परमेश्वर उन वचन
यहोशू 24
शेकेम नगर दा यहोशू अन्द आखरी आदेश
बाक यहोशू इस्त्राएल इन सप्पा वंश इन लॉकुरी जमा माळदुन, अदिक इस्त्राएल इन बाट्ट लॉकुर, अदिक मुख्य मंळसा, अदिक न्यायीगोळी, अदिक सरदारगोळी कारसुसदुन; अदिक आंदुर परमेश्वर उन मुंद उपस्थित आदुर. 1आग यहोशू आ सप्पा लॉकुर से अंदुन, “इस्त्राएल उन परमेश्वर यहोवा ई प्रकार देल अनतान, कि ‘प्राचीनकाल दा अब्राहम अदिक नाहोर उन आप्प तेरह आदि, नीम पुरखा फरात महानद इन आप्पाटी ईरतेला दुसरा द्यावगोळ्द उपासना माळोर, 2अदिक ना नीम्द मुल मंळसा अब्राहम उक फरात इन आप्पाटी टु हुडुकु कनान द्याश इन सप्पा जागागोळ दा वयाळसदीन, अदिक आऊन वंश वाळुसदीन. अदिक अदरी इसहाक उक कोट्टीन; 3बाक इसहाक उक याकूब अदिक एसाव कोट्टीन. अदिक एसाव उक ना सेईर हेसुर इन पहाळी द्याश कोट्टीन कि आव अदुर अधिकारी आगुल, लेकीन याकूब पार नातुगोळ सांगुळ मिस्त्र अक होदुन. 4बाक ना मूसा अदिक हारून उक कळकु आ सप्पा क्याल्सागोळ द्वारा जो ना मिस्त्र दा माळदीन आ द्याश इक नष्ट माळ कोंडीन; अदिक अदुर बाद्दा नीमी तेगुकु तंदीन. 5अदिक ना नीम पुरखागोळी मिस्त्र दा टु तेगुकु तंदीन, अदिक नीव समुद्र अन हाती पोहचुसदीर, अदिक मिस्त्रीगोळ रथ अदिक सवारगोळी सांगुळ हुडुकु क्याचाँद समुद्र ताका नीम्द पीछा माळदुन. अदिक याग नीव यहोवा अन दुहाई कोट्टीर आग आव नीम्द अदिक मिस्त्रीगोळ बीच दा अंधार माळ बुट्टुन, अदिक आंदुर मा समुद्र अक वाहुसकु आंदरी मुळ्क्सदुन; अदिक जो येनारा ना मिस्त्र दा माळदीन अदरी नीव लॉकुर तान कण्ण देल नोळदीर; बाक नीव हापाळ दिन ताका आळी दा ईत्तीर. 6आग ना नीमी आ एमोरियो अन द्याश दा तंदीन, जो यरदन गांगा अन आप्पाटी पूर्व दिशा दा बसुस्कु ईरोर; अदिक आंदुर नीम से लळुसदुर अदिक ना आंदरी नीम वश दा माळ बुट्टीन, अदिक नीव आंदुर द्याश इन अधिकारी आगेदीर, अदिक ना आंदुर नीम मुंद टु सत्यानाश माळ कोंडीन. 7बाक मोआब इन राजा सिप्पोर उन पार बालाक यदकु इस्त्राएल से लळुसदुन; अदिक नीमी श्राप कोळोर साटी बोर उन पार बिलाम उक कारसुसदुन, लेकीन ना बिलाम उन केळीदील; आव नीमी आशीष अच आशीष कोळतेला होदुन; ई प्रकार देल ना नीमी इक आऊन कय दा टु ऊळ्सदीन. 8आग नीव यरदन पार आगकु यरीहो अन हाती बंदीर, अदिक याग यरीहो अन लॉकुर, अदिक एमोरी, परिज्जी, कनानी, हित्ती, गिर्गाशी, हिब्बी, अदिक यबूसी नीम से लळुसदुर, आग ना आंदरी नीम वश दा माळ कोंडीन. 9अदिक ना नीम मुंद बर्रागोळी कळुदीन, अदिक आंदुर एमोरीयो अन येढ्ढु राजागोळी नीम मुंदु टु तुकाळसदुन; नोळी, ईद नीम्द तलवार या धनुष इन ताकत देल आगीदील. 10बाक ना नीमी हिंग द्याश कोट्टीन यदुर दा नीव मयनत माळीदिल, अदिक हिंग नगर भी कोट्टीन यवरी नीव ईला बसुसीदिर, अदिक नीव अल बसुस्कु आईर; अदिक याता दाख अदिक जैतून इन बगीचा अन काय नीव तीनतीर अवरी नीव हचीदिल.’
“इदुरसाटी ईग यहोवा अन अंज्क मान्सकु आऊन स्यावा खराई अदिक सच्चाई देल माळी; अदिक याता द्यावगोळ्द स्यावा नीम पुर्वज मेसोपोटामिया अदिक मिस्त्र दा माळतोगोर, आंदरी दुर माळकु यहोवा अन स्यावा माळी. अदिक अगर यहोवा अन स्यावा माळोद नीमी बुरा हततद, रा ईंद नीवळुस बुळी कि नीव यार्द स्यावा माळीर, बाक आ द्यावगोळ्द यार्द स्यावा नीम पुर्वज मेसोपोटामिया11 दा माळतोगोर, अदिक बाक एमोरीगोळ द्यावगोळ्द स्यावा माळी यारव द्याश दा नीव ईरतीर; लेकीन ना रा तान घराना अन सांगुळ यहोवा अन अच स्यावा हमेशा माळतेला ईराईन.”
आग लॉकुर उत्तर कोट्टुर, “यहोवा अक त्यागस्कु दुसरा द्यावगोळ्द स्यावा माळोद विचार नाव यागलु माळतीदील; यतिकी नाम परमेश्वर यहोवा आवा हुन जो नामी अदिक नाम पुर्वजगोळी मिस्त्र द्याश टु तेगुकु तंदुन, अदिक नाम नोळतेला धोळ धोळ आश्चर्यकर्म माळदुन, अदिक याता हादी मा अदिक यास जातीगोळ बीच दा टु नाव नळकु बरतोगेव आंदुर नाम रक्षा माळदुन; अदिक नाम मुंद ई द्याश दा ईरावाळा एमोरी अदिक सप्पा जातीगोळी तेगु कोंडान; इदुरसाटी नाव भी यहोवा अन स्यावा माळेव, यतिकी नामव परमेश्वर आवा हुन.”
यहोशू लॉकुर से अंदुन, “नीम से यहोवा अन स्यावा आग सकाल; यतिकी आव पवित्र परमेश्वर हुन; आव जलन ईटावाळा परमेश्वर हुन, आव नीम अपराध अदिक पाप क्षमा माळतीदील. अगर नीव यहोवा अक त्यागस्कु पराया द्यावगोळ्द स्यावा माळीर, रा आव भले ही नीम भला माळ्त बंदीदान तरी भी आव तिर्गकु नीम्द हानि माळ्यान अदिक नीम्द अंत भी माळ कोंडान.” लॉकुर यहोशू से अंदुर, “ईला; नाव यहोवा अंद अच स्यावा माळेव.” यहोशू लॉकुर से अंदुन, “नीव खुद अच तान गवाह हूईर कि नीव यहोवा अन स्यावा माळोद नीवळुसदीर.” आंदुर अंदुर, “हव, नाव साक्षी आयेव.” यहोशू अंदुन, “तान बीच दा टु पराया द्यावगोळी इक दुर माळकु तान तान मन इस्त्राएल उन परमेश्वर यहोवा अन दी हची.” लॉकुर यहोशू से अंदुर, “नाव रा तान परमेश्वर यहोवा अन अच स्यावा माळेव, अदिक आऊंद अच मात मानसेव.” आग यहोशू अदा दिशी आ लॉकुर से वादा माळसुसदुन, अदिक शकेम दा आंदुर साटी विधी अदिक नियम ठहरूदुन.
ईद सप्पा वृतांत यहोशू परमेश्वर उन व्यवस्था अन किताब दा लिख्स बुट्टुन; अदिक ऊंद धोळ्द कल्ल नीवळुसकु अल ऊंद बांज मार्र इन हाती नीदरूसदुन, जो यहोवा अन पवित्र जागा दा ईरोद. आग यहोशू सप्पा लॉकुर से अंदुन, “केळी, ईद कल्ल नाम लॉकुर्द गवाह ईत्तीत, यतिकी यास वचन यहोवा नाम से अंदान अवरी ईद केळ्याद; इदुरसाटी ईद नीम्द गवाह ईत्तीत, हिंग आग बाळुल कि नीव तान परमेश्वर से मुकुरूसीर.” आग यहोशू लॉकुर तान तान खुद इन भाग मा होगोर साटी सार माळदुन.
यहोशू अदिक एलीआजर इन सायोद
ई मातगोळ बाद्दा यहोवा अन दास, नून उन पार यहोशू, ऊंद सौ हत्त वर्ष इनव आगकु सोतोदुन. अदिक12 आऊक तिन्मत्सेरह दा, जो एप्रैम इन पहाळी द्याश दा गास हेसुर इन पहाळी इन उत्तर दा आद, अदुर अच भाग दा मुण्ण कोटकु आत.
अदिक यहोशू उन जीवन तीम, अदिक जो बाट्ट लॉकुर यहोशू उन सायोर बाद्दा जीत्ता ईत्तुर अदिक जानसोर कि यहोवा इस्त्राएल इन लॉकुर साटी ह्यांग ह्यांग क्याल्सा माळीदुर, आंदुर भी जीवन तीम इस्त्राएली यहोवा अन अच स्यावा माळतेला ईत्तुर. बाक यूसुफ उन येलुगोळ यवरी इस्त्राएलीगोळ मिस्त्र टु तंदीदुर आंदुर शकेम इन जागा अन साटी आ भाग दा नळ्सकु आत, यदरी याकूब शेकेम इन आप्प हमोर उन पारगोळ से ऊंद सौ बेळ्ली इन सिक्कागोळ देल कोंडीदुन; इदुरसाटी आव यूसुफ उन सन्तान इन खुद इन जागा आगेत.
अदिक हारून उन पार एलीआजर भी सोतोदुन; अदिक आऊक एप्रैम इन पहाळी द्याश इन गिबा नगर दा मुण्ण कोटकु आत, जो आऊन पार पीनहास उक कोटकु आगीत.
Source notes (12)
- Cross-reference उत्पत्ति 11:27
- Cross-reference उत्पत्ति 12:1-9; 21:1-3
- Cross-reference उत्पत्ति 25:24-26; 36:8; 46:1-7; व्यवस्थाविवरण 2:5
- Cross-reference निर्गमन 3:1-12-42
- Cross-reference निर्गमन 14:1-31
- Cross-reference गिनती 21:21-35
- Cross-reference गिनती 22:1–24:25
- Cross-reference यहोशू 3:14-17; 6:1-21
- Cross-reference निर्गमन 23:28; व्यवस्थाविवरण 7:2
- Cross-reference व्यवस्थाविवरण 6:10,11
- Footnote मेसोपोटामिया महानदी
- Cross-reference यहोशू 19:49-50
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.