यहेजकेल 27

सोर नगर इन साटी दुख इन हाळ

1बाक यहोवा अन ईद वचन नान हाती पोहचुस्त, 2“हे मंळसा अन पारा, सोर उन बारा दा ऊंद दुख इन हाळ माळकु आऊन से ईद अन, 3हे समुद्र अन प्रवेश द्वार मा ईरावळ्त, हे हापाळ सा द्वीपगोळ साटी द्याश द्याश इन लॉकुर सांगुळ व्यापार माळावळ्त, परमेश्वर यहोवा ईद अनतान: हे सोर, नी अंद्या कि ना सर्वांग सुन्दर आईन. 4नीन सीमा समुद्र अन न्याड्या आद; नीन माळावाळा नीनी सर्वांग सुन्दर माळदुन. 5नीन सप्पा पटरीगोळ सनीर पहाळी इन सनौवर इन हुळ्ली इन माळकु आद; नीन मस्तूल इन साटी लबानोन उन देवदार साटी होग्यार. 6नीन डाड बाशान प्रदेश इन बांज मार्रगोळ आग्याव; नीन ड्वांगागोळ पटाव कित्तिगोळ द्वीपगोळ से तनकु सीधा सनौवर इन हत्ती अन हल्ल हतकु हुळ्ली देल आत. 7नीन ड्वांगागोळ्द पाल मिस्त्र टु तनकु बूटेदार सन इन कपळा बन्सदव कि नीन साटी झण्डा अन क्याल्सा कोळुल; नीन चांदनी एलीशा अन द्वीप देल लादुसकु नीळा अदिक जांभळा रंग इन रंग इन कपळा अन माळकु आत. 8नीन खेऊसावाळा सीदोन अदिक अर्वद इन ईरावाळेर ईरोर; हे सोर, नींद अन न्याड्या अन बुद्धिमान लॉकुर नीनोर माँझी ईरोर. 9नीनोर कारीगर गबल नगर इन हाळाबाट्टुर अदिक बुद्धिमान लॉकुर ईरोर; नीन दा व्यापार माळोर साटी मल्लाहगोळ सांगुळ समुद्र माकळव सप्पा ड्वांगा नीन दा होट्ट बंदीदव.” 10नीन सेना फारसी, लूद, अदिक पूत जात इन लॉकुर भरती आगीदुर; आंदुर नीन दा ढाल, अदिक टोपी टांग्सदुर; अदिक आंदुर्द अच कारण नीन प्रताप वाळुस्त. 11नीन शहरपनाह मा नीन सेना अन सांगुळ अर्वद इन नाकु दी ईरोर; अदिक नीन गुम्मटगोळ दा शूरवीर निदुरकु ईरोर; आंदुर तान ढालगोळ नीन नाकु दीकळोद शहरपनाह मा टांग्सदुर; नीन सुंदरता आंदुर द्वारा पुरा आगीत.

12“तान सप्पा प्रकार इन सम्पत्ति इन बहुतायत इन कारण तर्शीशी लॉकुर नीन व्यापारी ईरोर; आंदुर बेळ्ली, लोहा, टीन अदिक सीसा कोटकु नीन माल कोंड कोंडुर. 13यावान, तूबल, अदिक मेशेक इन लॉकुर नीन माल इन बदला दास दासी अदिक पीतल इन बरतन नीन से व्यापार माळतार. 14तोगर्मा अन घराना अन लॉकुर इन सम्पत्ती ताकोमकु घ्वाळा, सवारी इन घ्वाळा अदिक खच्चर कोट्टुर. 15ददान नगर इन व्यापारी ईरोर; हापाळ सा द्वीप नीन हाट बन्सकु ईरव; आंदुर नीन हाती हाथीहल्ल इन सींग अदिक आबनूस इन हुळ्ली व्यापार दा तर तोगोर. 16नीन हापाळ कारीगर इन कारण अराम नीन व्यापारी ईरोन; मरकत, जांभळा रंग इन रंग इन अदिक बूटेदार कपळा, सन, मूंगा, अदिक लालडी कोटकु आंदुर नीन माल कोमतोगोर. 17यहूदा अदिक इस्त्राएली भी नीनोर व्यापारी ईरोर; आंदुर मिन्नीत इन गोदी, पन्नग, अदिक शयद, याण्णा, अदिक बलसान कोटकु नींद माल कोंडुन. 18नीन दा हापाळ कारीगर आत अदिक सप्पा प्रकार इन धन जमा आत, ईदुर देल दमिश्क नीन व्यापारी आदुन; अदिक नीन हाती हेलबोन उन अंगुर इन रास्सा अदिक बिळीद ऊन पोहचुस्कु आत. 19यावान अदिक वदान इन लॉकुर नीन माल इन बदला दा सूत कोट्टुर; अदिक आंदुर कारण फौलाद, तज अदिक अगर दा भी नीन व्यापारी आदुन. 20सवारी इन नाक जामे अन साटी ददान नीन व्यापारी आत. 21अरब अदिक केदार इन सप्पा प्रधान नीन व्यापारी ठहरूसदुर; आंदुर पाड्डा, म्यांडा अदिक व्हातगोळ हुडुकु नीन सांगुळ लेन देन माळदुर. 22शबा अदिक रामा अन व्यापारी नीनोर व्यापारी ठहरूसदुर; आंदुर उत्तम उत्तम राज्य अन सप्पा प्रकार इन मसाला, सप्पा प्रकार इन मणी, अदिक व्हान्ना कोटकु नींद माल कोंडुर. 23हारान, कन्ने, एदेन, शबा अन व्यापारी, अदिक अश्शूर अदिक कलमद, ईंदुर सप्पा नीन व्यापारी ठहरूसदुर. 24ईंदुर वळ्लेव वळ्लेव वस्तुगोळ मतलब होदोर साटी नीळा अदिक बूटेदार कपळा अदिक डोरीगोळ देल कटकु अदिक देवदार इन माळ्द चित्र विचित्र कपळा अन पेटीगोळ तनकु नीन सांगुळ लेन देन माळतोगोर.”

25तर्शीश इन ड्वांगा नीन व्यापार इन माल इन ढाऊसावाळेर आदुर. “आंदुर द्वारा नी समुद्र अन न्याड्या ईतकु हापाळ धनवान अदिक प्रतापी आगेगीदुर. 26नीन खिवैया नीनी गहरा नीर दा पोहचुसदुर, अदिक हवा नीनी समुद्र अन न्याड्या मुरू कोम्त. 27या दिशी नी मुळक्या, अदा दिशी नीन धन सम्पत्ती, व्यापार इन माल, मल्लाह, माँझी, जुळाई इन क्याल्सा माळावाळेर, व्यापारी लॉकुर, अदिक नीन दा यास सिपाही आर, अदिक नीन सप्पा भीळ-भाळ समुद्र अन न्याड्या बीदोदीत. 28नीन माँझीगोळ चिल्ळासोद शब्द इन मारा नीन आसपास इन जागा नळ्गकु बीद्दव. 29सप्पा खेऊसावाळेर मल्लाह, अदिक समुद्र दा यास माँझी ईरतार, आंदुर तान तान ड्वांगा मा टु ईळदार. 30अदिक आंदुर जमीन मा नीदुरकु नीन बारा दा ऊँचा शब्द देल बिलखुस बिलखुसकु वर्ल्यार. आंदुर तान तान ताल्ला मा धुळा हार्सकु राख दा लोटुस्यार; 31अदिक नीन दुख दा तान ताल्ला टकला माळ्यार, अदिक नेळु दा टाट कटकु तान मन इन हापाळ दुख इन सांगुळ नीन बारा दा वर्ल्यार अदिक याद्दा पीटस्यार. 32आंदुर विलाप माळतेला नीन बारा दा ईद हाळ माळकु हाळ्यार: सोर जो ईग समुद्र अन न्याड्या चुपचाप बीदकु आद, अदुर तुल्य याता नगरी आद? 33याग नीन माल समुद्र मा टु होळ तोगोद, आग हापाळ सा राज्य अन लॉकुर तृप्त आगतोगोर; नीन धन अदिक व्यापार इन माल इन बहुतायत देल पृथ्वी इन राजा धनी आगतोगोर. 34या समय नी अथाह नीर दा लयरगोळ देल मुर्द, आ समय नीन व्यापार इन माल, अदिक नीन सप्पा निवासी भी नीन बुळ्क ईतकु नष्ट आगेदुर. 35समुद्र तटीय द्याश इन सप्पा ईरावाळेर नीन कारण विस्मित आदुर; अदिक आऊन सप्पा राजागोळ रोंगटागोळ नीदरेदव, अदिक आंदुर बाय मा उदासी छासेत. 36द्याश द्याश इन व्यापारी नीन विरूद्ध ताना होडेत्यार; नी अंज्क इन कारण आगेग्या अदिक बाक स्थिर ईर सकतीदील.”