यहेजकेल 14

परमेश्वर द्वारा मूर्ति पुजा अन चेतावनी

1बाक इस्त्राएल इन येनारा बाट्टुर नान हाती बंदकु नान मुंद कुर्तोदुर. 2आग यहोवा अन ईद वचन नान हाती पोहचुस्त. 3“हे मंळसा अन पारा, ई मंळसागोळ रा तान मुर्तीगोळ तान मन दा स्थापित माळदुर, अदिक तान अधर्म इन ठोकर तान मुंद ईटदुर; बाक येन आंदुर नान से येनारा भी केळ सक्यार?” 4ईदुरसाटी नी आंदुर से अन, प्रभु यहोवा ईद अनतान: इस्त्राएल इन घराना दा टु जो यावारा तान मुर्तीगोळ तान मन दा स्थापित माळकु, अदिक तान अधर्म इन ठोकर तान मुंद ईटकु भविष्यवक्ता अन हाती बंदुर, आऊक ना यहोवा, आऊन हापाळ सा मुर्तीगोळ अनुसार अच उत्तर कोळाईन, 5यदुर देल इस्त्राएल उन घराना, जो तान मुर्तीगोळ द्वारा नानी त्याग्सकु दुर आगेग्याद, आंदरी ना आंदुर्द अच मन इन द्वारा फसुसाईन. 6“ईदुरसाटी इस्त्राएल इन घराना से अन, प्रभु यहोवा ईद अनतान: तिर्गी अदिक तान मुर्तीगोळ इक बेन इन हींद माळी; अदिक तान सप्पा बेकार क्याल्सागोळ से बाय तिर्गुसी. 7यतिकी इस्त्राएल इन घराना दा टु अदुर बीच ईरावाळेर परदेशीगोळ दा टु भी यावारा यती ईला आगुल, जो नान हींद आगोद बिटकु तान मुर्तीगोळ तान मन दा स्थापित माळुल, अदिक तान अधर्म इन ठोकर तान मुंद ईट, अदिक आग नान से तान यातोदु मात केळोर साटी भविष्यवक्ता अन हाती बंदार, रा आऊक ना यहोवा खुद अच उत्तर कोळाईन. 8ना आ मंळसा अन विरूद्ध आगकु आऊक चकित माळाईन, अदिक चिन्ह ठहरूसाईन; अदिक आऊन कहावत बनसेदीत अदिक आऊन तान प्रजा दा टु नष्ट माळाईन; आग नीव लॉकुर जान्स कोंडीर कि ना यहोवा हुईन. 9अगर भविष्यवक्ता ध्वाका तिनकु यातोदारा वचन अंदीदान, रा जान्सी कि ना यहोवा आ भविष्यवक्ता अक ध्वाका कोटान; अदिक ना तान कय आऊन विरूद्ध वाळुसकु आऊक तान प्रजा इस्त्राएल दा टु नष्ट माळाईन. 10आंदुर सप्पा मुंदुर तन तान अर्धम इन बोझ नेगदार, मतलब ह्यांग भविष्यवक्ता से केळावाळा अन अधर्म ठहरूसीत, हांग अच भविष्यवक्ता अन भी अधर्म ठहरूसीत. 11ताकी इस्त्राएल इन घराना मुंद नान हींद आगोद बीळबाळुल अदिक न तान भांती भांती इन अपराधगोळ द्वारा मुंद होगकु अशुध्द आगुल; बल्की नान प्रजा आगुल अदिक ना आंदुरव परमेश्वर ठहरूसाईन, प्रभु यहोवा अन ईदा वाणी हुन.”

नूह, दानिय्येल, अदिक अय्यूब

12आग यहोवा अन ईद वचन नान हाती पोहचुस्त, 13“हे मंळसा अन पारा, याग यातोदारा द्याश इन लॉकुर नान से विश्वासघात माळकु पापी आगेगुल, अदिक ना तान कय आ द्याश इन विरूद्ध वाळुस्कु अदुर अन्नरूपी आधार दुर माळाईन, अदिक अदुर दा अकाल हाक्कु अदुर दा टु मंळसा अदिक जनावर येढ्ढु उन नाश माळाईन, 14आग बाक अदुर दा नूह, दानिय्येल, अदिक अय्यूब ईंदुर मुरू मंळसा ईरूल, तरी भी आंदुर तान अधर्म इन द्वारा सिर्फ तांद अच जीवगोळी ऊळ्स सक्यार; प्रभु यहोवा अन ईदा वाणी हुन. 15अगर ना यातोदारा द्याश दा दुष्ट कीळा कळाईन जो आऊक निर्जन माळकु ऊजाळ्स बुळुल, अदिक कीळागोळ कारण याऊ अदुर दा आगकु होगबाळुल, 16रा चाहसुल अल आंदुर आ मुर मंळसा ईरूल, तरी भी प्रभु यहोवा अन ईदा वाणी आद, नान जीवन इन किर्या, न आंदुर पारगोळी अदिक न पोरगोळी ऊळ्स सक्यार, आंदुर अच आबना मिक्यार; लेकीन द्याश ऊजळुसेदीत आगेदीत. 17अगर ना आ द्याश मा तलवार जेडुकु अनाईन, हे तलवार आ द्याश दा नळ; अदिक ई रिती ना अदुर दा टु मंळसा अदिक जनावर नष्ट माळाईन, 18आग बाक अल आंदुर आ मुर मंळसा भी ईरूल, तरी भी यहोवा अन ईद वाणी आद, नान जीवन इन किर्या, न रा आंदुर पारगोळी अदिक न पोरगोळी ऊळ्स सक्यार, आंदुर आबना मिक्यार.” 19अगर ना आ द्याश दा मरी फैलुसतीन अदिक अदुर मा तान जलजलाहट भळकुसकु अदुर रक्ता वाहुसेन कि अलेर मंळसा अदिक जनावर येढ्ढु नष्ट आगुल, 20रा बाक चाहे नूह, दानिय्येल अदिक अय्यूब भी अल ईत्तार, तरी भी, प्रभु यहोवा अन ईद वाणी आद, नान जीवन इन किर्या, आंदुर न पारगोळी अदिक न पोरगोळी ऊळ्स सक्यार, तान धर्म इन द्वारा आंदुर तान अच जीवगोळी ऊळ्स सक्यार. 21“यतिकी प्रभु यहोवा ईद अनतान: ना यरूशलेम मा तान नाकु दण्ड पोहचुसाईन, मतलब तलवार, अकाल, दुष्ट कीळा अदिक मरी, यदुर देल मंळसा अदिक जनावर सप्पा अल नष्ट आगुल. 22तरी भी अल येनारा पार-पोरगोळ उळदार जो अल टु होटकु नीम हाती पोहचुस्कु आदार, अदिक नीव आंदुर चाल चलन अदिक क्याल्सागोळी नोळकु आ विपत्ती इन बारा दा जो ना यरूशलेम मा हाकाईन, बल्की यास विपत्ती ना अदुर मा हाकाईन, आ सप्पा अन बारा दा शांती पाऊसीर. 23याग नीव आंदुर चाल चलन अदिक क्याल्सा नोळीर, आग आंदुर नीम शांती इन कारण आदार; अदिक नीव जान्स कोंडीर कि ना यरूशलेम दा जो येनारा माळीन, अद बीना कारण माळीदील, प्रभु यहोवा अन ईदा वाणी आद.”