परमेश्वर उन वचन
एस्तेर 2
एस्तेर इन रानी बनसोद
ई मातगोळ बाद्दा याग राजा क्षयर्ष उन सिट्ट ठण्डा बिदोत, आग आव रानी वशती अन, अदिक जो क्याल्सा आक माळीदुर, अदिक जो आकिन बारा दा आग्या होटीत अदुर भी याद माळदुन. आग राजा अन सेवक जो आऊन खास ईरोर, अनली कुरतुर, “राजा अन साटी सुंदर अदिक हारोदोर कुवारा पोरगोळी ढुंढ्सकु आगुल. अदिक राजा तान राज्य अन सप्पा राज्यगोळ दा लॉकुरी इदुरसाटी निवळुसुल कि आंदुर सप्पा सुंदर हारोदोर कुवारा पोरगोळी शूशन गढ़ इन रनवास दा जमा माळुल अदिक आर्तेर प्रबंधक हेगे अक कोळुल जो राजा नव खास किन्नर सिपाही ईरोन; अदिक सिनगार इन वस्तुगोळी आंदरी कोटकु आगुल. आग आंदुर दा टु जो कुवारा पोरगोळ राजा अन नजर दा वळ्लेर ठहरूस्यार, आक रानी वशती अन जागा मा रानी माळकु आगुल.” ईद मात राजा अक पसंद बत्त अदिक आव हांगा माळदुन. शूशन गढ़ दा मोर्दकै हेसुर इनव ऊंद यहूदी ईरतोगोन, जो कीश हेसुर इनव ऊंद बिन्यामीनी नव पळनातु, शिमी अन नातु, अदिक याईर उन पार ईरोन. आव आ बंदीगोळ सांगुळ यरूशलेम टु बँधुआई दा होगीदुन, यारी बेबीलोन इन राजा नबूकदनेस्सर, यहूदा अन राजा यकोन्याह सांगुळ बंदी माळकु वोतीदुन. आव हदस्सा हेसुर इन तान काका अन आकतींग इक, जो एस्तेर भी कहलुस तोगोर, पालन पोसन माळीदुन; यतिकी आकिन मोय आप्प यारू ईला ईरोर, अदिक आ पोर सुंदर अदिक रूपवती ईरोर, अदिक याग आकिन मोय आप्पुर सोतोदुर, आग मोर्दकै आकी तान पोर इन घाई पाल्सदुन. याग राजा अन आग्या अदिक नियम केळ्सकु आदव, अदिक हापाळ सा आर्तेर, शूशन गढ़ दा हेगे अन अधिकार दा जमा माळकु आदुर, आग एस्तेर भी राजभवन दा आर्तेर प्रबंधक हेगे अन अधिकार दा कोटकु आदुर. आक पोर आऊन नजर दा वळ्लेर हतदुर; अदिक आव आकिन से खुश आदुन, आग आव बिना समय माळ्द आकी राजभवन दा टु सिनगार इन वस्तुगोळ, अदिक आकिन भोजन, अदिक आकिन साटी निवळुसदोर येळ सहेलीगोळी भी कोट्टुन, अदिक आकी अदिक आकिन सहेलीगोळी रनवास दा सब से वळ्लीद जागा कोट्टुन. एस्तेर ना तान जात हेळीदुर, ना तान कुल, यतिकी मोर्दकै आकी आग्या कोटीदुन कि आऊक हेळबाळेत. मोर्दकै रोज रनवास इन आंगुळ इन मुंद टेटाळोन ताकी जान्सुल कि एस्तेर ह्यांग आर अदिक आकिन सांगुळ येन आगतोगोद? याग ऊंद ऊंद पोर इन पारी बत्त, कि आंदुर क्षयर्ष राजा मुंद होगुल, अदिक ईद आ समय आत याग आकिन सांगुळ आर्तेर साटी ठहरूस्द नियम इन अनुसार बारा तिंगुळ ताका व्यवहार माळकु आगीत; मतलब आंदुर सिनगार माळव दिन ई रिती देल बित्सदव, कि आर तिंगुळ ताका गन्धरस इन याण्णा हचकु आगोद, अदिक आर तिंगुळ ताका सुगन्धद्रव, अदिक आर्तेर्द सिनगार माळोद दुसरा सामान हचकु आगोद ई प्रकार देल आ पोर याग राजा अन हाती होगोर, याग जो येनारा आक चाहासोर कि रनवास टु राजभवन दा वोतकु आगुल, अद आकी कोटकु आगोद. द्यावगा अक रा आक होगतोगोर अदिक व्हातर्या अक आव वापस बंदकु रनवास उन दुसरा मान्ना दा होगकु रखैलगोळ्द प्रबंधक राजा अन्द किन्नर सिपाही शाशगज उन अधिकार दा आगतोगोर, अदिक राजा अन्द हात्ती बाक ईला होगतोगोर. अगर राजा आकिन से खुश आगतोगोन, आग आकिन हेसुर ताकोमकु कारूकु आगोद. याग मोर्दकै अन्द काका अबीहैल उन पोर एस्तेर, यारी मोर्दकै पोर मान्सकु ईटीदुन, आकिन पारी बत्त कि राजा अन हात्ती होगुल, आग जो येनारा आर्तेर्द प्रबंधक राजा अन्द किन्नर सिपाही हेगे आऊन साटी ठहरूसीदुन, अदुर से येक्कुल आक मात्त येनु बेळीदील. यास मुंदुर एस्तेर उक नोळदुर, आंदुर सप्पा मुंदुर आकिन से खुश आदुर. आग एस्तेर राजभवन दा राजा क्षयर्ष उन हात्ती आऊन राज्य इन सातवा वर्ष इन तेबेत हेसुर इन हतवा तिंगुळ दा पोहचुस्कु आदुर. राजा एस्तेर उक अदिक सप्पा आर्तेर से येक्कुल प्यार माळदुन, अदिक अन्य सप्पा कुवारा पोरगोळ से येक्कुल आकिन अनुग्रह अदिक कृपा अन्द नजर आकी मा आत, ई कारण आव आकिन ताल्ला मा राजमुकुट ईटदुन अदिक आक इक वशती इन जागा मा रानी माळदुन. आग राजा तान सप्पा हाकिमगोळ अदिक क्याल्सा माळावाळेर इक ऊंद धोळ भोज कोट्टुन, अदिक अदरी एस्तेर इन भोज अंदुन; अदिक प्रान्तगोळ इक छुट्टी दिलुसदुन, अदिक तान उदारता अन्द योग्य ईनाम भी वाट्सदुन.
मोर्दकै द्वारा राजा अन्द जीव इन रक्षा
याग कुवारा पोरगोळ दुसरा घन जमा माळकु आदुर, आग मोर्दकै राजभवन इन फाटक दा कुर्तकु ईरोन. एस्तेर तान जाति अदिक कुल इन पता कोटीदील, यतिकी मोर्दकै आक इक हिंग अच आग्या कोटीदुन कि हेळबाळुल; अदिक एस्तेर मोर्दकै अन्द मात हिंग मानसोर जसा कि आऊन अल तान पालन पोषण इन समय मानसोर. अवा दिनगोळ दा याग मोर्दकै राजा अन्द राजभवन इन फाटक दा कुरतोगोन, आग राजा अन किन्नरगोळ जो द्वारपाल भी ईरोर, आंदुर दा टु बिगताना अदिक तेरेश हेसुर इन येढ्ढ मुंदुर राजा क्षयर्ष राजा से नाराज आगकु आऊक कोन्नोद योजना माळदुर. ईद मात मोर्दकै अक मालुम आत, अदिक आव एस्तेर रानी इक ईद मात हेळदुन, अदिक एस्तेर मोर्दकै अन्द हेसुर ताकोमकु राजा अक सावधान माळदुर. आग जाँच पळताल आगदुर मा ईद मात खरा होळ्त अदिक आंदुर येढ्ढु मुंदुर मार्र मा लटकुसकु फासी हचदुर, अदिक ईद वृत्तान्त राजा अन्द मुंद इतिहास इन किताब दा लिख्सकु आग्याद.
परमेश्वर उन वचन. Copyright © 2020 The Word for the World International. Licensed under CC BY-SA 4.0. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.