यहेजकेल 25

अम्मोन उन विरूद्ध भविष्यवाणी

1यहोवा अन ईद वचन नान हाती पोहचुस्त: 2“हे मंळसा अन सन्तान, अम्मोनिया अन दी बाय माळकु आंदुर बारा दा भविष्यवाणी माळ. 3आंदुर से अन, हे अम्मोनिया, परमेश्वर यहोवा अन वचन केळी, परमेश्वर यहोवा ईद अनतान कि नीव जो नान पवित्र जागा अन बारा दा याग अद अपवित्र माळकु आत, अदिक इस्त्राएल इन द्याश इन बारा दा याग अद नाश आगेत, अदिक यहूदा अन घराना अन बारा दा याग आंदुर गुलामी दा होदुर, आह, आह! अंदुन. 4ई कारण नोळी, ना नीनी पूर्व द्याश इन लॉकुर्द अधिकार दा माळदुर मा आईन; अदिक आंदुर नीन न्याड्या तान छावनीगोळ हाक्यार अदिक तान मान्ना माळ्यार; आंदुर नीन काय तिंदार अदिक नींद हाल कुळदार.” 5ना रब्बा नगर इक ऊँटगोळ ईरा अदिक अम्मोनिया अन द्याश इक मर्र-म्याढ्ढागोळ्द कुरोद जागा माळा कोमाईन; आग नीव जान्स कोंडीर कि ना यहोवा हुईन.

6यतिकी परमेश्वर यहोवा ईद अनतान: नीव जो इस्त्राएल इन द्याश इन कारण ताळी मुरसीर अदिक ल्यालमा, अदिक तान सप्पा मन इन अभिमान देल आनंद माळदीर, 7ई कारण नोळ, ना तान कय नीन म्याकुच वाळुसीन; अदिक नीनी राज्य राज्य अन लुट माळ कोमाईन, अदिक द्याश द्याश इन लॉकुर दा टु नीनी मिटुसाईन; अदिक द्याश द्याश दा टु नीनी नष्ट माळाईन. ना नींद सत्यानाश माळ कोमाईन; आग नी जान्स कोंड्या कि ना यहोवा हुईन.

मोआब उन विरूद्ध भविष्यवाणी

8“परमेश्वर यहोवा ईद अनतान: मोआब अदिक सेईर जो अनतार, नोळी, यहूदा अन घराना दुसरा द्याशगोळ घाई आगेग्याद. 9ई कारण नोळ, मोआब उन द्याश उन किनारा अन नगरगोळी बेत्यशीमोत, बालमोन, अदिक किर्यातैम, जो द्याश आ द्याश इन शिरोमणी आन, ना आंदुर हादी खोल्सकु 10आंदरी पूर्व दिशा अन लॉकुर वश दा हींग माळ कोमाईन कि आंदुर अम्मोनिया मा चळाई माळुल; अदिक ना अम्मोनिया अक ईल ताका आंदुर अधिकार दा माळ कोमाईन कि राज्य राज्य अन न्याड्या आंदुर्द याद बाक ईरतीदील. 11ना मोआब उक भी दण्ड कोळाईन. आग आंदुर जान्स कोंडार कि ना यहोवा हुईन.

एदोम उन विरूद्ध भविष्यवाणी

12“परमेश्वर यहोवा ईद भी अनतान: एदोम जो यहूदा अन घराना से बदला तांकोडुन, अदिक आंदुर से बदला ताकोमकु हापाळ दोषी आगेदुन, 13ई कारण परमेश्वर यहोवा ईद अनतान, ना एदोम द्याश इन विरूद्ध तान कय वाळुसकु अदुर दा टु मंळसा अदिक जनावर येढ्ढु उक मिटुसाईन; अदिक तेमान टु हुडुकु ददान नगर ताका अदरी नाश माळ कोमाईन; अदिक आंदुर तलवार देल कोंदकु आदार. 14ना तान प्रजा इस्त्राएल इन द्वारा एदोम से तान बदला ताकोमाईन; अदिक आंदुर आ द्याश दा नान कोप अदिक जलजलाहट इन अनुसार क्याल्सा माळ्यार. आग आंदुर नान बदला ताकोमोद जान्स कोंडार, परमेश्वर यहोवा अन ईदा वाणी आद.

पलिश्ति अन विरूद्ध भविष्यवाणी

15“परमेश्वर यहोवा ईद अनतान: यतिकी पलिश्ती लॉकुर बदला तांकोडुर, बल्की तान युग युग इन दुश्मनी इन कारण तान मन इन अभिमान देल बदला तांकोडुन कि नाश माळुल, 16ई कारण परमेश्वर यहोवा ईद अनतान, नोळ, ना पलिश्तीगोळ विरूद्ध तान कय वाळुसदुर मा आईन, अदिक करेती लॉकुरी मिटुस बुळाईन; अदिक समुद्र अन किनारा अन सप्पा मिक्कु ईरावाळेर्द नाश माळाईन. 17ना जलजलाहट इन सांगुळ मुकदमा आळकु, आंदुर से कळाई इन सांगुळ बदला ताकोमाईन. अदिक याग ना आंदुर से बदला ताकोम कोमाईन, आग आंदुर जान्स कोंडार कि ना यहोवा हुईन.”