यहोशू 10

एमोरिया मा विजय

1याग यरूशलेम उन राजा अदोनीसेदेक केळदुन कि यहोशू आई नगर इक ताकोम कोंडुन, अदिक अदुर सत्यानाश माळ कोंडुन, अदिक आव यरीहो अदिक अलेव राजा से माळदुन हांग अच आई नगर अदिक अदुर राजा से माळदुन, अदिक ईद भी केळदुन कि गिबोन इन निवासीगोळ इस्त्राएली से मेल माळदुन, अदिक आंदुर बीच ईरली कुरतार, 2आग आंदुर हापाळ अंजेदुर, यतिकी गिबोन धोळ्द नगर बल्की राजनगर इन तुल्य अदिक आई नगर से धोळ्द ईरोद, अदिक अलेर सप्पा निवासी शूरवीर ईरोर. 3इदुरसाटी यरूशलेम इन राजा अदोनीसेदेक इन हेब्रोन इन राजा होहाम, यर्मूत इन राजा पिराम, लाकीश ओन राजा यापी, अदिक एग्लोन इन राजा दबीर इन हाती ईद बातणी कळुदुन: 4“नान हाती बंदकु नान मदत माळी, अदिक नळी नाव गिबोन इक कोनाता; यतिकी आव यहोशू अदिक इस्त्राएलगोळ से मेल माळ कोंडुन.” 5इदुरसाटी यरूशलेम, हेब्रोन, यर्मूत, लाकीश, अदिक एग्लोन इन अईदु एमोरी राजागोळ तान तान सप्पा सेना जमा माळकु चळाई माळ कोंडुर, अदिक गिबोन इन मुंद ड्यारा हाक्कु अदुर से युध्द छेळ्स बुट्टुर.

6आग गिबोन इन निवासीगोळ गिलगाल इन छावनी दा यहोशू उन हाती ईद बातणी कळुदुर, “तान दासगोळ दी टु नी तान कय सरकुस बाळेत; जल्दी नाम हाती बंदकु नामी ऊळ्स, अदिक नाम्द मदत माळ; यतिकी पहाळी मा ईरावाळेर एमोरिया अन सप्पा राजा नाम विरूद्‍ध जमा आग्यार.” 7आग यहोशू सप्पा योध्दागोळ अदिक सप्पा शूरवीरगोळ सांगुळ गिलगाल टु नळदुन. 8अदिक यहोवा यहोशू से अंदुन, “आंदुर से अंजबाळ, यतिकी ना आंदरी नीन कय दा माळ बुटीन; आंदुर दा ऊंद भी मंळसा नीन मुंद टिक्स सकतीदिल.” 9आग यहोशू रातोरात गिलगाल टु होगकु एकाएक आंदुर मा चढ़ाई माळदुन . 10आग यहोवा हिंग माळदुन कि आंदुर इस्त्राएलगोळ से घबरूसेदुर, अदिक इस्राएली गिबोन इन हाती आंदुर्द धोळ्द संहार माळदुर, अदिक बेथोरोन इन चळाव मा आंदुर्द पीछा माळकु अजेका अदिक मक्केदा ताका आंदरी कोनतेला होदुर. 11बाक आंदुर इस्त्राएलगोळ मुंदु टु ओळकु बेथोरोन इन तराई मा बंदुर, आग अजेका पोहचुसा ताका यहोवा आकाश टु धोड्डेव धोडडेव गारपीट आंदुर मा बरसुसली कुरतुन, अदिक आंदुर सोतोदुर; जो गारपीट देल सोत्तुर आंदुर गिनती इस्त्राएलगोळ तलवार से सोतकु आदुर आंदुर से येक्‍कुल ईरोद. 12आ समय, मतलब याता दिशी यहोवा एमोरिगोळी इस्त्राएलगोळ वश दा माळदुन, आ दिशी यहोशू यहोवा से इस्त्राएलगोळी नोळतेला ई प्रकार अंदुर, “हे सूर्य, नी गिबोन मा, अदिक हे चन्द्रमा, नी अय्यालोन इन तराई इन म्याकुच थाम्सकु ईर.” 131अदिक सूर्य आ समय ताका थाम्सकु ईत्त, अदिक चंद्रमा आ समय ताका ठहरूस्कु ईत्त, यागासताका आ जाती इन लॉकुर तान दुश्मनगोळ से बदला तांकोडीदील. येन ईद मात याशार हेसुर इन किताब दा लिख्सकु हैलेच कि सूर्य आकाश मण्डल इन बीचोबीच ठहरूस्कु ईत्त, अदिक लगभग पुरा दिन ताका मुळकीदिल? 14न रा अदुर से पयले यातोदु हिंग दिन आत अदिक न अदुर बाद्दा, यदुर दा यहोवा यातारा मंळसा अन केळीदान; यतिकी यहोवा रा इस्त्राएली इन दी टु लळुसोन. 15आग यहोशू सप्पा इस्त्राएलीगोळ सांगुळ गिलगाल इन छावनी इक वापस होटोदुन.

एमोरिया अन अईद राजागोळ्द यहोशू उन द्वारा बंदी माळकु आगोद

16आंदुर अईदु राजा ओळकु मक्केदा नगर इन हाती इन गुफा दा होच कोंडुर. 17आग यहोशू उक ईद समाचार सिक्त, “अईदु राजा मक्केदा अन हाती इन गुफा दा होचकोमकु नामी सिक्यार.” 18यहोशू अंदुन, “गुफा अन बाय मा धोड्डेव धोड्डेव कल्ल हचकु अऊर्द देखभाल इन साटी मंळसागोळी अदुर हाती कुर्सबुळी; 19लेकीन नीव ठहरूसबाळी, तान दुश्मनगोळ्द पीछा माळकु आंदुर दा टु जो जो पिछळुस्यार आंदरी कोंद बुळी, आंदरी तान तान नगर दा प्रवेश माळोद मौका कोळबाळी; यतिकी नीम परमेश्वर यहोवा आंदरी नीम कय दा माळ कोंडान.” 20याग यहोशू अदिक इस्त्राएली आंदुर संहार माळकु आंदरी नष्ट माळ कोंडार, अदिक आंदुर दा टु जो उळदोग्यार आंदुर तान तान गढ़वाळा नगर दा होक्कदुर. 21आग सप्पा लॉकुर मक्केदा अन छावनी इक यहोशू उन हाती सुरक्षित वापस बंदुर; अदिक इस्त्राएलीगोळ विरूद्‍ध याऊ बाय दा टु ऊंद आवाज भी तेगदीदील. 22आग यहोशू आग्या कोट्टुन, “गुफा अन बाय खोल्सकु आ अईदु राजागोळी नान हाती तेगुकु तरी.” 23आंदुर हिंग अच माळदुर, अदिक यरूशलेम, हेब्रोन, यर्मूत, लाकीश, अदिक एग्लोन उन राजा अईदु राजागोळी गुफा दा टु आऊन हाती तेगुकु तंदुर. 24याग आंदुर आ राजागोळ इक यहोशू उन हात्ती तेगुकु तंदुर, आग यहोशू इस्त्राएल इन सप्पा मंळसागोळी कारूकु तान सांगुळ नळावाळेर योध्दागोळ अधिकारीगोळ से अंदुर, “हाती बंदकु तान तान काल ई राजागोळ कुतक्या मा ईटी.” अदिक आंदुर हाती होगकु तान तान काल आंदुर कुतक्या मा ईटदुर. 25आग यहोशू आंदुर से अंदुन, “अंज बाळी, अदिक न नीम मन कच्चा आगुल; हिम्मत माळकु मजबुत ईरी; यतिकी यहोवा नीम सप्पा दुश्मनगोळ से यार से नीव लळुसावाळेर आईर हिंगा माळ्यान.” 26ईदुर बाद्दा यहोशू आंदरी कोनसुस बुट्टुन, अदिक अईद मार्रगोळ मा लटकुस बुट्टुन. अदिक आंदुर द्यावगा ताका आ मार्रगोळ मा लटकुसकु ईत्तुर. 27सूर्य मुळ्क्त मुळ्कत यहोशू से आग्या पाऊसकु लॉकुर आंदरी मार्र मा टु ईळ्सकु अदा गुफा दा येल आंदुर होचकोमकु ईरोर अल हाक बुट्टुर, अदिक आ गुफा अन बाय मा धोड्डेव धोड्डेव कल्ल ईट बुट्टुर, अव ईंद ताका अल्या ईटकु आव.

अदिक येक्‍कुल एमोरी राज्य मा विजय

28अदा दिशी यहोशू मक्केदा नगर इक ताकोम कोंडुन, अदिक आऊक तलवार देल कोंदुन, अदिक आऊन राजा अन सत्यानाश माळदुन, अदिक यास प्राणी आंदुर दा ईरव आ सप्पा दा टु यारीकु जीत्ता बिटीदील; अदिक ह्यांग आव यरीहो अन राजा अन सांगुळ माळीदुन हांग अच मक्केदा अन राजा से भी माळदुर. 29आग यहोशू सप्पा इस्त्राएली सांगुळ मक्केदा टु नळकु लिब्ना नगर अक होदुन, अदिक लिब्ना से लळुसदुन; 30अदिक यहोवा आऊक भी राजा सांगुळ इस्त्राएली इन कय दा माळ कोंडुन; अदिक यहोशू आऊक अदिक अलेर सप्पा प्राणीगोळी तलवार देल कोंदुन; अदिक अदुर दा टु यारीकु भी जीत्ता बिटीदील; अदिक अलेव राजा सांगुळ हांग अच व्यवहार माळदुर ह्यांग आव यरीहो अन राजा अन सांगुळ माळदुन. 31बाक यहोशू सप्पा इस्त्राएलीगोळ सांगुळ लिब्ना नगर टु नळुकु लाकीश नगर इक होदुन, अदिक आऊन विरूद्‍ध छावनी हाक्कु लळुसदुन; 32अदिक यहोवा लाकीश उक इस्त्राएल इन कय दा माळ कोंडुन, अदिक दुसरा दिशी आव आऊक जीत्स कोंडुन; अदिक ह्यांग आव लिब्ना नगर इन सप्पा प्राणीगोळ इक तलवार देल कोंदीदुन हांग अच आव लाकीश नगर से भी माळदुन. 33आग गेजेर उन राजा होराम लाकीश नगर इन मदत माळोर साटी येरेदुन; अदिक यहोशू लॉकुर सांगुळ आऊक भी हिंग बळदुन कि आऊन साटी यारीकु जीत्ता बिटीदिल. 34बाक यहोशू सप्पा इस्त्राएली सांगुळ लाकीश नगर टु नळुकु एग्लोन नगर इक होदुन; अदिक आऊन विरूद्‍ध छावनी हाक्कु युध्द माळली कुरतुन; 35अदिक अदा दिशी आंदुर अदरी ताकोम कोंडुर, अदिक अदुर दा ईरावाळेर सप्पा प्राणीगोळी तलवार देल कोंदुर; अदिक अदा दिशी ह्यांग आव लाकीश नगर इन सप्पा प्राणीगोळ्द सत्यानाश माळ कोंडुन हांगा आव एग्लोन नगर से भी माळदुर. 36बाक यहोशू सप्पा इस्त्राएलीगोळ सांगुळ एग्लोन नगर टु नळुकु हेब्रोन नगर इक होदुन, अदिक अदुर से भी लळाई माळदुन; 37अदिक आंदुर अदरी ताकोम कोंडुर, अदिक अदरी अदिक अदुर राजा अदिक सप्पा प्राणीगोळी तलवार देल कोंदुर; ह्यांग यहोशू एग्लोन नगर से माळदुन हांग अच आव हेब्रोन नगर दा भी यारीकु जीत्ता बिटीदिल; आव अदरी अदिक अलेव सप्पा प्राणीगोळ इक नष्ट माळ बुट्टुन.

38आग यहोशू सप्पा इस्त्राएली सांगुळ तिर्गकु दबीर नगर इक होदुन, अदिक आंदुर से लळाई माळदुन; 39अदिक राजा सांगुळ आऊक अदिक आऊन सप्पा ऊरगोळ इक ताकोम कोंडुन; अदिक आंदुर आंदरी तलवार देल घात माळदुर; अदिक नगर दा यारीकु जीत्ता बिटिदील, ह्यांग यहोशू हेब्रोन अदिक लिब्ना अदिक आऊन राजा से माळदुर हांग अच आव दबीर अदिक आऊन राजा से भी माळदुन. 40ई प्रकार यहोशू आ सप्पा द्याश इक , मतलब पहाळी द्याश, दक्षिण द्याश, ल्यालमागोळोव द्याश, अदिक ढलान द्याश इक, आंदुर सप्पा राजागोळ सांगुळ कोंदुर; अदिक इस्त्राएल इन परमेश्वर यहोवा अन आग्या अन अनुसार यारीकु जीत्ता बिटीदिल, बल्की यास प्राणी ईरव सप्पा अन सत्यानाश माळ कोंडुर. 41अदिक यहोशू दक्षिण इन कादेशबर्ने नगर टु गाजा नगर ताका, अदिक उत्तर इन गिबोन नगर ताका सप्पा गोशेन द्याश इन लॉकुरी कोंदुर. 42ई सप्पा राजागोळी आंदुर द्याश इन सांगुळ यहोशू ऊंद अच समय दा ताकोम कोंडुन, यतिकी इस्त्राएल उन परमेश्वर यहोवा इस्त्राएलीगोळ दी टु लळुसोन. 43आग यहोशू सप्पा इस्त्राएलीगोळ सांगुळ गिलगाल इन छावनी दा वापस बंदुन.