इब्रानिगोळ 9

पृथ्वी अदिक स्वर्ग इन आराधना

1ईग नोळी आ पयला वाचा दा भी उपासना माळोद नियम ईरव, अदिक ऊंद उपासना अन्द जागा ईरोद जो मंळसा अन द्वारा माळकु आगीत. 2ऊंद तम्बू माळकु ईरोद, यदुर्द पयला कमरा दा दिंग्या ईटोद जागा, अदिक मेज अदिक परमेश्वर उक भेंट माळव रोट्टीगोळ ईरव; अदिक आ जागा अक पवित्र जागा अंदकु आगतोगोद. 3दुसरा परदा अन हिंद मात्‍त ऊंद कमरा ईरोद, यदरी परम पवित्र जागा अंदकु आगतोगोद. 4ईऊर दा सुगन्धित धूपदानी इन साटी व्हान्ना अन वेदी, अदिक व्हान्ना देल मळुस्द वाचा अन्द संदुक ईरोद ई संदुक दा व्हान्ना अन्द माळ्द मन्ना अन्द ऊंद जार इरोद, अदिक हारून उन आ छळी ईरोद यदुर मा अंकुर बेळ्दीदव अदिक येढ्ढ कल्ल यदुर मा आग्यागोळ लिख्सकु ईरव. 5संदुक इन म्याकुच परमेश्वर उन उपस्थिती इन प्रतिक मतलब करूब बन्सकु ईरव जो तान पिक्‍कागोळी फैलुसकु माफ अन जागा मा सावली माळतोगव. लेकीन ई समय नाव ईव मातगोळ्द विस्तार देल चर्चा माळ सकालेव.

6सप्पा येनारा संची आगदुर बाद्दा याजक पयला कमरा दा हर रोज प्रवेश माळकु तान स्यावा अन्द कार्य पुरा माळोर साटी होगतोगोर. 7लेकीन परदा अन बुळ्क इन दुसरा कमरा दा सिर्फ प्रधान याजक अच साल दा ऊंद अनली प्रवेश माळतोगोन, आव बिना आ रक्ता अन यागलु प्रवेश ईला माळतोगोन यदरी आव तान द्वारा अदिक तान लॉकुर द्वारा अनजाना दा माळ्द पापगोळ साटी परमेश्वर उक भेंट येर्सतोगोन. 8ईदुर द्वारा पवित्र आत्मा स्पष्ट रीति देल ईद कल्सतद कि यागासताका ताका पयला तम्बू निदुरकु आद आगासताका ताका परम पवित्र जागा अन्द हादी ईगासताका तेरकु ईला ईरोद. 9ईद ऊंद तम्बू हुन जो वर्तमान समय इन साटी ऊंद उदाहरण आद; मतलब यदुर्दा उन ईत्‍ता भेंट अदिक बलिदान येर्सदुर बाद्दा भी आराधना माळावाळेर मन सिद्ध आग सकालव. 10ईद रा सिर्फ तिनोद कुडोद अदिक अलग-अलग प्रकार इन सुद्धिकरणगोळ्द विधीगोळ हुव. अद तम्बु यदुर दा आव स्यावा माळतान अद यक्कुल वळ्लीद परिपुर्ण तम्बु हुन अद मंळसागोळ्द कय इन माळ्द तम्बु आल्लच अदिक अद ई संसार इन निर्मिती इन भाग आल्लच.

11लेकीन जो मातगोळ पयले टु अच ईल आव हिंग वळ्लीद वस्तुगोळ्द याग मसीह पयले टु प्रधान याजक बन्सकु बंदान. रा आव मात्‍त यक्कुल धोळ्द अदिक सिद्ध तम्बू टु आगकु, जो मंळसा अन कय इंद बन्सकु ईला मतलब ई सृष्टी इन ईला, 12अदिक व्हातगोळ अदिक वस्तागोळ रक्ता अन द्वारा ईला लेकीन तांद अच रक्ता अन द्वारा, मसीह ऊंद अच घन तम्बु दा टु आगतेला महापवित्र जागा दा प्रवेश माळदुन अदिक नाम साटी पापगोळ देल अनन्त छुटकारा प्राप्त माळदुन. 13यतिकी याग व्हातगोळ अदिक वस्तागोळ्द रक्ता अदिक होद्द पाड्डगोळ्द राकळ इक विधी इन अनुसार अशुध्द लॉकुर मा छिळकुसदुर देल आंदुर शुद्ध आगेगतार अदिक विधी इन अनुसार आंदुर अशुध्दता व्हार्यागोळ्द रीति देल होटोगतद. 14याग ईद सही आद रा मसीह अन रक्ता याट प्रभावशाली ईतीदाद, आव अनन्त आत्मा अन द्वारा तान तान इक ऊंद संपुर्ण बली इन रूप दा परमेश्वर उक समर्पित माळ बुट्टुन. रा आऊन रक्ता नाम चेतना अक आ कर्मगोळ देल कोळसुसित जो मृत्यु दी ओयतार कि नाव जित्‍ता परमेश्वर उन स्यावा माळ सक्‍केव.

15ईदा कारण मसीह ऊंद व्हाशोद वाचा अन्द मध्यस्थ आदुन, ताकी यारी परमेश्वर उन द्वारा कारूकु आग्याद आंदुर परमेश्वर उन प्रतिग्या माळ्द अनन्त आशिषगोळ्द वारीस आग सकुल. ईग नोळी पयला वाचा अन हात्‍ती ता दा माळ्द पापगोळ से मुक्त माळोर साटी फिरोती इन रूप दा आव तान जीव कोट बुटान. 16यल ताका वसीयत नामा अन सवाल आद रा अदुर साटी याव आऊक माळ्यान आऊन मृत्यु उक प्रमाणित माळोद जरूरी आद. 17यतिकी यातोदारा भी वसीयत नामा सिर्फ आगा प्रभावित आगतद याग अदुर्द लिखसावाळा अन मृत्यु आगेगतद, यागासताका अदुर्द लिखसावाळा जित्‍ता ईरतान रा अदुर्द यागलु प्रभावित बिळाल. 18इदुरसाटी पयला वाचा भी रक्ता अन्द इस्तेमाल द्वारा प्रभावित आत. 19पयले मूसा याग व्यवस्था अन विधान इन सप्पा आदेशगोळी सप्पा लॉकुरी घोषणा माळ कोंडान रा आव नीर इन सांगुळ व्हातगोळ अदिक पाड्डगोळ्द रक्ता अक क्याचांद इन अदिक हिस्सप इन डगालगोळ देल व्यवस्था अन किताब अदिक सप्पा लॉकुर मा छिळकुस बुटीदुन. 20अदिक आव अंदिदुन, “ईद आ वाचा अन रक्ता हुन, यदरी पालसोद आग्या परमेश्वर नीमी कोटान.” 21अदिक ईदा रीति देल आव तम्बू अदिक उपासना माळोद सप्पा वस्तुगोळ मा रक्ता छिळकुसदुन. 22वास्तव दा व्यवस्था अन अनुसार लगभग रक्ता द्वारा अच सप्पा वस्तुगोळ शुद्ध आगताव, अदिक बिना रक्ता वाहुस्द पापगोळी माफ हैलेच.

मसीह अन बलिदान द्वारा पाप-माफ

23रा बाक ईद जरूरी आद कि अव वस्तुगोळ जो स्वर्ग इन प्रतिकृती आव अवरी जनावरगोळ्द बलिदानगोळ से शुद्ध माळकु आगुल लेकीन स्वर्ग टु वस्तुगोळ रा ईऊर से भी वळ्लीद बलिदानगोळ देल शुद्ध माळकु आगोद अपेक्षा माळतद. 24यतिकी मसीह मंळसागोळ्द कय इन माळ्द पवित्र जागा दा, जो खरा पवित्र जागा अन नमुना आद, प्रवेश माळीदिल लेकीन स्वर्ग दा अच प्रवेश माळदुन, ताकी नाम दी टु परमेश्वर उन मुंद प्रगट आगुल. 25ईद ईला कि आव तान तान इक घळी-घळी बली येर्सुल, ह्यांग कि महायाजक हर साल पशुगोळ रक्ता हुडुकु पवित्र जागा दा प्रवेश माळतान, 26ईलारा दुनिया अन उत्पत्ति टु हुडुकु मसीह अक घळी-घळी दुख नेगोद बिळाईत; लेकीन ईग युग इन अन्त दा आव ऊंद अच घन सप्पा मुंदुर साटी प्रगट आग्यान, ताकी तांद अच बलिदान इन द्वारा पाप इक दुर माळ बुळुल. 27अदिक ह्यांग मंळसागोळ साटी ऊंद घन सायोद अदिक अदुर बाद्दा परमेश्वर उन द्वारा न्याय इन आगोद तय आद, 28हांग अच मसीह भी हापाळ मंळसागोळ्द पापगोळी नेगोर साटी ऊंद घन बलिदान आदुन; अदिक जो लॉकुर आऊन हादी कायतार आंदुर उद्धार इन साटी ईग आव दुसरा घन प्रगट आदान रा पापगोळी दुर माळोर साटी ईला बल्‍की जो आऊन हादी कायेतार आंदरी उद्धार कोळोर साटी.