परमेश्वर उन वचन
यहेजकेल 45
द्याश इन जमीन दा परमेश्वर उन हिस्सा
याग नीव चिट्टी हाक्कु द्याश इन वाटसीर, आग द्याश दा टु ऊंद हिस्सा पवित्र जान्सकु यहोवा अक अर्पण माळेतीर; अदुर लंबाई पच्चीस हजार बास इन अदिक चौळाई हत्त हजार बास इन आगुल, अद भाग तान नाकु दीकळोद सीमा ताका पवित्र ठहरूसुल. अदुर दा टु पवित्र जागा अन साटी अईद सौ बास लंबा अदिक अईद सौ बास चौळा चौकोन जमीन आगुल, अदिक अदुर नाकु दी पचास पचास कय चौळा जमीन बिटकु बीदकु ईरूल. आ पवित्र भाग दा नीव पच्चीस हजार बास लंबा अदिक हत्त हजार बास चौळा जमीन इक नाप्सेत, अदिक अदुर दा पवित्र जागा माळेत, जो परमपवित्र ठहरूसुल. जो याजक पवित्र जागा अन स्यावा टहल माळुल अदिक यहोवा अन स्यावा टहल माळली हात्ती बरूल, अद आंदुर अच साटी आगुल; अल आंदुर मान्नागोळ साटी जागा आगुल अदिक पवित्र जागा अन साटी पवित्र ठहरूसुल. बाक पच्चीस हजार बास लंबा, अदिक हत्त हजार बास चौळा ऊंद भाग, भवन इन स्यावा टहल माळावाळेर लेवीगोळी ईप्पत कोठरीगोळ साटी आगुल. “बाक नगर इन साटी, अर्पण माळदव पवित्र हिस्सा अन हाती नीव अईद हजार बास चौळा अदिक पच्चीस हजार बास लंबा, खास जमीन ठहरूसेत; अद इस्त्राएल उन सप्पा घराना साटी आगुल.”
प्रधान उन साटी जमीन
प्रधान उन खुद इन हिस्सा अर्पण माळदव हिस्सा अदिक नगर इन खास जमीन इन येढ्ढु दी मतलब येढ्ढु उन पश्चिम अदिक पूर्व दिशागोळ दा येढ्ढु हिस्सागोळ मुंद ईरूल; अदिक अदुर लंबाई पश्चिम टु हुडुकु पूर्व ताका आ येढ्ढ हिस्सागोळ दा टु यातारा ऊंद इन तुल्य ईरूल. इस्त्राएल उन द्याश दा प्रधान उन ईदा खुद इन जमीन आगुल. नान ठहरूसदोर प्रधान नान प्रजा मा मात्त अंधेर माळबाळुल; लेकीन इस्त्राएल उन घराना अक आऊन गोत्रगोळ अनुसार द्याश सीकुल.
प्रधान उन साटी नियम
“परमेश्वर यहोवा ईद अनतान: हे इस्त्राएल उन प्रधानगोळा! बस माळी, झगळा अदिक उत्पाद इक दुर माळी, अदिक न्याय अदिक धर्म इन क्याल्सा माळतोगी; नान प्रजा अन लॉकुर इक तेगोद बीट्टबुळी, परमेश्वर यहोवा अन ईदा वाणी हुन.”
“नीम हाती सच्चा तराजु, सच्चा एपा, अदिक सच्चा बट ईरूल. एपा अदिक बट येढ्ढु ऊंद अच नाप इन ईरूल, मतलब येढ्ढु दा होमेर उन हतवा अंश समुसुल; येढ्ढु अन नाप होमेर इन हिसाब घाई ईरूल. शेकेल ईप्पत गेरा अन ईरूल; अदिक नीम्द माना ईप्पत, पच्चीस, या पन्द्रह शेकेल इन ईरूल.”
“नीम्द नेग्द भेंट ईद ईरूल, मतलब गोदी अन होमेर टु एपा अन आरवा अंश, अदिक जौ इन होमेर दा एपा अन आरवा अंश कोळेत. याण्णा अन नियत अंश कोर दा टु हतवा अंश आगुल; कोर रा हत्त बट मतलब ऊंद होमेर इन तुल्य आद, यतिकी होमेर हत्त बत इन ईरतद. इस्त्राएल इन वळ्लीद वळ्लीद चराईगोळ से येढ्ढ येढ्ढ सौ मर्र-म्यांढ्ढा दा टु ऊंद मर्र या म्यांढ्ढा कोटकु आगुल. ईव सप्पा वस्तुगोळ अन्नबली अदिक मेलबली इन साटी कोटकु आगुल यदुर देल आंदुर साटी प्रायश्चित माळकु आगुल, परमेश्वर यहोवा अन ईदा वाणी आद. इस्त्राएल उन प्रधान इन साटी द्याश इन सप्पा लॉकुर ईद भेंट कोळुल. हाब्बगोळ, व्हासा चाँद इन दिनगोळ, आराम दिनगोळी अदिक इस्त्राएल इन घराना अन सप्पा नियत हाब्बगोळ दा होमबली, अन्नबली, अदिक अर्घ कोळेत प्रधान उन अच क्याल्सा ईरूल. इस्त्राएल उन घराना साटी प्रायश्चित माळली अद पापबली, अन्नबली, होमबली, अदिक मेलबली तैयार माळुल.”
हाब्ब
परमेश्वर यहोवा ईद अनतान: पयला तींगुळ इन पयला दिशी इन नी ऊंद निर्दोष पाड्डा हुडुकु पवित्र जागा अक पवित्र माळेत. ई पापबली इन रक्ता दा टु याजक येनारा हुडुकु भवन इन चौखट इन खंबागोळ, अदिक वेदी इन कुर्चीगोळ नाकु क्वाना, अदिक बुळ्कळोद आंगुळ इन फाटक इन खंबागोळ मा हचुल. बाक भुल देल आग्यानतावश यार पाप माळीदार आंदुर साटी तींगुळ इन येळवा दिन इन भी ईद अच माळेत; ईदा प्रकार देल भवन इन साटी प्रायश्चित माळेत. “पयला तींगुळ इन चौदावा दिशी नीम्द फसह आगतेला ईरूल, अद येळ दिन इन हाब्बा इरूल अदिक अदुर दा अखमीरी रोट्टी तीनकु आगुल. आ दिशी प्रधान तान अदिक प्रजा अन सप्पा लॉकुर निम्मित ऊंद पाड्डा पापबली इन साटी तैयार माळुल. हाब्ब इन येळु दिशी आव यहोवा अन साटी होमबली तैयार माळुल, मतलब हर ऊंद दिशी येळ येळ निर्दोष पाड्डागोळ अदिक येळ येळ निर्दोष म्यांडागोळ अदिक रोज ऊंद ऊंद व्हात पापबली इन साटी तैयार माळुल. हर ऊंद पाड्डा अदिक म्यांडा अन सांगुळ आव एपा तीम अन्नबली, अदिक एपा हींद हीन तीन याण्णा तैयार माळुल. येळवा तींगुळ इन पंदरा दिन टु हुडुकु येळ दिन ताका मतलब पूर्व इन दीनगोळ दा अद पापबली, होमबली, अन्नबली, अदिक याण्णा ईदा विधी अनुसार माळ तोगुल.”
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.