सभोपदेशक 8

1बुद्धिमान मंळसा यार घाई आन? याव मंळसा तत्व अन्द अर्थ जानस्तान? मंळसा अन्द बुद्धी इन कारण आऊन बाय चमकुसतद, अदिक आऊन मार्रा अन्द दुख दुर आगेगतद.

राजा अन्द आग्या मानसोद

2ना नीनी सलाह कोळतीन कि, परमेश्वर उन मुंद ताकोम्द किर्‍या अन कारण नी राजा अन आग्या अन पालन माळ. 3आऊन मुंद टु होटोगी; अगर आव यातोदु मात देल अप्रसन्न आन रा नीव अल ठहरूसबाळी; यतिकी राजा ह्यांग चाहासतान हांग माळतान. 4राजा अन शब्दगोळ दा परम सत्ता ईरतद, राजा से याव केळ सकतान, “नीव ईद येन माळेतीर?” 5जो मंळसा राजा अन्द आग्या अन्द पालन माळतान, आऊन हानि आगाल्द. बुद्धिमान मंळसा उपयुक्त समय अदिक उपयुक्त कार्य-विधि जानस्तान. 6हर ऊंद मात इन उपयुक्त समय अदिक उपयुक्त कार्य-विधि ईरतद, इदुरसाटी मंळसा अन्द दुख आऊन साटी हापाळ भारी बिळतद. 7मंळसा ईद जानसालुन कि येन आगावाळा आद, यतिकी याव मंळसा आऊक भविष्य दा घटुसावाळा मातगोळ हेळ सकतान? 8हिंग याव मंळसा आन आऊन वश जीव मा नळुल, अदिक आव जीव इन होळा समय अदरी रोक्स कोमुल? सायोद दिन मा सायावाळा अन्द अधिकार ईराल्द. युद्ध देल छुटकारा सिकाल्द, अदिक न दुष्ट मंळसा तान दुष्टता अन्द कारण मृत्यु देल ऊळु सकतान.

दुष्ट अदिक न्यायी

9याग ना धरती मा आगावाळा मातगोळ मा गम्भीरतापूर्वक तान मन हचदीन, आग ना ईद नोळदीन: याग ऊंद मंळसा दुसरा मंळसा मा प्रभुत्व जम्सतान आग आव खुद इन नाश माळतान. 10आग ना दुष्टगोळ इक कबर दा नळ्स्तेला नोळदीन. आंदुर पवित्र जागा दा होगतेला बरतेला ईरोर. नगर दा यल आंदुर नाना प्रकार इन दुष्‍कर्म माळीदुर, आंदुर्द प्रशंसा आगतोगोद. ईद भी बेकार आद. 11दुष्‍कर्म अन्द साटी मंळसा अक जल्दी दण्ड सिकाल्द, इदुरसाटी मंळसागोळ्द दिल दुष्‍कर्म माळदुर दा हतकु ईरतद. 12यद्यपि पापी मंळसा सौ घन दुष्‍कर्म माळतान, अदिक आऊक दण्ड सिकाल्द, आव लम्बा उमर ताका जीत्ता ईरतान, यद्यपि ना ईद जान्सतीन कि परमेश्वर उन से अंजावाळेर्द अन्त भी भला अच आगतद. परमेश्वर आंदुर्द भला माळतान, यतिकी आंदुर आऊन से अंजतार. 13लेकीन दुष्ट उन आखरी दा भला आगतीदील, अदिक आव छाया अन्द सदृश तान उमर लम्बा माळ सकतीदिल, यतिकी आव परमेश्वर से अंजालुन. 14ऊंद मात अदिक : ईद भी व्यर्थ आद, अदिक पृथ्वी मा आगतद. सच्चा मंळसागोळ इक दुर्जन मंळसागोळ्द दुष्कर्मगोळ्द फल भुगतुसोद बिळतद, अदिक दुर्जन मंळसा सच्चा मंळसागोळ्द सत्कर्मगोळ्द फल प्राप्त माळतान. अत: ना अनतीन, ईद भी व्यर्थ आद. 15इदुरसाटी ना लॉकुर इक सलाह कोळतीन: आनंद मनुसी. धरती मा मंळसा अन्द साटी तिनोद-कुडोद अदिक आनन्द मानसोद अलावा अदिक येनु भी वळ्लीद हैलेच. जो आयु परमेश्वर अदरी ई धरती मा प्रदान माळदुन, आऊन मेहनत दा ईदा खुशी सांगुळ ईत्तीत. 16याग ना बुद्धि प्राप्त माळोर साटी, तथा पृथ्वी मा आगावाळा क्याल्सा व्यापार इक समसोर साटी मन हचदीन, अदिक याग ना ईद जानसोद प्रयत्न माळदीन कि ह्यांग मंळसा ईळ्ल-हागुल जागस्तेला ईरतार, 17आग नान इक अनुभव आत कि परमेश्वर उन पुरा क्याल्सा, जो ई धरती मा आगतद, चाहे मंळसा अदुर्द भेद जानसोर साटी याटारा अच मेहनत येती माळबाळुल, आव अदुर्द पता हच सकालुन. अगर यावारा बुद्धिमान मंळसा आऊक जानसोद दावा माळुल तौभी आव आऊन पता हच सकालुन.