यहेजकेल 47

मंदिर टु वाहुसतेला सोता

1बाक आव नानी भवन इन दरवाजा मा वापस वोतुन; अदिक भवन इन देवढी इन ल्यालमा टु ऊंद सोता होटकु पूर्व दी वाहुसोद. भवन दरवाजा रा पूर्वमुखी ईरोद, अदिक सोता भवन इन ऊजवा दी अदिक वेदी इन दक्षीणी दी ल्यालमा टु होळ तोगोद. 2आग आव नानी उत्तर इन फाटक टु आगकु व्हार्या वोतुन, अदिक व्हार्या व्हार्या टु तिर्गुसकु व्हार्या मतलब पूर्वमुखी फाटक इन हाती पोहचुसदुन, अदिक दक्षीणी इन दी टु नीर वाहुसोद. 3याग आव मंळसा कय दा नापसोद डोरी हुडुकु पूर्व दी होट्टुन, आग आऊन भवन टु हडुकु, हजार कय ताका आ सोता अक नाप्सदुन, अदिक नानी नीर दा टु नळ्सदुन, अदिक नीर ट्वांगरा ताका ईरोद. 4बाक आव हजार कय माप्सकु नानी नीर दा टु नळ्सदुन, अदिक नीर ट्वांगरा ताका ईरोद, बाक अदिक हजार कय माप्सकु नानी नीर दा टु नळ्सदुन, अदिक नीर नेळु ताका ईरोद. 5आग आव ऊंद हजार कय नाप्सदुन, अदिक हींग गांगा आगेत यदुर आप्पाटी ना होग सकीदील, यतिकी नीर वाळुसकु तैरूसा लायक ईरोद; मतलब हींग गांगा ईरोद यदुर आप्पाटी याऊ होग ईला सकोन. 6आग आव नान से केळदुन , “हे मंळसा अन सन्तान, येन नी नोळ्या?” आग आव नानी गांगा अन किनारा किनारा वापस माळकु पोहचुस बुट्टुन. 7वापस बंदकु ना येन नोळदीन, कि गांगा अन किनारा मा हापाळ सा मार्र आव. 8आग आव नान से अंदुन, “ ईद सोता पूर्वी द्याश इन दी वाहुसीत्याद, अदिक अराबा दा ईळकु ताल दी वाहुसीत; अदिक भवन टु होटकु सीधा ताल दा मीलुसेदीत; अदिक अदुर नीर सय आगेदीत. 9येल येल गांगा वाहुसीत, अल अल सप्पा प्रकार इन हापाळ तत्ती कोळावाळा जीवजन्तु जीऊसेव अदिक मेनगोळ भी हापाळ आगेदव; यतिकी ई सोता अन नीर अल पोहचुस्याद, अदिक ताल इन नीर सय आगेदीत; अदिक येल्यारा भी ईद गांगा पोहचुसीत अल सप्पा कीळा जीऊसेव. 10ताल इन तट मा मेन हुडावाळेर नीदुरकु ईत्तार, अदिक एनगदी टु हुडुकु ऐनेग्लैम ताका अल जाल फैलुसकु आदव, अदिक आंदरी महासागर इन घाई अलग अलग इन अनगीनत मेनगोळ सिक्‍केव. 11लेकीन तल इन हाती जो दलदल अदिक गड्डागोळ आव, अऊर नीर सय ईरतीदील; अव खर्ट अच ईत्तव. 12गांगा अन येढ्ढु किनारा मा अलग अलग प्रकार ईनव तीना लायक फलदायी मार्र आदव, यदुरव याल्ला चीम्सतीदील अदिक अऊरव फलसोद भी यागलु बंद आगतीदील, यतिकी गांगा अन नीर पवित्र जागा टु होटाद. अऊर दा तींगुळ तींगुळ व्हासा व्हासा काय हत्तेव. अऊरव काय तीनोर, अदिक याल्ला औषध इन क्याल्सा दा बंदव.”

द्याश इन सीमागोळ

13परमेश्वर यहोवा ईद अनतान: “या सीमा अन बुळ्क नीमी इक ई द्याश तान हन्नेळ गोत्रगोळ अनुसार वाटसोद बीद्दीत, अद ईद हुन: यूसुफ उक येढ्ढ भाग सीकुल.” 14अदरी नीव आबुर दाबुर घाई खुद इन हिस्सा दा नोळीर, यतिकी ना किर्‍या तिंदीन कि अदरी नीम आप्पगोळी कोळाईन, ईदुरसाटी ईद द्याश नीम्द खुद इन हिस्सा ठहरूसीत. 15“द्याश इन सीमा ईद आगुल: मतलब उत्तरी दीकळोद सीमा महासागर टु हडुकु हेतलोन इन हाती टु सदाद इन घाटी ताका पोहचुसुल, 16अदिक आ सीमा अन हाती हमात बेरोता, अदिक सिब्रैम जो दमिश्क अदिक हमात इन सीमागोळ न्याड्या दा आव, अदिक हसर्हत्तीकोन ताका, जो हौरान इन सीमा मा आद. 17ईद सीमा समुद्र टु हुडुकु दमिश्क इन सीमा अन हाती इन हसरेनोन ताका पोहचुसुल, अदिक अदुर उत्तर दी हमात ईरूल. उत्तर इन सीमा ईदा आगुल. 18पुर्वी सीमा यदुर ऊंद दी हौरान दमिश्क; अदिक यरदन इन दी गिलाद अदिक इस्त्राएल इन द्याश ईरूल; उत्तरी सीमा टु हुडुकु पुर्वी ताल ताका अदरी नापसेत. पुर्वी सीमा रा ईदा आगुल.” 19दक्षीणी सीमा तामार टु हुडुकु कादेश इन मरीबोत हेसुर इन सोता ताका मतलब मिस्त्र अन नाला ताका, अदिक महासागर ताका पोहचुसुल. दक्षीणी सीमा ईला आगुल. 20पश्चिमी सीमा दक्षीणी सीमा टु हुडुकु हमात इन घाटी इन मुंद ताका अन महासागर ईरूल. पश्चिमी सीमा ईवा आगुल. 21“ई प्रकार द्याश इक इस्त्राएल इन गोत्रगोळ अनुसार आपस दा वाट्स कोमेतीर. 22ईदरी आपस दा अदिक आ परदेशीगोळ सांगुळ वाट्स कोमेतीर, जो नीम न्याड्या ईरतेला चिकोरगोळी पैदा माळुल. आंदुर नीम नजर दा देशी इस्त्राएलगोळ घाई ठहरूसुल, अदिक नीम गोत्रगोळ न्याड्या तान तान भाग पाऊसुल. 23जो परदेशी याता गोत्र अन द्याश दा ईरतीदान, आऊक अदा भाग कोळेतीर, परमेश्वर यहोवा अन ईदा वाणी आद.”