यहेजकेल 39

गोग राज्य अन पराजय

1“बाक हे मंळसा अन सन्तान, गोग इन विरूद्ध भविष्यवाणी माळकु अन, हे गोग, हे रोश, मेशेक अदिक तूबल उन प्रधान, परमेश्वर यहोवा ईद अनतान: ना नीन विरूद्ध आईन. 2ना नीनी तिर्गुसकु तराईन, अदिक उत्तर दिशा अन दुर दुर द्याशगोळ से येर्सकु तराईन, अदिक इस्त्राएल इन पहाळीगोळ मा पोहचुसाईन. 3अल ना नीन धनुष नीन डाक्या कय देल केडाईन, अदिक नीन तीरगोळी नीन ऊजवा कय देल केळसुस बुळाईन.” 4नी तान सप्पा दलगोळ अदिक तान सांगुळ इन सप्पा जातीगोळ सांगुळ इस्त्राएल इन पहाळीगोळ मा कोंदकु आदान; ना नीनी अलग अलग मासाहारी पक्षीगोळ अदिक आळी दाकळव जनावरगोळ्द भोजन माळ कोमाईन. 5नी केई दा बीद्या, यतिकी ना अच हींग अंदीन, परमेश्वर यहोवा अन ईदा वाणी हुन. 6ना मागोग नगर दा अदिक द्वीपगोळ निडर ईरावाळेर न्याड्या बेक्की हचाईन; अदिक आंदुर जान्स कोंडार कि ना यहोवा हुईन.

7“ना तान प्रजा इस्त्राएलगोळ न्याड्या तान क्याल्सा प्रगट माळाईन; अदिक तान पवित्र हेसुर मात अपवित्र आग गोळतीदील; आग राज्य राज्य अन लॉकुर भी जान्स कोंडार कि ना यहोवा, इस्त्राएल उन पवित्र हुईन. 8ईद घटना आगावाळा आद अदिक अद आगेदीत, परमेश्वर यहोवा अन ईदा वाणी आद. ईद अदा दीन हुन यदुर्द चर्चा ना माळीन.”

9“आग इस्त्राएल नगर दाकळोर ईरावाळेर होट्टार अदिक हथियारगोळी बेक्की हचकु होताक कोंडार, ढाल, अदिक फरी, धनुष, अदिक तीर, कोल, बर्छा, सप्पा अक आंदुर येळ वर्ष ताका होताकतेला ईत्तार. 10ईदुर कारण आंदुर मैदान दा हुळ्ली बीनुसतीदील, न आळी दा कळदार, यतिकी आंदुर हथियार इक अच होताक तोदार, आंदुर तान लुट्सावाळेर इक अच लुटस्यार, अदिक कसावाळेर से कसतार, परमेश्वर यहोवा अन ईदा वाणी हुन.”

गोग राजा अक नळ्सकु आगोद

11“आ समय ना गोग राज्य अक इस्त्राएल इन द्याश दा कब्रस्तान कोळाईन, अद ताल इन पूर्व दी ईत्तीत; अद होगा बरावाळेर्द तराई अनकु आदीत. अदिक होगा बरावाळेर इक अल रूकसोद बिद्दीत; अल सप्पा बीळ सांगुळ गोग इक मुण्ण कोटकु आदीत अदिक आ जागा अन हेसुर गोग इन भीळ इन तराई बिद्दीत. 12इस्त्राएल उन घराना आंदरी येळ तींगुळ ताका मुण्ण कोळतेला ईत्तीत ताकी तान द्याश उक शुद्ध माळुल. 13द्याश इन सप्पा लॉकुर मिलुस्कु आंदरी मुण्ण कोट्टार; अदिक या समय नान महिमा आदीत, आ समय आंदुर्द भी हेसुर धोळ्द आदीत, परमेश्वर यहोवा अन ईदा वाणी हुन. 14आग आंदुर मंळसागोळी नीवळुस्यार, जो हमेशा ईदा क्याल्सा दा हतकु ईत्तार, मतलब द्याश दा वयाळ वयाळकु होगा बरावाळेर सांगुळ द्याश इक शुद्ध माळोर साटी आंदरी जो जमीन इन म्याकुच बिदकु आर, मुण्ण कोट्टार; अदिक येळ दीन तिंगुळ इन बितुसदुर ताका आंदुर ढुंढ्स ढुंढ्सकु ईद क्याल्सा माळतेला ईत्तार. 15द्याश दा होगा बरावाळेर दा टु याग यावारा मंळसा अन येलु नोळुल, आग आऊन हाती ऊंद चिन्ह नीदरूस्यान, ईद आ समय ताका बन्सकु ईत्तीत यागासताका मुण्ण कोळावाळेर अदरी गोग इन भीळ इन तराई दा नळ्स कोमालुर. 16अल नगर इन हेसुर भी ‘हमोना’ आद. ईद द्याश शुद्ध माळकु आदीत.”

17“बाक हे मंळसा अन सन्तान, परमेश्वर यहोवा ईद अनतान: अलग अलग सप्पा पक्षीगोळ अदिक सप्पा आळी दाकळव जनावरगोळी आग्या कोळ, जमा आगकु बरी, ना ई धोळ्द यग्य दा जो ना नीम साटी इस्त्राएल इन पहाळीगोळ मा माळतीन, हर ऊंद दिशा टु जमा आगी कि नीव मास तिनी अदिक रक्ता कुडी. 18नीव शुरवीरगोळ्द मास तिंदीर, अदिक पृथ्वी इन प्रधानगोळ्द रक्ता कुळदीर अदिक म्यांडा, पाड्डा, व्हातगोळ, अदिक वस्तागोळ्द भी जो सप्पा चा सप्पा बाशान इन तैयार माळकु ईत्तव. 19ना आ भोज इन ण्याण टु जो ना नीम साटी तैयार माळतीन, नीव तिंत तिंत मटसेदीर, अदिक अदुर रक्ता कुडुत कुडुत छकसेदीर. 20नीव नान मेज मा घ्वाळा, सवारगोळ, शूरवीरगोळ, अदिक सप्पा प्रकार इन योध्दागोळ से तृप्त आदीर, परमेश्वर यहोवा अन ईदा वाणी हुन.”

इस्त्राएल इन दुबारा स्थापना

21“ना राज्य राज्य अन न्याड्या तान महिमा प्रगट माळाईन, अदिक राज्य राज्य सप्पा लॉकुर नान न्याय इन क्याल्सा जो ना माळाईन, अदिक नान कय जो आंदुर मा बीद्दीत, नोळ कोंडेव. 22आ दीन टु मुंद इस्त्राएल उन घराना जान्स कोंडीत कि यहोवा नामव परमेश्वर हुन. 23राज्य राज्य अन लॉकुर भी जान्स कोंडार कि इस्त्राएल उन घराना तान अधर्म इन कारण गुलामी दा होगीत; यतिकी आंदुर नान से हींग विश्वासघात माळदुर कि ना आंदुर से तान बाय फेर्स कोंडीन अदिक आंदरी आंदुर दुश्मनगोळ वश दा माळ कोंडीन, अदिक आंदुर सप्पा तलवार देल कोंदकु आदुर. 24ना आंदुर्द अशुध्दता अदिक अपराधगोळ्द अच अनुसार आंदुर से बर्ताव माळकु आंदुर से तान बाय फेर्स कोंडीदीन.” 25“ईदुरसाटी परमेश्वर यहोवा ईद अनतान: ईग ना याकूब उक गुलामी देल वापस तराईन, अदिक इस्त्राएल इन सप्पा घराना मा दया माळाईन; अदिक तान पवित्र हेसुर इन साटी नानी जलन आदीत. 26आग आ सप्पा विश्वासघात इन कारण जो आंदुर नान विरूद्ध माळदुर आंदुर लज्जित आदार; अदिक तान द्याश दा निडर ईत्तार; अदिक याऊ आंदरी अंजुसतीदील. 27याग ना आंदरी राज्य राज्य अन न्याड्या टु वापस तराईन, अदिक आ दुश्मनगोळ द्याशगोळ टु जमा माळाईन, आग हापाळ जातीगोळ्द नजर दा आंदुर द्वारा पवित्र ठहरूसाईन. 28आग आंदुर जान्स कोंडार कि यहोवा नामव परमेश्वर हुन, यतिकी ना आंदरी राज्य राज्य दा गुलाम माळकु आंदुर खुद इन द्याश दा जमा माळदीन. ना आंदुर दा टु यारीकु मात परदेश दा बिळतीदील, 29अदिक आंदुर से तान बाय मात यागलु तिर्गुसतीदील, यतिकी ना इस्त्राएल उन घराना मा तान आत्मा हाक्कीन, परमेश्वर यहोवा अन ईदा वाणी हुन.”