभेट दा टु जो मिक्कु ईरूल अद हारून अदिक आऊन पारगोळ्द ठहरूसुल; ईद यहोवा अन्द होमबली दा टु परम पवित्र भाग आदीत.
“याग नी अन्नभेट इन साटी तंदुर दा कासकु चढ़ावा येरस्या, रा अद याण्णा दा मिलुस्कु अखमीरी मैदा अन्द फुलका, या याण्णा दा चोपळुस्कु अखमीरी रोट्टीगोळ्द ईरूल.”
अदिक अगर नीन चढ़ावा तावा मा कासकु अन्नभेट ईरूल, रा अद याण्णा देल मिलुस्कु अखमीरी मैदा अन्द ईरूल; अदरी तुकळा-तुकळा माळकु अदुर मा याण्णा हाकेत, आग अद अन्नभेट आगेदीत.
अदिक ईद नींद चढ़ावा कळाई दा ताळस्कु अन्नभेट ईरूल, रा अद मैदा देल याण्णा दा माळकु आगुल. अदिक जो अन्नभेट इन ई वस्तुगोळ दा टु यारदारा माळकु ईरूल अदरी यहोवा अन्द मुंद ओईल; अदिक याग अद याजक उन हात्ती तंदकु आगुल, आग याजक अदरी वेदी इन मुंद ओईल. अदिक याजक अन्नभेट दा टु याद तोरसोर भाग इक तेगुकु होमबली मा होताकुल कि अद यहोवा अन्द साटी सुखदायक सुगन्धवाळा भेंट ठहरूसुल; अदिक अन्नबली दा टु जो मिक्कु ईरूल अद हारून अदिक आऊन पारगोळ्द ठहरूसुल; अद यहोवा अन्द होमबली दा परम पवित्र भाग आदीत.
“यातोदारा भी अन्नभेट यदरी नीव यहोवा अन्द साटी येरसी खमीर मिलुस्कु माळकु आगबाळुल; नीव यागलु होमबली दा यहोवा अन्द साटी खमीर अदिक शयद होताक बाळेतीर.” नीव इंदरी पयला उपज इन चढ़ावा बनुस्कु यहोवा अन्द साटी येर्सेतीर, लेकीन अव सुखदायक सुगन्ध इन साटी वेदी मा येर्सकु आगबाळुल. बाक तान सप्पा अन्नभेटगोळ इक नमकीन माळेतीर; अदिक तान यातोदारा भी अन्नभेट इक तान परमेश्वर उन सांगुळ वादा अन्द ऊप्प देल नमकीन आगगोळ बाळेतीर; तान सप्पा चढ़ावागोळ्द सांगुळ ऊप्प भी येर्सेतीर. “अगर नी यहोवा अन्द साटी पयला उपज इन अन्नभेट येरस्या, रा तान पयला उपज इन अन्नभेट इन साटी बेक्की दा सुटकु हिवरा-हिवरा लॉम्बागोळी, मतलब हिवरा-हिवरा लॉम्बागोळी सुटकु मसलुस कोमेत, आग अनाज इक येर्सेत. अदिक अदुर दा याण्णा हाकेत, अदिक अदुर म्याकुच लुबान ईटेत; आग अद अन्नभेट आगेदीत. अदिक याजक सुटकु तेग्द अन्न अक, अदिक याण्णा अक, अदिक पुरा लुबान इक याद तोरसोद भाग माळकु होताक बुळुल; अद यहोवा अन्द साटी होमबली इन बेक्की ठहरूसुल.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.