लैव्यव्यवस्था 18

यौन नैतिकता अन्द नियम

1बाक यहोवा मूसा से अंदुन, 2इस्राएलिगोळ से अन कि ना नीम्द परमेश्वर यहोवा हुईन. 3नीव मिस्त्र द्याश इन क्याल्सागोळ्द अनुसार व्यवहार माळबाळेतीर, यदुर्दा नीव ईरतोगीर, माळबाळेतीर; अदिक कनान द्याश इन अनुसार भी, यल ना नीमी ओयेतीन, माळबाळेतीर; अदिक न आ द्याशगोळ्द विधीगोळ मा नळेतीर. 4नांद अच नियमगोळ इक मान्सेतीर, अदिक नांद अच विधीगोळ इक मान्सतेला अदुर मा नळेतीर. ना नीम्द परमेश्वर यहोवा हुईन. 5इदुरसाटी नीव नांद नियमगोळ अदिक नांद विधीगोळ इक हमेशा मान्सेतीर; जो मंळसा अवरी मानस्यान आव अऊर कारण जीत्ता ईत्तान. ना यहोवा हुईन.

6“नीम दा टु यावारा तान यातोवारा हात्ती नव कुटुम्बिगोळ सांगुळ शारीरिक संबंध माळबाळी. ना यहोवा हुईन.” 7तान मोय इन मय, जो नीम्द आप्प उन मय हुंद, आकीन से शारीरिक संबंध ईटबाळी; आक रा नीम्द मोय उर, इदुरसाटी नीव आकीन सांगुळ शारीरिक संबंध ईटबाळी. 8तान सौतेला मोय से भी शारीरिक संबंध ईटबाळ; अदुर देल नींद आप्प उन ईज्जत होदीत. 9तान आकतींग चाहे सगा ईरूल चाहे सौतेला ईरूल, चाहे आक मान्या दा पैदा आग्यार चाहे व्हार्या, आकीन से शारीरिक संबंध ईटबाळ. 10नी तान नातुगीतिन सांगुळ शारीरिक संबंध ईटबाळ, बाक आक नींद पार उन पोर ईरूल या बाक नीन पोर इन पोर ईरूल; अदुर देल नींद अच बदनामी आदीत! 11नीम्द सौतेला आकतींग जो नीम्द आप्प से पैदा आदुर, आक नीम्द आकतींग उर, ई कारण नी आकीन से शारीरिक संबंध ईटबाळ. 12तान फूफी इन से शारीरिक संबंध ईटबाळ; आक रा नींद आप्प उन हात्तीनोर नातावळ्त उर. 13तान मावसी से शारीरिक संबंध ईटबाळ; यतिकी आक नींद मोय इन आकतींग हुळ. 14नी तान काका अन्द बेईजती माळबाळ, मतलब आऊन हिंग्स से शारीरिक संबंध ईटबाळ; आक रा नीम्द काकी हुळ. 15तान सासा अन्द सांगुळ शारीरिक संबंध ईटबाळ, आक रा नीन पार उन हिंग्स उर, ई कारण नीव आकीन सांगुळ शारीरिक संबंध ईटबाळ. 16तान भाभी इन सांगुळ शारीरिक संबंध ईटबाळ, अदुर देल नींद वार्ट उन ईज्जत होदीत. 17ऊंदाकान आर्त इन अदिक आकीन पोर इन म्हणजेच येढ्ढु मुंदरी मतलब आकीन नातुगीत इन सांगुळ बाक आक आकीन पोर इन पोर ईरूल या पार उन पोर ईरूल शारीरिक संबंध ईटबाळी. कारण आंदुर आकीन हात्तीनोर नातागोळ उर; हिंग माळोद महापाप आद. 18नींद हिंग्स जीत्ता ईतकु आकीन आकतींग इक हिंग्स माळकु आकीन सवत तरबाळ; अदुर देल आंदुर आबुर दाबुर्द दुश्मन आदार; नी आकीन आकतींग इन सांगुळ शारीरिक संबंध ईटबाळ.

19“बाक यागासताका याकारा आर्त तान महावारी इन कारण अशुद्ध ईरूल आगासताका आकीन सांगुळ शारीरिक संबंध ईटबाळ.” 20बाक नी तान वार्ट बन्धु उन हिंग्स उन सांगुळ शारीरिक संबंध ईटबाळ. अदुर देल नी अशुद्ध आद्या. 21तान औलाद दा टु यारीकारा मोलेक द्याव इन साटी होम माळकु येर्सबाळेतीर, अदिक न तान परमेश्वर उन हेसुर इक अपवित्र ठहरूसेतीर; ना यहोवा हुईन. 22स्त्रीगमन उन रीती पुरूषगमन माळबाळेतीर; अद रा घिनौना क्याल्सा हुंद. 23यातोदारा पशु उन सांगुळ पशुगमन माळकु अशुद्ध आगबाळेतीर, अदिक न यावारा आर्त पशु उन मुंद इदुरसाटी नीदुरकु ईरूल कि आकीन सांगुळ कुकर्म माळुल; ईद रा उलटा मात हुंद.

24“हिंग-हिंग यातोवारा भी क्याल्सा माळकु अशुद्ध आगबाळेतीर, यतिकी या जातीगोळ इक ना नीम्द मुंद टु तेगदुर मा आईन आंदुर हिंग-हिंग क्याल्सा माळकु अशुद्ध आगेग्यार; 25अदिक आंदुर द्याश भी अशुद्ध आगेग्याद, ई कारण ना आऊन मा आऊन दुष्कर्म अन दण्ड कोळतीन, अदिक अद द्याश तान ईरावाळेर इन तेगु बुळतद. 26ई कारण नीव लॉकुर नांद विधीगोळ अदिक नियमगोळ इक हमेशा मानसेतीर, अदिक चाहे देशी, चाहे नीम्द न्याड्या ईरावाळा परदेशी ईरूल, नीम दा टु यावारा भी हिंग घिनौना क्याल्सा माळबाळेतीर; 27यतिकी हिंग सप्पा घिनौना क्याल्सागोळ इक आ द्याश इन मंळसा जो नीम से पयला अदुर्दा ईरतोगोर, आंदुर माळतेला बंदार, ईदुर देला अद द्याश अशुद्ध आग्याद. 28ईग हिंग ना आगुल कि या रीती देल जो राज्य नीम से पयला आ द्याश दा ईरतोगोद, अदरी आव तेगु बुट्टुन, अदा रीती देल याग नीव आऊक अशुद्ध माळी, रा आव नीम इक भी तेगु बुट्टान.” 29“जो यावारा हिंग घिनौना क्याल्सा माळतान आंदुर सप्पा प्राणी तान लॉकुर दा टु नष्ट माळकु आदार.”

30“ईद आग्या जो ना नीम्द मान्सोर साटी कोट्टीन, अदरी नीव मानसेतीर, अदिक जो घिनौना रीतिगोळ नीम से पयला प्रचलित आद, अदुर्दा टु यातोदारा रीती मा नळुबाळेतीर, अदिक न अदुर कारण अशुद्ध आगेतीर. ना नीम्द परमेश्वर यहोवा हुईन.”