एस्तेर 4

मोर्दकै अन्द एस्तेर से मदत बेळोद

1याग मोर्दकै जान्स कोंडुन कि येन येन माळकु आग्याद आग मोर्दकै कपळा हरदुन, टाट हाक्कु, राख हाक्कु, नगर इन न्याड्या होगकु ऊँचा अदिक दुख भरा शब्द देल चिल्‍ळासली कुरतुन; 2अदिक आव राजभवन इन फाटक इन मुंद पोहचुस्दुन, लेकीन टाट हाक्कु राजभवन इन फाटक इन बुळ्क रा यारीकु होगोद आग्या ईला ईरोद. 3ऊंद ऊंद प्रान्त दा, येल येल राजा अन्द आग्या अदिक नियम पहुचुस्त, अल अल यहूदी बळा विलाप माळली अदिक उपवास माळली अदिक वर्ली पिट्सली कुरतुर; हापाळ सा मुंदुर टाट हाक्कु अदिक राख हाक्कु बिदकु ईत्तुर. 4एस्तेर रानी इन दासीगीतेर अदिक किन्नरगोळ होगकु आकिक हेळ बुट्टुर, आग रानी हापाळ दुखी आगेदुर; अदिक मोर्दकै अन्द हात्ती कपळा कळुकु ईद बुलावा कळुदुर कि टाट ईळुकु इवरी हाक्क कोमुल, लेकीन आव अव कपळा हुळदीदिल. 5आग एस्तेर राजा अन्द किन्नरगोळ दा टु हताक उक यारी राजा आऊन हात्ती ईरली हठरूसीदुन, कारूकु आग्या कोट्टुन कि मोर्दकै अन्द हात्ती होगकु मालूम माळ कोमुल कि येन मात आद, अदिक इदुर्द येन कारण आद. 6आग हताक नगर इन आ चौराह दा, जो राजभवन इन फाटक इन मुंद ईरोद, मोर्दकै अन्द हात्ती होदुन. 7मोर्दकै आऊक सप्पा येनारा हेळ बुट्टुन कि नान म्याकुच येन बितुस्याद, अदिक हामान यहूदीगोळ्द नाश माळोद अनुमति सिक्कोर साटी राजभण्डार दा यास बेळ्ली तुम्मोद वचन कोटीदुन, ईद भी ठीक ठीक हेळ बुट्टुन. 8बाक यहूदीगोळ्द विनाश माळोद जो आग्या शूशन दा कोटकु आगीत, अदुर्द ऊंद नकल भी आव हताक उन कय दा, एस्तेर उक तोरसोर साटी कोट्टुन, अदिक आऊक सप्पा हाल हेळोर, अदिक ईद आग्या कोळली अंदुन, कि बुळ्क राजा अन्द हात्ती होगकु तान लॉकुर्द साटी गिळगिळास्कु विनती माळुल. 9आग हताक एस्तेर उन हात्ती होगकु मोर्दकै अन्द मातगोळ अनकु केळ्सदुन. 10आग एस्तेर हताक उक मोर्दकै से ईद अनोद आग्या कोट्टुन, 11“राजा अन्द सप्पा क्याल्सा माळावाळेर, उल्टा राजा अन्द प्रान्त ईनोर सप्पा लॉकुर इक भी मालूम आद, कि येन गंळ्स येन आर्त, यावारा येन ईर बाळुल, जो बिना आग्या सिक्त बुळ्क आंगुळ दा राजा अन्द हात्ती होदान आऊक कोन्नोद आग्या अच आद; केवल यार दी राजा व्हान्ना अन्द राजदण्ड वाळुस्यान आवा ऊळुतान. लेकीन ना ईग तीस दिन से राजा अन्द हात्ती कारूकु आगीदील.” 12एस्तेर इन ईव मातगोळ मोर्दकै अक केळ होत. 13आग मोर्दकै एस्तेर उन हात्ती ईद बुलावा कळुदुन, “नी मन इन मन दा ईद विचार माळबाळ कि ना अच राजभवन दा ईरोद कारण अदिक सप्पा यहूदीगोळ दा ऊळुकु ईराईन. 14यतिकी जो नी ई समय सुंगामुंगा ईत्या, रा अदिक यातोदारा न यातोदारा उपाय देल यहूदीगोळ्द छुटकारा अदिक सहायता सिक्केदीत, लेकीन नी तान आप्प उन घराना अन्द सांगुळ नष्ट आद्या. येन मालूम नीन इक हिंग अच मुश्किल समय इन साटी राजपद सिक्याद?” 15आग एस्तेर मोर्दकै अन्द हात्ती ईद बुलावा कळुदुन, 16“नी होगकु शूशन उन सप्पा यहूदीगोळ इक जमा माळ, अदिक नीव सप्पा मुंदुर मिलुस्कु नान निमित्त उपवास माळी, मुर दिन ईळ्लक येनु तिनबाळी, अदिक येनु कुडुबाळी. ना भी तान दासीगीतेर सांगुळ अदा रीती देल उपवास माळाईन; अदिक हिंग अच दशा दा ना नियम इन विरूद्ध राजा अन्द हात्ती बुळ्क होगाईन; अदिक अगर नष्ट आगाईन रा आगाईन.” 17आग मोर्दकै होटोदुन अदिक एस्तेर उन आग्या अन्द अनुसार अच आव माळदुन.