परमेश्वर उन वचन
इब्रानिगोळ 6
इदुरसाटी बरी मसीह अन सुरूवात इन स्तर शिक्षा अक सुरूवात इन मातगोळी बिटकु नाव सिद्धता दी मुंद वाळुस्तेला होगाता, मृत्यु उन अगुवाई माळोर द्वारा प्रायश्चित इन पायवा मात हाकबाळुल, अदिक परमेश्वर मा विश्वास माळोद, बपतिस्मा अन्द शिक्षा अदिक म्याकुच कयगोळी ईटोद, अदिक सोत्तुर दा टु जित्ता आगोद, अदिक अनन्त न्याय ताका. अगर परमेश्वर चाहास्यान रा नाव ईदा माळेव.
जो लॉकुर तान विश्वास इक त्याग्स बुळतार आंदरी मात पश्चाताप माळोर साटी ह्यांग तनकु आग सकतद, आंदुर ऊंद घन परमेश्वर उन प्रकाश दा ईरोर, आंदुर स्वर्ग इन उपहार नेकदुर अदिक पवित्र आत्मा अन्द तान हिस्सा हासिल माळदुर, अदिक परमेश्वर उन वळ्लीद वचन इन अदिक बरावाळा दुनिया अन सामर्थ्य अन अदिक आंदुर परमेश्वर उन वचन याट वळ्लीद आद ईदुर्द अनुभव माळ्यार. अगर आंदुर आंदुर्द विश्वास देल भटकुसेदार रा आंदरी मन तिर्गुसोर साटी मात्त वापस तरोद असंभव आद; यतिकी आंदुर परमेश्वर उन पार उक मात्त क्रूस मा येर्सतार, तथा आऊक सार्वजनिक रूप देल अपमान इन विषय बन्सतार.
आ धरती जो हमेशा बिळावाळा बरसात इन नीर इक सोक्स बुळतद, जो जोतसावाळेर अदिक बोऊसावाळेर साटी उपयोगी फसल प्रदान माळतद, अद मुण्ण परमेश्वर से आशीष ताकोमतद. लेकीन आ धरती मुळ्ल अदिक घासपुस पैदा माळतद, रा अद बेकार इन आद अदिक अद परमेश्वर उन दी टु श्रापित आगदुर मा आद अदिक अदुर्द अन्त होताक्कु आगोद हुन.
हे प्रिय संगीगोळा, नाव भला ईत्ता प्रकार इन मातगोळ चाहसतेव लेकीन नीम बारा दा नामी ईदुर से भी वळ्लीद मातगोळ्द आत्मविश्वास आद अव मातगोळ जो नीम विश्वास से जुळ्सकु आव. नीव परमेश्वर उन लॉकुर्द लगातार मदत माळतेला जो प्यार तोर्सीर, अदरी अदिक नीम दुसरा क्याल्सागोळी परमेश्वर यागलु मारूतीदिल, आव अन्यायी हैलेच. नाव चाहसतेव की नीम दा टु हर ऊंद आखरी ताका हिंग अच मेहनत माळतेला ईरूल, ताकी नीव निश्चय अदरी हासिल माळ सकीर यदुर्द नीव आशा माळतेला ईतीर. नाव चाहसालेव कि नीव आलसी आगेगी, बल्की आंदुर्द अनुकरण माळी जो विश्वास अदिक धीरज इन सांगुळ आ वस्तुगोळी हासिल माळेत्यार यऊर्द परमेश्वर प्रतिग्या माळ्यान.
परमेश्वर उन अटल प्रतिग्या
परमेश्वर अब्राहम से प्रतिग्या हाळाहोती याग किर्या तीनोर साटी यारीकु तान से धोड्डेव नोळीदील, रा तांद अच किर्या तिंदुन, अदिक अंदुन “ना सही दा नीनी हापाळ आशीष कोळाईन, अदिक नीनी अनेक वंशज कोळाईन.” अदिक ईत्ता रीति देल अब्राहम धीरज हुडुकु परमेश्वर उन माळ्द प्रतिग्यागोळी हासिल माळदुन. मंळसा रा तान से यातारा धोड्डेव मंळसा अन किर्या तीनतार, अदिक अद किर्या सप्पा तर्क विर्तकगोळ्द अन्त माळकु जो येनारा अंदकु आगतद, अदरी पक्का माळ बुळतद. परमेश्वर उन माळ्द प्रतिग्या अक हासिल माळावाळेर इक परमेश्वर स्पष्ट माळकोमोद चाहासतान कि आव तान उद्देश इक यागलु बदलुसालुन इदुरसाटी आव तान प्रतिग्या अन सांगुळ तान किर्या अक जोळ्स बुट्टुन. ईल येढ्ढ मातगोळ आव आऊन प्रतिग्या अदिक आऊन किर्या जो यागलु बदलुस सकालव, अदिक यऊर बारा दा परमेश्वर यागलु ख्वाटा माताळ सकालुन. इदुरसाटी नाव जो परमेश्वर उन हात्ती सुरक्षा ताकोमोर साटी बंदेव, अदिक जो आशा आव नामी कोटान अदरी हुडुकु हापाळ उत्साहीत आयेव. अद आशा नाम जीव इन साटी ईत्ता लंगर आद जो स्थिर अदिक मजबूत आद, अदिक परदा अन बुळ्क इन पवित्र जागा ताका पहुचुसतद, यल यीशु नाम दी टु नाम से पयले प्रवेश माळदुन, अदिक मलिकिसिदक इन परंपरा दा हमेशा हमेशा साटी प्रमुख याजक बनसेदुन.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.