इब्रानिगोळ 4

1इदुरसाटी याग कि परमेश्वर उन आराम इन जागा दा प्रवेश माळोद प्रतिग्या ईगासताका ताका आद, रा नामी ध्यान ईट पायजे हिंग आगबाळुल कि नीम दा टु यावारा जन आऊन से वंचित ईतोगुल. 2यतिकी नाव खुशखबरी केळदेव ह्यांग आंदुर केळीदुर, लेकीन जो बातणी आंदुर केळीदुर आंदुर साटी येनु किमत ईला ईरोद, यतिकी याग आंदुर अदरी केळदुर रा ईदरी विश्वास इन सांगुळ स्वीकार माळीदिल. 3नाव जो विश्वासी आयेव, आ आराम इक यदुर्द परमेश्वर प्रतिग्या माळीदुन अदरी नाव प्राप्त माळतेव. ह्यांग कि परमेश्वर अंदान, “ना सिट्ट दा ईदुर मा किर्‍या तिनकु अंदिदीन आंदुर यागलु नान आराम इन जागा दा शामिल आग सकतीदिल.” आव ईद अंदिदुन, याग कि दुनिया अन्द रचना माळदुर बाद्दा आऊन क्याल्सा पुरा आगेगीत. 4यतिकी सातवा दिन इन बारा दा येल्यारा तरी शास्त्र दा आद, “अदिक बाक सातवा दिशी तान सप्पा क्याल्सागोळ माळकु परमेश्वर आराम माळदुन.” 5अदिक ई संदर्भ दा आव मात्‍त अनतान, “आंदुर नान आराम इन जागा दा यागलु प्रवेश माळ सकतीदिल.” 6यार पयले खुशखबरी केळदुर आंदुर आ आराम इक प्राप्त माळ सकिदील यतिकी आंदुर विश्वास ईला माळीदुर. लेकीन दुसरा अन साटी आराम इन दरवाजा ईगलु तेरकु आव. 71इदुरसाटी परमेश्वर बाक ऊंद विशेष दिन निश्चित माळदुन अदिक अदरी अनकु आत “ईंद इन दिन.” थ्वाळासा साल इन बाद्दा दाऊद उन द्वारा परमेश्वर आ दिन इन बारा दा शास्त्रगोळ दा हेळीदुन यदुर्द उल्लेख शास्त्र पयले टु अच माळतद, “अगर ईंद नीव परमेश्वर उन आवाज केळीर, ह्यांग पयले अंदकु आग्याद, रा तान मन इक कठोर माळबाळी.”

8अगर यहोशू आंदरी आ आराम इन जागा दा ओयायदुन यदुर्द परमेश्वर प्रतिग्या माळीदुन, रा परमेश्वर बाद्दा यातोदु दुसरा दिन इन बारा दा ईला अनायदुन. 9रा जो भी आगुल, ह्यांग परमेश्वर सातवा दिन दा आराम माळतान हांग अच परमेश्वर उन लॉकुर साटी अल ऊंद आराम मिक्‍कु आद. 10यतिकी जो यावारा भी परमेश्वर उन प्रतिग्या माळ्द आराम दा प्रवेश माळतार, आंदरी तान कर्म इन अनुसार अदुर दा आराम सिक्‍कीत हांग अच ह्यांग परमेश्वर उक तान क्याल्सागोळ से आराम सिक्याद. 11इदुरसाटी बरी ईग नाव भी आ आराम इक हासिल माळोर साटी पुरा रीति देल कोशिश माळाता, ताकी हिंग आगबाळुल कि नाम न्याड्या दा टु यावारा भी अदरी हासिल माळदुर दा असफल आगबाळुल ह्यांग आंदुर तान विश्वास इन कमी इन द्वारा आगीदुर.

12यतिकी परमेश्वर उन वचन जित्‍ता, क्रियाशील, अदिक हर ऊंद दोधारी तलवार से भी हापाळ तेज आद; अदिक हर जीव आत्मा अक, अदिक जोळ-जोळ इक ब्यार्र माळकु आर-पार गड्डा माळतद अदिक मन इन इच्छागोळ अदिक विचारगोळ्द न्याय माळतद. 13अदिक दुनिया अन्द यातोदारा भी वस्तु परमेश्वर उन नजर देल होचकोमकु हैलेच, आऊन कण्णगोळ मुंद यारी नामी लेखा जोखा कोळोद आद हर वस्तु बीना यातोदु आवरण इन तेरकु आद अदिक येनु अच ओझल हैलेच.

यीशु महान महायाजक

14इदुरसाटी याग नामव ईत्‍ता धोड्डेव महायाजक आन, जो स्वर्ग दा टु आगकु होग्यान, मतलब परमेश्वर उन पार यीशु, रा बरी, तान विश्वास इक जो नाव प्राप्त माळेव मजबूती देल हुडुकु ईत्‍तेव. 15यतिकी नामव जो महायाजक आन आव हिंग हैलेच कि जो नाम कमजोरीगोळ सांगुळ सहानुभुती ईट सक्यान, आऊक हर प्रकार देल हांगा परखुसकु आत ह्यांग नामी लेकीन आव हमेशा पाप रहित ईत्‍तुन. 16रा बाक बरी, नाव आत्मविश्वास इन सांगुळ अनुग्रह ताकोमोर साटी परमेश्वर उन सिंहासन दी वाळुसेव ताकी जरवत बीळदुर मा नाम सहायता अन साटी नाव दया अदिक अनुग्रह अक हासिल माळ सक्केव.