परमेश्वर उन वचन
यूहन्ना 3
यीशु अदिक नीकुदेमुस
फरीसीगोळ दा नीकुदेमुस हेसुर ईनव ऊंद मंळसा ईरोन, जो यहूदी लॉकुरव सरदार ईरोन. आव ईळ्लक इक यीशु उन हात्ती बंदकु आऊन से अंदुन, “हे गुरु, नाव जान्सतेव कि नी परमेश्वर दी टु गुरु आगकु बंद्या, यतिकी ई चिन्हगोळी जो नी तोर्सत्या, अगर परमेश्वर नीन सांगुळ ईला ईरायदुन रा नी ई चिन्हगोळी ईला तोर्स सकाईद.”
यीशु आऊक उत्तर कोट्टुन, “ना नीन से खरा खरा अनतीन, अगर यावारा व्हाशोद रीति देल पैदा आगालुन रा आव परमेश्वर उन राज्य नोळ सकालुन.”
नीकुदेमुस यीशु उक अंदुन, “मंळसा याग हाळाबाट आगेदुन, रा ह्यांग पैदा आग सकतान? येन आव तान मोय इन गर्भ दा दुसरा घन प्रवेश माळकु पैदा आग सकतान?”
यीशु उत्तर कोट्टुन, “ना नीन से खरा खरा अनतीन, यागासताका यावारा मंळसा नीर अदिक आत्मा देल पैदा आगालुन आगासताका आव परमेश्वर उन राज्य दा प्रवेश माळ सकालुन. यतिकी जो मय देल पैदा आग्याद, अद मय हुन; अदिक जो आत्मा देल पैदा आग्याद, अद आत्मा हुन. अचम्भा माळबाळ कि ना नीन से अंदीन, ‘नीनी व्हाशोद रीति देल पैदा आगोद जरूरी आद.’ हवा यात चाहासतद आत नळुतद अदिक नी अदुर्द शब्द केळत्या, लेकीन अरू सकाल कि अद यातु टु बरतद अदिक यात होगतद? जो यावारा आत्मा देल पैदा आग्यान आव हिंग अच आन.”
नीकुदेमुस आऊक उत्तर कोट्टुन, “ईव मातगोळ ह्यांग आग सकताव?”
ईद केळकु यीशु आऊन से अंदुन, “नी इस्त्राएलीगोळ्द गुरु ईतकु भी येन ई मातगोळी समसाल? ना नीन से खरा खरा अनतीन कि नाव जो अरूतेव अद माताळतेव, अदिक यदरी नाव नोळेव अदुर्द गवाही कोळतेव, अदिक नीव नाम गवाही ग्रहण माळालीर. याग ना नीम से पृथ्वी इन मातगोळ माळदीन अदिक नीव विश्वास माळीदिल, रा अगर ना नीम से स्वर्ग इन मातगोळ माळाईन रा बाक ह्यांग विश्वास माळीर? याऊ स्वर्ग मा येरीदिल, सिर्फ आवा जो स्वर्ग टु ईळदान, मतलब मंळसा अन पार जो स्वर्ग दा आन.”
अदिक याता रीति देल मूसा आळी दा हाव इक ऊँचाई मा येर्सदुन, अदा रीति देल जरूरी आद कि मंळसा अन पार भी ऊँचाई मा येर्सकु आगुल; ताकी जो यावारा आऊन मा विश्वास माळ्यान आऊक अनन्त जीवन सिकुल. “यतिकी परमेश्वर दुनिया से हिंग प्यार ईटदुन कि आव तान ऊंद ठैसा पार कोट बुट्टुन, ताकी जो यावारा आऊन मा विश्वास माळ्यान आऊन नाश आगबाळुल, लेकीन आऊक अनन्त जीवन सिकुल. परमेश्वर तान पार उक दुनिया दा इदुरसाटी कळीदिल कि दुनिया मा दण्ड इन आग्या कोळुल, लेकीन इदुरसाटी कळ्यान कि दुनिया अक आऊन द्वारा उद्धार सिकुल.
“जो आऊन मा विश्वास माळतान, आऊन मा दण्ड इन आग्या आगाल, लेकीन जो आऊन मा विश्वास माळालुन, आव दोषी ठहरूसतान; इदुरसाटी कि आव परमेश्वर उन ऊंद ठैसा पार उन हेसुर मा विश्वास माळीदिल. अदिक दण्ड इन आग्या अन्द कारण ईद आद कि ज्योति दुनिया दा बंदाद, अदिक मंळसागोळ अंधार इक ज्योति से यक्कुल प्रिय सम्सदुर यतिकी आंदुर क्याल्सा बुरा ईरव. यतिकी जो यावारा बुराई माळतान, आव ज्योति से दुश्मनी ईटतान, अदिक ज्योति इन हात्ती बरालुन, हिंग आगबाळुल कि आऊन क्याल्सागोळ मा दोष हचकु आगुल. लेकीन आव जो सच्चाई मा नळुतान, अदिक ज्योति इन हात्ती बरतान, यदुर देल ईद प्रगट आगेगुल कि आऊन क्याल्सा परमेश्वर उन दी टु माळकु आग्याव.”
यीशु अदिक यूहन्ना
इदुर बाद्दा यीशु अदिक आऊन चेलागोळ यहूदिया द्याश दा बंदुर; अदिक यीशु अल आंदुर सांगुळ ईतकु बपतिस्मा कोळली कुरतुन. यूहन्ना भी शालेम नगर इन हात्ती ऐनोन दा बपतिस्मा कोळतोगोन, यतिकी अल हापाळ नीर ईरोद, अदिक लॉकुर बंदकु बपतिस्मा ताकोम तोगोर. 1यूहन्ना आ समय ताका बंदीगृह दा हाक्कु आगली ईरोन.
अल यूहन्ना अन्द चेलागोळ्द यावारा यहूदी इन सांगुळ शुद्धीकरण इन बारा दा वाद-विवाद आत. अदिक आंदुर यूहन्ना अन्द हात्ती बंदकु आऊन से अंदुर, “हे गुरु, जो मंळसा यरदन इन आप्पाटी नीन सांगुळ ईरोन, अदिक यार्द नी गवाही कोट्या; नोळ, आव बपतिस्मा कोळतान, अदिक सप्पा मुंदुर आऊन हात्ती बरतार.”
यूहन्ना उत्तर कोट्टुन, “यागासताका मंळसा अक स्वर्ग इन दी टु कोटकु आगाल, आगासताका आव येनु हासिल माळ सकालुन. 2नीव रा खुद अच नान गवाह हुईर कि ना अंदीन, ‘ना मसीह आलच, लेकीन आऊन मुंद कळुकु आगीन.’ यार्द मंळगीत आर, आवा मंळगार हुन; लेकीन मंळगार उन संगी जो निदुरकु आऊन केळतान, मंळगार उन शब्द केळकु हापाळ खुश आगतान: ईग नान ईद खुशी पुरा आग्याद. जरूरी आद कि आव धोड्डेव आगुल अदिक ना स्याणेव.
स्वर्ग टु बरावाळा आव याव हुन
“जो म्याकुच टु बरतान आव सब से वळ्लेव आन; जो पृथ्वी टु बरतान आव पृथ्वी नव हुन, अदिक पृथ्वी इन मातगोळी हेळतान: जो स्वर्ग टु बरतान, आव सप्पा मुंदुर्द म्याकुच आन. जो येनारा आव नोळ्यान अदिक केळ्यान, अदुर्दा गवाही कोळतान; अदिक याऊ आऊन गवाही ग्रहण माळालुन. याव आऊन गवाही ग्रहण माळ कोंडुन आव ई मात मा छाप हच बुट्टुन कि परमेश्वर खरा आन. यतिकी यारी परमेश्वर कळ्यान, आव परमेश्वर उन मातगोळ अनतान; यतिकी आव आत्मा आळु आळुकु कोळालुन. 3आप्प पार से प्यार ईटतान, अदिक आव सप्पा वस्तुगोळ आऊन कय दा ईट बुटान. जो पार मा विश्वास माळतान, अनन्त जीवन आऊन हुन; लेकीन जो पार उन मातगोळी मान्सालुन, आव जीवन इक नोळतीदिल, लेकीन परमेश्वर उन सिट्ट आऊन मा ईरतद.”
Source notes (3)
- Cross-reference मत्ती १४:३; मरकुस ६:१७; लूका ३:१९,२०
- Cross-reference यूहन्ना १:२०
- Cross-reference मत्ती ११:२७; लूका १०:२२
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.