परमेश्वर उन वचन
उत्पत्ति 2
ई प्रकार आकाश अदिक पृथ्वी अदिक जो येनारा अदुर्दा आद अदुर्द रचना पुरा आत. अदिक परमेश्वर तान क्याल्सा यदरी आव माळतोगोन सातवा दिशी पुरा माळदुन, अदिक आव तान माळदव पुरा क्याल्सागोळ से सातवा दिशी आराम माळदुन.1 अदिक परमेश्वर सातवा दिशी इक आशीष कोट्टुन अदिक पवित्र ठहरूसदुन; यतिकी अदुर्दा आव जगत इन रचना अन तान सप्पा क्याल्सा देल आराम ताकोंडुन.
मंळसा अन्द उत्पत्ति
आकाश अदिक पृथ्वी इन रचना अन्द वृत्तान्त ईद आद कि याग अव उत्पन्न आदव मतलब या दिशी यहोवा परमेश्वर पृथ्वी अदिक आकाश इक माळदुन: आग मैदान इन यातोदु पौधा जमीन मा ईला ईरोद, न मैदान इन यातोदु श्याण मार्र उगुसकु ईरोद, यतिकी यहोवा परमेश्वर पृथ्वी मा नीर ईला बरसुसीदुन, अदिक जमीन मा खेती माळोरसाटी याऊ मंळसा भी ईला ईरोन; तरी भी कोहरा पृथ्वी टु येळतोगोद यदुर देल पुरा जमीन हस आगतोगोद.
आग यहोवा परमेश्वर मंळसा अक जमीन इन मुण्ण देल माळदुन, अदिक आऊन मुग्ग दा जीवन इन श्वास ऊरदुन; अदिक मंळसा2 जित्ता प्राणी आगेदुन.3
अदिक यहोवा परमेश्वर पूर्व इन दी अदन दा ऊंद वाटीका हचदुन, अदिक अल मंळसा अक यारी आव माळीदुन, ईट बुट्टुन. अदिक यहोवा परमेश्वर जमीन टु सप्पा प्रकार इन मार्र, जो नोळदुर दा मन मोहक अदिक अऊर काय तीनदुर दा वळ्लेव आव, हचदुन, अदिक बगीचा अन बीच दा जीवन इन मार्र इक अदिक भला अदिक बुरा अन ग्यान इन मार्र भी हचदुन.4
आ वाटीका अक हस माळोरसाटी ऊंद महा गांगा अदन टु होळ्त अदिक अल टु मुंद वाळुसकु नाक धारागोळ दा वाटसेत.5 पयला धारा अन हेसुर पीशोन ईरोद; ईद अदा हुन जो हवीला हेसुर इन पुरा द्याश इक येल व्हान्ना सीकतद, घेरस्कु आद. आ द्याश इन व्हान्ना वळ्लीद ईरतद; अल मोती अदिक सुलैमानी कल्ल भी सीकताव. दुसरा गांगा अन्द हेसुर गीहोन आद; ईद अदा हुन जो कूश इन पुरा द्याश इक घेरस्कु आद. अदिक तीसरा गांगा अन्द हेसुर हिद्देकेल आद; ईद अदा हुन जो अश्शूर इन पूर्व इन दी वाहुसतद. अदिक चौथा गांगा अन्द हेसुर फरात आद.
आग यहोवा परमेश्वर मंळसा अक हुळकु अदन इन वाटीका दा ईट बुट्टुन, कि आव अल क्याल्सा माळुल अदिक आ वाटीका अन्द रक्षा माळुल. अदिक यहोवा परमेश्वर मंळसा अक ईद आग्या कोट्टुन, “नी वाटीका अन्द सप्पा मार्र इन काय बेझीझक आगकु तीन सकत्या; लेकीन भला या बुरा अन ग्यान इन जो मार्र आद, अदुर्द काय नी यागलु तिनबाळेत: यतिकी या दिशी नी अदुर्द काय तिनद्या अदा दिशी जरूर सोत्या.”6
बाक यहोवा परमेश्वर अंदुन, “आदम उन आबना ईरोद वळ्लीद हैलेच; ना आऊन साटी ऊंद उपयुक्त सहायक माळाईन जो आऊन से मेल तीनुल.” अदिक यहोवा परमेश्वर जमीन दा टु सप्पा जाती इन वनपशु अदिक आकाश इन सप्पा प्रकार इन पक्षीगोळ इक माळकु आदम उन हात्ती तंदुन कि आव नोळुल अदिक अऊर हेसुर येन येन ईटतान; अदिक आदम सप्पा जित्ता प्राणीगोळ इक जो जो हेसुर कोट्टुन, अदा अऊर हेसुर आगेत.7 अदिक आदम सप्पा मान्ना दाकळव पशुगोळ, आकाश इन पक्षीगोळ, अदिक जमीन इन सप्पा वनपशु उन हेसुर ईटदुन, लेकीन आदम उक योग्य सहायक सिकीदील.
आग यहोवा परमेश्वर आदम उक भारी जप दा हाकबुट्टुन, अदिक याग आव मींगेदुन आग आव आऊन ऊंद पसली तेगुकु अदुर जागा दा मास तुमदुन. अदिक यहोवा परमेश्वर आ पसली इक जो आदम दा टु तेगदीदुन, आर्त माळदुन; अदिक आकी आदम उन हात्ती तंदुन. आग आदम अंदुन,
“ईग ईक नान येलुगोळ दा टु येलु अदिक नान मास दा टु मास हुळ;
इदुरसाटी ईकीन हेसुर आर्त आदीत,
यतिकी ईक गंळ्स दा टु तेगुकु आग्यार.”8
ई कारण मंळसा तान मोय-आप्प उक बिटकु तान हिंग्स उन सांगुळ ईत्तान, अदिक आंदुर येढ्ढु मुंदुर ऊंद तन आदार.9
आदम अदिक आऊन हिंग्स येढ्ढु बिना कपळा देल ईरोर, लेकीन नाचोर ईला.
Source notes (9)
- Cross-reference इब्रानिगोळ 4:4-10
- Footnote पयला मंळसा आदम
- Cross-reference १ कुरिन्थि 15:45
- Cross-reference प्रकाशितवाक्य 2:7; 22:2; 2:14
- Cross-reference यहेजकेल 11:12
- Cross-reference रोमियों 6:23
- Cross-reference भजन संहिता 8:6
- Cross-reference उत्पत्ति 29:14; २ शमूएल 5:1; १ कुरिन्थि 11:8; १ तीमुथियुस 2:13
- Cross-reference मत्ती 19:5; १ कुरिन्थि 6:16; इफिसिगोळ 5:31
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.