यहेजकेल 42

मंदिर इन हाती उपस्थित येढ्ढ कोठरीगोळ

1बाक आव नानी व्हार्या आंगुळ दा उत्तर इन दी वोतुन, अदिक नानी आ येढ्ढ कोठरीगोळ हाती तंदुन जो भवन इन आंगुळ इन मुंद अदिक अदुर उत्तर इन दी ईरोद. 2सौ कय इन दुरी मा उत्तरी दरवाजा ईरोद, अदिक चौळाई पचास इक इन ईरोद. 3बुळ्कळोद आंगुळ इन ईप्पत कय मुंद अदिक व्हार्या आंगुळ इन फर्ची इन मुंद मुरु मंजील दा सज्जा ईरोव. 4कोठरीगोळ मुंद बुळ्क इन दी होगोद हत्त कय चौळा ऊंद हादी ईरोद; अदिक कय तीम इन ऊंद अदिक हादी ईरोद; अदिक कोठरीगोळ्द दरवाजा उत्तर इन दी ईरोव. 5म्याकुच कोठरीगोळ श्याण्णेव ईरव, मतलब सज्जागोळ कारण अव ल्यालमा अदिक न्याड्या अन कोठरीगोळ से श्यांण्द ईरोद. 6यतिकी अव मुर मंजील ईरोद, अदिक आंगुळगोळ घाई अऊरव खंबा ईला ईरव; ई कारण म्याकुच इन कोठरीगोळ ल्यालमा अदिक न्याड्या अन कोठरीगोळ से श्याण्णेव ईरव. 7जो दिवाल कोठरीगोळ मुंद व्हार्या आस पास ईरव मतलब कोठरीगोळ मुंद व्हार्या आंगुळ इन दी ईरव, अदुर लंबाई पचास कय इन ईरोद. 8यतिकी व्हार्या अन आंगुळ कोठरीगोळ पचास कर लंबा ईरोद, अदिक मंदिर इन मुंद इन अलंग सौ कय इन ईरोद. 9ई कोठरीगोळ ल्यालमा पूर्व इन दी हादी ईरोद, येल लॉकुर व्हार्या अन आंगुळ टु इऊर दा होगतोगोर. 10आंगुळ इन दिवाल इन चौळाई दा पूर्व इन दी अलग अलग जागा अदिक भवन येढ्ढु उन मुंद कोठरीगोळ ईरव. 11अऊर मुंदळोद हादी उत्तरी कोठरीगोळ हादी घाई ईरोद; अऊर लंबाई-चौळाई बराबर ईरोद अदिक निकास अदिक ढंग अऊर दरवाजा अन घाई ईरव. 12दक्षिणी कोठरीगोळ दरवाजा अन अनुसार हादी इन ताल्ला मा दरवाजा ईरोद, मतलब पूर्व इन दी दिवाल इन मुंद, येल टु लॉक अऊर दा प्रवेश माळ तोगोर. 13बाक आव नान से अंदुन, “ईव उत्तरी अदिक दक्षिणी कोठरीगोळ जो आंगुळ इन मुंद आव, अव अच पवित्र कोठरीगोळ हुव, यदुर दा यहोवा अन हाती होगावाळेर याजक परमपवित्र वस्तुगोळ तीन तोदार, अव परमपवित्र वस्तुगोळ, अदिक अन्नबली, अदिक पापबली, अदिक दोषबली, अल्या ईट्यार; यतिकी अद जागा पवित्र आद. 14याग याग याजक लॉकुर बुळ्क होदार, आग आग होळा समय आंदुर पवित्र जागा टु व्हार्या आंगुळ दा हींग अच होळतीदील, मतलब आंदुर पयले तान स्यावा टहल इन कपळा पवित्र जागा दा ईट कोंडार; यतिकी ईव कोठरीगोळ पवित्र आव. आग आंदुर दुसरा कपळा हाक्कु साधारण लॉकुर जागा दा होदार.”

मंदिर क्षेत्र अन नाप

15याग आव बुळ्कळोद भवन इन नाप्स कोंडुन, आग नानी पूर्व दिशा अन फाटक इन हादी टु व्हार्या वोतकु व्हार्या अन जागा नाकु दी नाप्सली कुरतुन. 16आव पूर्वी इक नाप्सोद बास देल नाप्सकु अईद सौ बास इन पाऊसदुन. 17आग आव उत्तरी इक नाप्सोर बास देल नाप्सकु अईद सौ बास इन पाऊसदुन. 18आग आव दक्षणी इक नाप्सोर बास देल नाप्सकु अईद सौ बास इन पाऊसदुन; 19अदिक पश्चिम इन दी तिर्गकु आव नाप्सोर बास देल नाप्सकु अदरी अईद सौ बास इन नोळदुन. 20आव आ जागा अन नाकु सीमागोळ नाप्सदुन, अदिक अदुर नाकु दी ऊंद दिवाल ईरोद, अद अईद सौ बास लंबा अदिक अईद सौ बास चौळा ईरोद, अदिक ईदुरसाटी बन्सकु ईरोद कि पवित्र अदिक सर्वसाधारण इक अलग अलग माळुल.