यहोशू 7

आकान उन पाप

1लेकीन इस्त्राएलीगोळ भेंट इन वस्तुगोळ बारा दा विश्वासघात माळदुर; मतलब यहूदा वंश इन आकान, जो जेरहवंशी जब्दी अन नातु अदिक कर्मी अन पार ईरोन, आव भेंट इन चिजगोळ दा टु येनारा ताकोम कोंडुन; ई कारण देल यहोवा अन कोप इस्त्राएलीगोळ मा भळकुसेत. 2यहोशू यरीहो टु आई हेसुर इन नगर इन हाती, जो बेतावेन टु हतकु बेतेल इन पूर्व अन दी आद, येनारा मंळसागोळी ईद अनकु कळुदुन, “होगकु द्याश इन भेद तरी.” अदिक आ मंळसागोळ होगकु आई नगर इन भेद ताकोंडुर. 3अदिक आंदुर यहोशू उन हाती वापस बंदकु अंदुर, “सप्पा लॉकुर अल होगबाळुल, येढ्ढ मुर हजार मंळसा होगकु आई नगर इक जीक्स सकतार; सप्पा लॉकुरी अल होगोद कष्ट कोळबाळ, यतिकी आ लॉकुर थ्वाळासा अच आर.” 4इदुरसाटी लगभग मुर हजार लॉकुर अल होदुर; लेकीन आई नगर इन ईरावाळेर मुंद टु ओळेदुर, 5आग आई नगर इन ईरावाळेर आंदुर दा टु छत्तीस मुंदुरी कोंद बुट्टुर, अदिक तान फाटक टु शबारीम1 ताका आंदुर्द पीछा माळकु उतार भाग दा आंदरी कोनतेला होदुर. आग लॉकुर्द मन पिघलुसकु थंडा बिदोत.

6आग यहोशू तान कपळा हरदुर, अदिक आव अदिक इस्त्राएली बाट्ट लॉकुर यहोवा अन सन्दुक इन मुंद बाय इन भार देल बिदकु जमीन मा द्यावगा ताका बिदकु ईत्तुर; अदिक आंदुर तान तान ताल्ला मा धुळा हाकदुर. 7अदिक यहोशू अंदुन, “हाय, प्रभु यहोवा, नी तान ई प्रजा अक यरदन इन पार यती तंद? येन नामी एमोरिया अन वश दा माळकु नष्ट माळोर साटी तंद्या? भला आगेत कि नाव संतोष माळकु यरदन इन आप्पाटी ईरायदेव! 8हाय, प्रभु ना येन अनाईन, याग इस्त्राएलगोळ तान दुश्मनगोळी बेन तोरस्यार! 9यतिकी कनानी जाती बल्‍की ई द्याश इन सप्पा ईरावाळेर ईद केळकु नामी घेर्स कोंडार, अदिक नाम हेसुर पृथ्वी मा टु मिटुस कोंडार; बाक नी तान धोळ्द हेसुर इन साटी येन माळ्या?” 10यहोवा यहोशू से अंदुन, “येळ, नीदरेग, नी यती ई प्रकार बाय इन भार जमीन मा बिदकु आय? 11इस्त्राएलगोळ पाप माळ्यार; अदिक जो वाचा ना आंदुर से तान सांगुळ कटसुसीदीन अदरी आंदुर मुर्द बुटार, आंदुर भेंट इन वस्तुगोळ दा टु ताकोंडुर, बल्‍की चोरी भी माळदुर, अदिक छल माळकु अदरी तान सामान दा ईट कोंडार. 12ई कारण इस्त्राएली तान दुश्मनगोळ मुंद नीदुरकु ईर सकालुर; आंदुर तान दुश्मनगोळी बेन तोर्सतार, इदुरसाटी कि आंदुर खुद अर्पन इन वस्तु आगेग्यार. अदिक यागासताका नीव तान बीच दा टु भेंट इन वस्तु उन सत्यानाश माळ कोमालीर, आगासताका ना मुंद नीम सांगुळ ईर सकालीन. 13येळ, प्रजा अन लॉकुरी पवित्र माळ, आंदुर अन; ‘व्हातर्या ताका तान तान इक पवित्र माळकु ईटी; यतिकी इस्त्राएली इन परमेश्वर ईद अनतान, “हे इस्त्राएल, नीन बीच दा भेंट इन वस्तु आद; इदुरसाटी यागासताका नी अर्पन इन वस्तु इक तान बीच दा टु दुर माळाल आगासताका नी तान दुश्मनगोळ मुंद नीदुरकु ईर सकाल.” 14नाळ व्हातर्या नीम सप्पा मुंदरी यहोवा अन मुंद नीदरोद बिद्दीत, सप्पा परिवार समूह यहोवा अन मुंद पेश आदर, यहोवा ऊंद परिवार समूह अक नीवळुस्यान, आग सिर्फ अदा परिवार यहोवा अन मुंद नीदरीत, आग आ परिवार समूह दा टु यहोवा ऊंद वंश इक नीवळुस्यान. आग बस अदा वंश यहोवा अन मुंद निदुरकु ईत्तीत, आग यहोवा आ वंश इन हर परिवार इन परख माळ्यान, आग यहोवा आ वंश दा टु ऊंद परिवार इक नीवळुस्यान, आग अद परिवार आबना यहोवा अन मुंद नीदुरकु ईत्तीत, आग यहोवा आ परिवार इन हर मंळसा अन जाँच माळ्यान. 15आग जो मंळसा भेंट इन वस्तु ईटकु हुळसुसकु आदान, अदिक जो येनारा आऊन ईतीदाद बेक्‍की दा हाक्कु होताक्कु आदीत; यतिकी आव यहोवा अन वादा अक मुरदान, अदिक इस्त्राएल दा अनुचित कर्म माळ्यान.’” 16यहोशू व्हातर्या येदकु इस्त्राएलगोळी वंश वंश माळकु हात्ती वोतुन, अदिक यहूदा अन वंश हुळसुसकु आत; 17आग आव यहूदा अन परिवार इक हात्ती माळदुन, अदिक जेरह वंशगोळ कुल हुळसुसकु आत; बाक जेरह वंशगोळ घराना अन ऊंद ऊंद मंळसा अक हात्ती तंदुन, अदिक जब्दी हुळसुसकु आदुन; 18आग यहोशू ई परिवार इन सप्पा मंळसागोळी यहोवा अन मुंद बरली हेळदुन, यहूदा कर्मी इन पार आकान इक नीवळुसदुन, कर्मी जब्दी इन पार ईरोन अदिक जब्दी जेरह उन पार ईरोन. 19आग यहोशू आकान से अनली कुरतुन, “हे नान पारा, इस्त्राएल उन परमेश्वर उन महिमा माळ, अदिक आऊन स्तुति माळ; अदिक जो येनारा नी माळ्या अद नानी हेळबुळ, अदिक नान से येनु छप्सबाळ.” 20आकान यहोशू उक उत्तर कोट्टुन, “सहीदा ना इस्त्राएल उन परमेश्वर यहोवा अन विरूद्‍ध पाप माळीन, अदिक ई प्रकार ना माळीन, 21कि याग नानी लूट दा शिनार द्याश इन ऊंद सुंदर ओढ़ना, अदिक येढ्ढ किलो बेळ्ली, अदिक आर्धा किलो व्हान्ना अन ऊंद ईटा कांळ्सत, आग ना अऊर्द लालच माळकु अवरी ईट बुट्टीन; अव नान ड्यारा अन बुळ्क जमीन दा नळ्सकु आव, अदिक सब से ल्यालमा बेळ्ली आद.” 22आग यहोशू थ्वाळासा लॉकुरी कळुदुन, अदिक आंदुर आ ड्यारा दा होदुर; अदिक येन नोळदुर, कि अव वस्तु आऊन ड्यारा दा नळ्सकु आव, अदिक सप्पा अन ल्यालमा बेळ्ली आद. 23अवरी आंदुर ड्यारा दा टु तेगुकु यहोशू अदिक सप्पा इस्त्राएलीगोळ हाती तनकु यहोवा अन मुंद ईट बुट्टुर. 24आग सप्पा इस्त्राएलगोळ सांगुळ यहोशू जेरहवंशी आकान उक, अदिक आ बेळ्ली अदिक आ ओढ़ना अक अदिक व्हान्ना अन ईटा अक, अदिक आऊन पोर पारगोळी, अदिक आऊन वस्तागोळी, गदहा अदिक मर्र म्यांढ्ढा अक, अदिक आऊन ड्यारा अक, मतलब जो येनारा आऊन ईरोद आ सप्पा अक आकोर हेसुर इन घाटी दा वोतुन. 25आग यहोशू आऊन से अंदुन, “नी नामी यती कष्ट कोट्या? ईंद इन दिन यहोवा नीनी कष्ट कोट्टान.” आग सप्पा इस्त्राएलगोळ आऊन मा पथराव माळदुर; अदिक आंदरी बेक्‍की दा हाक्कु होताकदुर, अदिक आंदुर म्याकुच कल्लगोळ हाक बुट्टुर. 26अदिक आंदुर आऊन म्याकुच कल्लगोळ्द धोळ्द ढग माळ कोंडुर जो ईंद ताका माळकु आद; आग यहोवा अन भळकुसकु कोप शांत आगेत. ई कारण आ जागा अन हेसुर ईंद ताका आकोर इन घाटी2 बिदकु आद