यहेजकेल 37

वळ्गींद येलुगोळ्द घाटी

1यहोवा अन ताकत नान मा आत, अदिक आव नान दा तान आत्मा हाक्कु व्हार्या वोतुन अदिक नानी घाटी इन न्याड्या नीदरूसदुन; अद घाटी येलुगोळ देल तुमकु ईरोद. 2आग आव नानी आंदुर नाकु दी वयाळसदुन, अदिक घाटी इन तह मा हापाळ सा येलुगोळ ईरव; अदिक अव हापाळ वंळ्गेव ईरव. 3आग आव नान से केळदुन, “हे मंळसा अन सन्तान, येन ईव येलुगोळ जीऊस सकताव?” ना अंदीन, “हे परमेश्वर यहोवा, नी अच जान्सत्या.” 4आग आव नान से अंदुन, “ई येलुगोळ से भविष्यवाणी माळकु अन, हे वळ्गींद येलुगोळा, यहोवा अन वचन केळी. 5परमेश्वर यहोवा नीम येलुगोळ से ईद अनतान: नोळी, ना खुद अच नीम दा श्वास हाकाईन, अदिक नीव जीत्ता आदीर. 6ना नीमव नसगोळ पैदा माळकु मास येरसाईन, अदिक नीमी तोगुल देल ढापसाईन; अदिक नीम दा श्वास समुसाईन अदिक नीव जीऊसीर; अदिक नीव जान्स कोंडीर कि ना यहोवा हुईन.” 7ई आग्या अन अनुसार ना भविष्यवाणी माळली कुरतीन; अदिक ना भविष्यवाणी माळीन अच, कि ऊंद आहट बत्त, अदिक भुईंडोल आत, अदिक अव येलुगोळ जमा आगकु येलु से येलु जुळसेत. 8ना नोळतेला ईत्तीन, कि अऊर दा नसगोळ पैदा आदव अदिक मास बत, अदिक अद म्याकुच इन तोगुल देल ढपसेत; लेकीन अऊर दा श्वास येनु ईला ईरोद. 9आग आव नान से अंदुन, “हे मंळसा अन सन्तान, श्वास देल भविष्यवाणी माळ, अदिक श्वास देल भविष्यवाणी माळकु अन, हे श्वास परमेश्वर यहोवा ईद अनतान: नाकु दिशागोळ से बंदकु ई घात माळदुर दा समुसेग कि ईंदुर जीत्ता आगुल.” 10आऊन ई आग्या अन अनुसार ना भविष्यवाणी माळदीन, आग श्वास आंदुर दा होट्ट बत्त, अदिक आंदुर जीऊसकु तान तान कालगोळ बल मा नीदरेदुर; अदिक हापाळ सा धोळ्द सेना आगेत. 11बाक आव नान से अंदुन, “हे मंळसा अन सन्तान, ईव येलुगोळ इस्त्राएल इन सप्पा घराना अन उपमा हुन. आंदुर अनतार, नामव येलुगोळ वंळ्गेग्याव, अदिक नाम्द आशा होगतेला ईत्त; नाव पुरा रीति देल कळदोगेव 12ई कारण भविष्यवाणी माळकु आंदुर से अन, परमेश्वर यहोवा ईद अनतान: हे नान प्रजा अन लॉकुरा, नोळी, ना नीमव कब्रगोळी खोल्सकु नीमी आंदुर से तेगाईन, अदिक इस्त्राएल इन द्याश दा पोहचुस बुळाईन. 13ईदुरसाटी याग ना नीम कब्रगोळी खोलसाईन, अदिक नीमी आऊर दा टु तेगु कोमाईन, आग हे नान प्रजा अन लॉकुरा, नीव जान्स कोंडीर कि ना यहोवा हुईन. 14ना नीम दा तान आत्मा समुसाईन, अदिक नीव जीऊसीर; अदिक नीमी नीम खुद इन द्याश दा बसुसाईन; आग नीव जान्स कोंडीर कि ना यहोवा अच ईद अंदीन, अदिक माळीन भी, यहोवा अन ईदा वाणी हुन.”

यहूदा अदिक इस्त्राएल ऊंद अच राज्य

15बाक यहोवा अन वचन नान हाती पोहचुस्त: 16“हे मंळसा अन सन्तान, ऊंद हुळ्ली हुडुकु अदुर मा लिख्स, यहूदा अन अदिक आऊन संगी इस्त्राएलगोळ्द; आग दुसरा हुळ्ली हुडुकु अदुर मा लिख्स, ‘यूसुफ उन मतलब एप्रैम उन, अदिक आऊन संगी इस्त्राएलगोळ्द हुळ्ली. 17बाक आ हुळ्लीगोळी आबुर दाबुर से जोळ्सकु ऊंद अच माळकोम कि अव नीन कय दा ऊंद अच हुळ्ली आगेगुल. 18याग नीन लॉकुर नीन से केळुल, येन नी नामी हेळ्या कि ईंदुर से नीन येन अभीप्राय आद?’ 19आग आंदुर से अनेत, परमेश्वर यहोवा ईद अनतान: नोळी, ना यूसुफ उन हुळ्ली इक जो एप्रैम उन कय दा आद, अदिक इस्त्राएल उन जो गोत्र आऊन संगी आर, आंदरी हुडुकु यहूदा अन हुळ्ली देल जोळ्सकु आंदुर सांगुळ ऊंद अच हुळ्ली माळ कोमाईन; 20या हुळ्लीगोळ मा नी हींग लिखस्या, अव आंदुर मुंद नीन हाती ईरूल. 21आग नी आ लॉकुर से अन, परमेश्वर यहोवा ईद अनतान: नोळी, ना इस्त्राएलीगोळी आ राज्यगोळ दा टु हुडुकु येल आंदुर होटोग्यार, नाकु दी जमा माळाईन; अदिक आंदुर खुद इन द्याश दा पोहचुसाईन. 22ना आंदुर आ द्याश मतलब इस्त्राएल इन पहाळीगोळ मा ऊंद अच राज्य माळ कोमाईन; अदिक आ सप्पा अन ऊंद अच राज्य ईत्तीत; अदिक आंदुर बाक येढ्ढ ईरतीदील अदिक ना येढ्ढ राज्य दा कभी वाटस्यार. 23आंदुर बाक तान मुरतीगोळ, अदिक घिनोना क्याल्सागोळ या तान यातोदारा पाप इन द्वारा तान इक अशुध्द माळतीदील; लेकीन ना आंदरी आ सप्पा मोहल्लागोळ से, येल आंदुर पाप माळतोगोर, तेगुकु शुद्ध माळाईन, अदिक आंदुर नान प्रजा आदार, अदिक ना आंदुरव परमेश्वर आगाईन. 24नान दास दाऊद आंदुरव राजा आदान; अदिक आ सप्पा अन ऊंद अच चरवाहा आदान. आंदुर नान नियमगोळ मा नळदार अदिक नान विधीगोळ इक मान्सकु अऊर अनुसार नळदार. 25आंदुर आ द्याश दा ईत्तार यदरी ना तान दास याकूब उक कोटीदीन; अदिक येल नीमोर आप्प दादागोळ ईरतोगोर, अदुर दा आंदुर अदिक आंदुर पारगोळ-नातुगोळ सदा बसुसकु ईत्तार; अदिक नान दास दाऊद सदा आंदुरव प्रधान ईत्तान. 26ना आंदुर सांगुळ शांती इन वादा माळाईन; अद सदा अन वादा ठहरूसीत; अदिक ना आंदरी जागा कोटकु गिनती दा वाळुसाईन, अदिक आंदुर न्याड्या तान पवित्र जागा सदा माळकु ईटाईन. 27नान निवास इन ड्यारा आंदुर म्याकुच ईत्तीत; अदिक ना आंदुरव परमेश्वर आगाईन, अदिक आंदुर नानोर प्रजा आदार. 28याग नान पवित्र जागा आंदुर न्याड्या सदा अन साटी ईत्तीत, आग सप्पा राज्य जान्स कोंडीत कि ना यहोवा इस्त्राएल उन पवित्र माळावाळा हुईन.”