परमेश्वर उन वचन
एस्तेर 9
यहूदीगोळ्द तान दुश्मनगोळी नाश माळोद
अदार हेसुर इन हन्नेळवा तिंगुळ इन तेरवा दिन इक, या दिशी राजा अन्द आग्या अदिक नियम पुरा आगली ईरव, अदिक यहूदीगोळ्द दुश्मन आंदुर मा प्रबल आगोद आशा ईटतोगोर, लेकीन इदुर विपरीत यहूदी तान दुश्मनगोळ मा प्रबल आदुर; आ दिशी यहूदी लॉकुर राजा क्षयर्ष इन सप्पा प्रान्तगोळ दा तान तान नगर दा जमा आदुर, कि जो आंदुर नुकसान माळोद यत्न माळुल, आंदुर मा कय नळसुल. याऊ आंदुर सामना माळ सकीदील, यतिकी आंदुर अंज्क द्याश द्याश इन सप्पा लॉकुर्द मन दा समुस्कु ईरोद. उल्टा प्रान्तगोळ सप्पा हाकिमगोळ अदिक अधिपतिगोळ अदिक प्रधानगोळ अदिक राजा अन्द क्याल्सा माळावाळेर यहूदीगोळ्द मदत माळदुर, यतिकी आंदुर मन दा मोर्दकै अन्द अंज्क समुस्कु ईरोद. मोर्दकै रा राजा अन्द अल हापाळ प्रतिष्ठित ईरोन, अदिक कीर्ति सप्पा प्रान्तगोळ दा फैलुसेत; उल्टा आ गंळ्स मोर्दकै अन्द महिमा वाळुस्तेला होटोत. अत: यहूदीगोळ तान सप्पा दुश्मनगोळ इक तलवार देल कोंदकु अदिक घात माळकु नष्ट माळ बुट्टुर, अदिक तान दुश्मनगोळ से तान इच्छा अन्द अनुसार बर्ताव माळदुर. शूशन गढ़ दा यहूदीगोळ अईद सौ मंळसागोळ इक घात माळकु नष्ट माळदुर. आंदुर पर्शन्दाता, दल्पोन, अस्पाता, पोराता, अदल्या, अरीदाता, पर्मशता, अरीसै, अरीदे अदिक वैजाता, मतलब हम्मदाता अन पार यहूदीगोळ विरोधी हामान उन हत्त पारगोळ इक भी घात माळदुर; लेकीन आंदुर धन इक लुटसीदील. अदा दिशी शूशन गढ़ दा घात माळकु आत आंदुर गिनती राजा अक केळ्सकु आत. आग राजा एस्तेर रानी से अंदुन, “यहूदीगोळ शूशन गढ़ दा अच अईद सौ मंळसागोळ अदिक हामान उन हत्त पारगोळ इक भी घात माळकु नष्ट माळदुर; बाक राज्य अन्द अन्य प्रान्तगोळ दा आंदुर येन मालुम येन येन माळीदार! ईग इदुर से येक्कुल नीन निवेदन येन आद? अद भी पुरा माळकु आदीत. नी येन बेळत्या? अद भी नीन इक कोटकु आदीत.” एस्तेर अंदुर, “अगर राजा अक स्वीकार ईरूल रा शूशन इन यहूदीगोळ इक ईंद इन घाई नाळ भी माळोद आग्या कोटकु आगुल, अदिक हामान उन हत्तु पारगोळ फाँसी इन खम्भागोळ मा लटकुसकु आगुल.” राजा अंदुन, “हिंग अच माळकु आगुल;” ईद आग्या शूशन दा कोटकु आत, अदिक हामान उन हत्तु पारगोळ इक लटकुसकु आत. शूशन इन यहूदीगोळ अदार तिंगुळ इन चौदहवा दिन इक भी जमा आगकु शूशन दा मुर सौ गंळ्सुर्द घात माळदुर, लेकीन घन इक लुटसीदील. राज्य इन अन्य प्रान्तगोळ यहूदी जमा आगकु तान तान जीव ऊळसोर साटी नीदुरदुर, अदिक तान दुश्मनगोळ दा टु पचहत्तर हजार मंळसागोळ इक घात माळकु तान दुश्मनगोळ से आराम सिक्त; लेकीन धन लुटसीदील. ईद क्याल्सा अदार तिंगुळ इन तेरवा दिन इक माळकु आत, अदिक चौदहवा दिन इक आंदुर आराम माळकु भोज माळदुर अदिक आनन्द इन दिन ठहरूसदुर. लेकीन शूशन नगर इन यहूदी अदार तिंगुळ इन तेरवा दिन इक, अदिक अदा तिंगुळ इक चौदहवा दिन इक जमा आदुर, अदिक अदा तिंगुळ इन पंदरावा दिशी आंदुर आराम माळकु भोज इन अदिक आनन्द इन दिन ठहरूसदुर. ई कारण देहाती यहूदी जो बिना नगर इन दिवाल इन ऊरगोळ दा ईरतार, आंदुर अदार तिंगुळ इन चौदहवा दिन इक आनन्द अदिक भोज अदिक खुशी अदिक आपस दा भोजन सामग्री कळोद दिन नियुक्त माळकु मान्सतार.
पूरीम हाब्ब अन्द स्थापना
ई मातगोळ्द वृतांत लिख्सकु, मोर्दकै अन्द राजा क्षयर्ष अन्द सप्पा प्रांतगोळ्द दा, येन हात्ती येन दूर ईरावाळेर पुरा यहूदीगोळ्द हात्ती चिट्टीगोळ कळुदुन, अदिक ईद आग्या कोट्टुन, कि अदार तिंगुळ इन चौदहवा अदिक अदा तिंगुळ इन पंदरावा दिशी हर वर्ष मानसुल. इऊर दा यहूदीगोळ तान दुश्मनगोळ से आराम सिक्त, अदिक ईद तिंगुळ यदुर देल इदुर दा शोक आनन्द देल, अदिक विलाप खुशी से देल बदलुस्त; मानसुल अदिक आंदरी सामुहिक भोज अदिक आनन्द अदिक आबुर दाबुर हात्ती भोजन सामग्री कळुली अदिक गरीबगोळी दान कोळोद दिन मानसुल. अत: यहूदीगोळ जसा शुरू माळीदुर, अदिक जसा मोर्दकै आंदरी लिख्सकु यतिकी हम्मदाता अगागी इन पार हामान जो सप्पा यहूदीगोळव विरोधी ईरोन, आव यहूदीगोळ्द नाश माळोद योजना माळदुन, अदिक आंदरी मिटुस्ली अदिक नष्ट माळोर साटी “पूर” मतलब चिट्टी हाकदुन. लेकीन याग राजा ईद जान्स कोंडुन, आग आव आग्या कोट्टुन अदिक लिखसुसदुन कि जो दुष्ट योजना हामान यहूदीगोळ्द विरूद्ध माळीदुन अद आऊंदा ताल्ला मा पलटुस्कु बरूल, आग आव अदिक आऊन पारगोळ फाँसी इन खंभा मा लटकुसकु आदुर. ई कारण आ दिनगोळ हेसुर पूर शब्द टु पूरीम ईटकु आत. ई चिट्टी इन सप्पा मातगोळ कारण, अदिक जो येनारा आंदुर ई बारा दा नोळदुर अदिक जो येनारा आंदुर मा बितुस्त, अदुर कारण भी यहूदीगोळ तान तान साटी अदिक तान औलाद इन साटी, अदिक आ सप्पा मुंदुर साटी भी जो आंदुर दा मिलुसेगीदुर ईद अटल प्रण माळदुर, कि आ लेख इन अनुसार हर वर्ष आऊन ठहरूस्त समय दा आंदुर ईव येढ्ढ दिन मानसुल; अदिक पीढ़ी पीढ़ी, कुल कुल, प्रान्त प्रान्त, नगर नगर दा ईव दिन याद माळकु अदिक मान्सकु आदव, अदिक पूरीम हेसुर इन दिशी यहूदीगोळ दा यागलु मिटुसतीदील अदिक अऊर याद आंदुर वंश दा मिक्कु ईत्तीत. बाक अबीहैल उन पोर एस्तेर रानी, अदिक मोर्दकै यहूदी पूरीम इन बारा दा ईद दूसरी चिट्टी धोळ अधिकार इन सांगुळ लिख्सदुर. इदुर नकलगोळ मोर्दकै क्षयर्ष इन राज्य इन ऊंद सौ सत्ताईस प्रान्तगोळ्द सप्पा यहूदीगोळ्द हात्ती शांती कोळावाळेर्द अदिक खरा मातगोळ सांगुळ ई उम्मीद देल कळुदुर, कि पूरीम इन आ दिनगोळ विशेष ठहरूस्कु समयगोळ दा मोर्दकै यहूदी अदिक एस्तेर इन रानी इन आग्या अन्द अनुसार, अदिक जो यहूदीगोळ तान अदिक तान औलाद इन साटी ठान्स कोंडीदुर, अदुर अनुसार उपवास अदिक विलाप माळकु आगुल. पूरीम इन बारा दा ईद नियम एस्तेर उन आग्या से भी स्थिर माळकु आत, अदिक अदुर चर्चा किताब दा लिख्सकु आत.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.